Mumbai Road Accident: ਮੁੰਬਈ ‘ਚ BEST ਬੱਸ ਹਾਦਸਾ, 4 ਮੌਤਾਂ ਤੇ ਕਈ ਜ਼ਖਮੀ

ਮੁੰਬਈ ਦੇ ਭਾਂਡੁਪ (ਪੱਛਮੀ) ਰੇਲਵੇ ਸਟੇਸ਼ਨ ਦੇ ਨੇੜੇ ਇੱਕ ਬੱਸ ਨੇ ਕਈ ਪੈਦਲ ਯਾਤਰੀਆਂ ਨੂੰ ਟੱਕਰ ਮਾਰ ਦਿੱਤੀ। ਇਸ ਹਾਦਸੇ ਵਿੱਚ 4 ਲੋਕਾਂ ਦੀ ਮੌਤ ਹੋ ਗਈ ਅਤੇ 14 ਜ਼ਖਮੀ ਹੋ ਗਏ। ਮੰਨਿਆ ਜਾ ਰਿਹਾ ਹੈ ਕਿ ਇਹ ਹਾਦਸਾ ਇੱਕ ਤੰਗ ਮੋੜ 'ਤੇ ਵਾਪਰਿਆ, ਜਿੱਥੇ ਯੂ-ਟਰਨ ਲੈਣ ਦੀ ਕੋਸ਼ਿਸ਼ ਕਰਦੇ ਸਮੇਂ ਬੱਸ ਨੇ ਆਪਣਾ ਕੰਟਰੋਲ ਗੁਆ ਦਿੱਤਾ ਅਤੇ ਫੁੱਟਪਾਥ 'ਤੇ ਚੱਲ ਰਹੇ ਕਈ ਪੈਦਲ ਯਾਤਰੀਆਂ ਨੂੰ ਦਰੜ ਦਿੱਤਾ।

ਇਹ ਹਾਦਸਾ ਕੁਰਲਾ ਬੱਸ ਹਾਦਸੇ ਤੋਂ ਠੀਕ 1 ਸਾਲ ਬਾਅਦ ਫਿਰ ਦੇਖਣ ਨੂੰ ਮਿਲਿਆ, ਜਿਸ ਵਿੱਚ 9 ਲੋਕਾਂ ਦੀ ਮੌਤ ਹੋ ਗਈ ਸੀ। ਸੋਮਵਾਰ ਰਾਤ ਨੂੰ ਬੈਸਟ ਬੱਸ ਡਰਾਈਵਰ ਰੂਟ ਨੰਬਰ 606 'ਤੇ ਯੂ-ਟਰਨ ਲੈਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ, ਜਦੋਂ ਬੱਸ ਇੱਕ ਖੰਭੇ ਨਾਲ ਟਕਰਾ ਗਈ ਅਤੇ ਫੁੱਟਪਾਥ 'ਤੇ ਜਾ ਡਿੱਗੀ।

ਇਹ ਹਾਦਸਾ ਬੀਤੀ ਰਾਤ ਲਗਭਗ 10:05 ਵਜੇ ਵਾਪਰਿਆ। ਸਟੇਸ਼ਨ ਦੇ ਬਾਹਰ ਵੱਡੀ ਭੀੜ ਮੌਜੂਦ ਸੀ। ਇਹ ਹਾਦਸਾ ਵਿਖਰੋਲੀ ਡਿਪੂ ਤੋਂ ਇੱਕ ਵੈੱਟ-ਲੀਜ਼ ਇਲੈਕਟ੍ਰਿਕ ਏਸੀ ਬੱਸ ਨਾਲ ਵਾਪਰਿਆ, ਜਿਸਨੂੰ ਇੱਕ ਠੇਕੇ ਉੱਤੇ ਨੌਕਰੀ ਕਰਨ ਵਾਲਾ ਡਰਾਈਵਰ ਚਲਾ ਰਿਹਾ ਸੀ। ਪੁਲਿਸ ਨੇ 52 ਸਾਲਾ ਡਰਾਈਵਰ ਸੰਤੋਸ਼ ਰਮੇਸ਼ ਸਾਵੰਤ ਨੂੰ ਹਿਰਾਸਤ ਵਿੱਚ ਲੈ ਲਿਆ ਹੈ। ਉਸ ਵਿਰੁੱਧ ਲਾਪਰਵਾਹੀ ਅਤੇ ਤੇਜ਼ ਡਰਾਈਵਿੰਗ ਕਾਰਨ ਮੌਤ ਦਾ ਕਾਰਨ ਬਣਨ ਦਾ ਮਾਮਲਾ ਦਰਜ ਕੀਤਾ ਗਿਆ ਹੈ।

BEST ਅਧਿਕਾਰੀਆਂ ਨੇ ਘਟਨਾ ਦੀ ਜਾਂਚ ਦੇ ਹੁਕਮ ਦਿੱਤੇ ਹਨ ਅਤੇ ਡਰਾਈਵਰ ਨੂੰ ਮੁਅੱਤਲ ਕਰ ਦਿੱਤਾ ਹੈ। ਅਧਿਕਾਰੀਆਂ ਅਨੁਸਾਰ, "ਅਸੀਂ ਘਟਨਾ ਦੀ ਜਾਂਚ ਕਰਾਂਗੇ ਤਾਂ ਜੋ ਇਹ ਪਤਾ ਲਗਾਇਆ ਜਾ ਸਕੇ ਕਿ ਕੀ ਬੱਸ ਡਰਾਈਵਰ ਸਹੀ ਢੰਗ ਨਾਲ ਸਿਖਲਾਈ ਪ੍ਰਾਪਤ ਸੀ।" ਮ੍ਰਿਤਕਾਂ ਵਿੱਚ 3 ਔਰਤਾਂ ਸ਼ਾਮਲ ਹਨ, ਜਿਨ੍ਹਾਂ ਦੀ ਪਛਾਣ 45 ਸਾਲਾ ਮਾਨਸੀ ਗੁਰਵ, 31 ਸਾਲਾ ਅਦਾਕਾਰਾ ਪ੍ਰਣੀਤਾ ਰਾਸਮ ਅਤੇ 25 ਸਾਲਾ ਸਾਵੰਤ ਵਜੋਂ ਹੋਈ ਹੈ।