71 ਸਾਲਾਂ ਬਾਅਦ ਗੋਬਿੰਦ ਸਾਗਰ ਝੀਲ ‘ਚ ਡੀਸਲਿਟਿੰਗ ਦੀ ਤਿਆਰੀ

ਕੇਂਦਰ ਸਰਕਾਰ ਨੇ 71 ਸਾਲਾਂ ਬਾਅਦ, ਵਿਸ਼ਵ ਪ੍ਰਸਿੱਧ ਭਾਖੜਾ ਡੈਮ ਦੇ ਪਿੱਛੇ ਸਥਿਤ ਗੋਬਿੰਦ ਸਾਗਰ ਝੀਲ ਦੀ ਗਾਰ ਕੱਢਣ ਦੀ ਯੋਜਨਾ ‘ਤੇ ਸਹਿਮਤੀ ਜਤਾਈ ਹੈ। ਜਲ ਸ਼ਕਤੀ ਮੰਤਰਾਲੇ ਨੇ ਇਸ ਕੰਮ ਲਈ 10 ਮੈਂਬਰੀ ਮਾਹਰ ਟੀਮ ਬਣਾਈ ਹੈ, ਜਿਸ ਵਿੱਚ ਭਾਖੜਾ ਬਿਆਸ ਪ੍ਰਬੰਧਨ ਬੋਰਡ (ਬੀਬੀਐਮਬੀ) ਦੇ ਮੁੱਖ ਇੰਜੀਨੀਅਰ ਸੀਪੀ ਸਿੰਘ ਸ਼ਾਮਲ ਹਨ। ਸੀਪੀ ਸਿੰਘ ਨੇ ਕਿਹਾ ਕਿ ਪਿਛਲੇ ਦੋ ਸਾਲਾਂ ਤੋਂ ਗੋਬਿੰਦ ਸਾਗਰ ਝੀਲ ਵਿੱਚ ਗਾਰ ਕੱਢਣ ਦਾ ਨਿਯਮਿਤ ਤੌਰ ‘ਤੇ ਮੁਲਾਂਕਣ ਕੀਤਾ ਜਾ ਰਿਹਾ ਹੈ, ਅਤੇ ਹੁਣ ਝੀਲ ਦਾ 25 ਪ੍ਰਤੀਸ਼ਤ ਗਾਰ ਨਾਲ ਭਰਿਆ ਹੋਇਆ ਹੈ। ਸਿਲਟ ਕਰ ਕੇ ਪਾਣੀ ਸਟੋਰ ਕਰਨ ਦੀ ਸਮਰੱਥਾ 19% ਘਟੀ ਹੈ, ਜੇਕਰ ਗਾਰ ਕੱਢਣ ਦਾ ਕੰਮ ਨਹੀਂ ਕੀਤਾ ਜਾਂਦਾ ਹੈ, ਤਾਂ ਇਸਦੀ ਸਟੋਰੇਜ ਸਮਰੱਥਾ ਹੋਰ ਵੀ ਘੱਟ ਸਕਦੀ ਹੈ।

BBMB ਪ੍ਰਬੰਧਨ ਨੇ ਇੱਕ ਡੀਸਿਲਟਿੰਗ ਨੀਤੀ ਤਿਆਰ ਕੀਤੀ ਸੀ, ਪਰ ਹਿਮਾਚਲ ‘ਚ ਡੀਸਿਲਟਿੰਗ ਨੀਤੀ ਨਾ ਹੋਣ ਕਾਰਨ ਡੀਸਿਲਟਿੰਗ ਟੈਂਡਰ ਜਾਰੀ ਨਹੀਂ ਕੀਤਾ ਜਾ ਸਕਿਆ। ਇਸ ਸਬੰਧ ‘ਚ, ਸਕੱਤਰ ਜਨਰਲ ਨੇ ਹਿਮਾਚਲ ਸਰਕਾਰ ਨਾਲ ਚਰਚਾ ਕੀਤੀ ਸੀ, ਜਿੱਥੇ ਇਹ ਕਿਹਾ ਗਿਆ ਸੀ ਕਿ ਭਾਖੜਾ ਡੈਮ ਦੇ ਪਿੱਛੇ ਵਿਸ਼ਾਲ ਗੋਬਿੰਦ ਸਾਗਰ ਝੀਲ ਨੂੰ ਡੀਸਿਲਟਿੰਗ ਕਰਨ ਨਾਲ ਨਾ ਸਿਰਫ਼ ਹਿਮਾਚਲ ਸਰਕਾਰ ਨੂੰ ਵਿੱਤੀ ਤੌਰ ‘ਤੇ ਫਾਇਦਾ ਹੋਵੇਗਾ, ਬਲਕਿ ਬੀਬੀਐਮਬੀ ਦੇ ਭਾਈਵਾਲ ਰਾਜਾਂ ਨੂੰ ਵੀ ਫਾਇਦਾ ਹੋਵੇਗਾ।

ਉਨ੍ਹਾਂ ਕਿਹਾ ਕਿ ਡੀਸਿਲਟਿੰਗ ਲਈ ਇੱਕ ਮਾਲੀਆ ਨੀਤੀ ਤਿਆਰ ਕੀਤੀ ਗਈ ਹੈ ਤੇ ਮੀਟਿੰਗ ‘ਚ ਪੇਸ਼ ਕੀਤੀ ਗਈ ਹੈ ਤੇ ਹਿਮਾਚਲ ਪ੍ਰਦੇਸ਼ ਦੇ ਸਕੱਤਰ ਜਨਰਲ ਨੇ ਭਰੋਸਾ ਦਿੱਤਾ ਹੈ ਕਿ ਹਿਮਾਚਲ ਵਿਧਾਨ ਸਭਾ ਦੇ ਅਗਲੇ ਸੈਸ਼ਨ ‘ਚ ਗੋਬਿੰਦ ਸਾਗਰ ਝੀਲ ਨੂੰ ਡੀਸਿਲਟਿੰਗ ਲਈ ਇੱਕ ਪ੍ਰਸਤਾਵ ਪੇਸ਼ ਕੀਤਾ ਜਾਵੇਗਾ।

ਡੀਸਿਲਟਿੰਗ ਲਈ ਇੱਕ ਨੀਤੀ ਤਿਆਰ ਕੀਤੀ ਜਾਵੇਗੀ ਤੇ ਜਿਵੇਂ ਹੀ ਉੱਥੋਂ ਫੈਸਲਾ ਲਿਆ ਜਾਵੇਗਾ, ਡੀਸਿਲਟਿੰਗ ਲਈ ਇੱਕ ਟੈਂਡਰ ਜਾਰੀ ਕੀਤਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਝੀਲ ‘ਚ ਗਾਰ ਦੀ ਸਮੱਸਿਆ ਸਿਰਫ਼ ਬੀਬੀਐਮਬੀ ਲਈ ਹੀ ਨਹੀਂ ਸਗੋਂ ਪੂਰੇ ਦੇਸ਼ ਲਈ ਇੱਕ ਸਮੱਸਿਆ ਹੈ ਤੇ ਇਸ ਸਮੱਸਿਆ ਨੂੰ ਹੱਲ ਕਰਨ ਲਈ ਯਤਨ ਜਾਰੀ ਹਨ।