ਅਮਰੀਕਾ ‘ਚ ਗ੍ਰੀਨ ਕਾਰਡ ਤੇ U-Visa ਲਈ 'ਫਰਜ਼ੀ ਲੁੱਟ' ਦੀ ਪਾਈ ਗੇਮ, ਪਰ ਇੰਝ ਹੋਇਆ ਭਾਂਡਾ ਫੋੜ, FBI ਨੇ 11 ਭਾਰਤੀਆਂ ਨੂੰ ਕੀਤਾ ਗ੍ਰਿਫ਼ਤਾਰ

ਅਮਰੀਕਾ ਵਿੱਚ ਗੈਰ-ਕਾਨੂੰਨੀ ਤਰੀਕੇ ਨਾਲ ਰਹਿ ਰਹੇ 11 ਭਾਰਤੀ ਨਾਗਰਿਕਾਂ 'ਤੇ ਵੀਜ਼ਾ ਧੋਖਾਧੜੀ ਅਤੇ ਸਾਜ਼ਿਸ਼ ਰਚਣ ਦੇ ਗੰਭੀਰ ਦੋਸ਼ ਲੱਗੇ ਹਨ, ਜਿਸ ਕਾਰਨ FBI ਨੇ ਉਨ੍ਹਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਅਮਰੀਕੀ ਸੰਘੀ ਇਸਤਗਾਸਾ (Prosecutors) ਅਨੁਸਾਰ, ਇਹਨਾਂ ਵਿਅਕਤੀਆਂ ਨੇ 'U-Visa' ਅਤੇ ਗ੍ਰੀਨ ਕਾਰਡ ਹਾਸਲ ਕਰਨ ਲਈ ਦੁਕਾਨਾਂ ਵਿੱਚ 'ਫਰਜ਼ੀ ਡਕੈਤੀਆਂ' (Staged Robberies) ਦੀ ਸਾਜ਼ਿਸ਼ ਰਚੀ ਸੀ। ਦਰਅਸਲ, ਅਮਰੀਕਾ ਵਿੱਚ 'U-Visa' ਉਨ੍ਹਾਂ ਲੋਕਾਂ ਨੂੰ ਦਿੱਤਾ ਜਾਂਦਾ ਹੈ ਜੋ ਕਿਸੇ ਗੰਭੀਰ ਅਪਰਾਧ ਦਾ ਸ਼ਿਕਾਰ ਹੋਏ ਹੋਣ ਅਤੇ ਜਾਂਚ ਵਿੱਚ ਮਦਦ ਕਰਦੇ ਹੋਣ। ਇਸੇ ਦਾ ਫ਼ਾਇਦਾ ਉਠਾਉਣ ਲਈ ਇਨ੍ਹਾਂ ਭਾਰਤੀਆਂ ਨੇ ਨਕਲੀ ਲੁੱਟ-ਖੋਹ ਦੇ ਡਰਾਮੇ ਰਚੇ ਤਾਂ ਜੋ ਉਹ ਵੀਜ਼ਾ ਪ੍ਰਾਪਤ ਕਰਨ ਲਈ ਯੋਗ ਬਣ ਸਕਣ।

11 Indians charged in US for staging "armed robberies" to secure U visasRead @ANI Story I https://t.co/OVXr8oRFV6#IndianNationals #UnitedStates #ArmedRobberies #UVisas pic.twitter.com/ac8CPGuzsF

— ANI Digital (@ani_digital) March 16, 2026

ਇੰਝ ਰਚੀ ਗਈ ਸਾਜ਼ਿਸ਼

ਦੋਸ਼ੀਆਂ ਨੇ ਅਮਰੀਕਾ ਦੇ ਵੱਖ-ਵੱਖ ਰਾਜਾਂ (ਮੈਸਾਚੁਸੇਟਸ, ਕੈਂਟਕੀ, ਓਹੀਓ) ਵਿੱਚ ਕਨਵੀਨੀਅੰਸ ਸਟੋਰਾਂ ਅਤੇ ਸ਼ਰਾਬ ਦੀਆਂ ਦੁਕਾਨਾਂ 'ਤੇ ਫਰਜ਼ੀ ਹਥਿਆਰਬੰਦ ਡਕੈਤੀਆਂ ਕਰਵਾਈਆਂ ਸਨ। ਇਸ ਦਾ ਮੁੱਖ ਮਕਸਦ ਸਟੋਰ 'ਤੇ ਮੌਜੂਦ ਕਲਰਕਾਂ ਨੂੰ ਖੁਦ ਨੂੰ 'ਹਿੰਸਕ ਅਪਰਾਧ ਦਾ ਸ਼ਿਕਾਰ' (Crime Victim) ਦਿਖਾਉਣ ਦਾ ਮੌਕਾ ਦੇਣਾ ਸੀ। ਅਮਰੀਕੀ ਕਾਨੂੰਨ ਅਨੁਸਾਰ, 'U-Visa' ਉਨ੍ਹਾਂ ਲੋਕਾਂ ਨੂੰ ਦਿੱਤਾ ਜਾਂਦਾ ਹੈ ਜੋ ਕਿਸੇ ਅਪਰਾਧ ਦਾ ਸ਼ਿਕਾਰ ਹੋਏ ਹੋਣ ਅਤੇ ਜਾਂਚ ਵਿੱਚ ਪੁਲਿਸ ਦੀ ਮਦਦ ਕਰਨ। ਇਹ ਵੀਜ਼ਾ ਅੱਗੇ ਚੱਲ ਕੇ ਅਮਰੀਕਾ ਵਿੱਚ ਪੱਕੇ ਹੋਣ ਯਾਨੀ ਗ੍ਰੀਨ ਕਾਰਡ ਪਾਉਣ ਦਾ ਰਸਤਾ ਸਾਫ਼ ਕਰ ਦਿੰਦਾ ਹੈ।

ਚਾਰਜਸ਼ੀਟ ਦੇ ਮੁਤਾਬਕ, ਇਹ ਲੋਕ ਸਾਰੀ 'ਵਾਰਦਾਤ' ਨੂੰ ਸੀਸੀਟੀਵੀ (CCTV) ਵਿੱਚ ਕੈਦ ਕਰਵਾਉਂਦੇ ਸਨ। ਡਕੈਤੀ ਦੇ ਦੌਰਾਨ ਇੱਕ ਫਰਜ਼ੀ 'ਲੁਟੇਰਾ' ਦੁਕਾਨ ਦੇ ਅੰਦਰ ਦਾਖ਼ਲ ਹੁੰਦਾ ਸੀ ਅਤੇ ਕਲਰਕ ਜਾਂ ਮਾਲਕ ਨੂੰ ਹਥਿਆਰ ਦਿਖਾ ਕੇ ਡਰਾਉਂਦਾ-ਧਮਕਾਉਂਦਾ ਸੀ। ਇਸ ਤੋਂ ਬਾਅਦ ਉਹ ਕੈਸ਼ ਰਜਿਸਟਰ ਵਿੱਚੋਂ ਪੈਸੇ ਲੈ ਕੇ ਫ਼ਰਾਰ ਹੋ ਜਾਂਦਾ ਸੀ। ਇਹ ਸਾਰਾ ਡਰਾਮਾ ਸਿਰਫ਼ ਇਸ ਲਈ ਰਚਿਆ ਜਾਂਦਾ ਸੀ ਤਾਂ ਜੋ ਪੂਰੀ ਘਟਨਾ ਸਟੋਰ ਦੇ ਸੀਸੀਟੀਵੀ ਕੈਮਰਿਆਂ ਵਿੱਚ ਰਿਕਾਰਡ ਹੋ ਜਾਵੇ ਅਤੇ ਬਾਅਦ ਵਿੱਚ ਇਸ ਨੂੰ ਪੁਲਿਸ ਕੋਲ ਸਬੂਤ ਵਜੋਂ ਪੇਸ਼ ਕਰਕੇ ਵੀਜ਼ਾ ਹਾਸਲ ਕੀਤਾ ਜਾ ਸਕੇ।

ਲੁਟੇਰੇ ਦੇ ਭੱਜਣ ਦੇ ਕਰੀਬ 5-10 ਮਿੰਟ ਬਾਅਦ ਪੁਲਿਸ ਨੂੰ ਫ਼ੋਨ ਕੀਤਾ ਜਾਂਦਾ ਸੀ। ਇਸ ਪੂਰੀ ਸੈਟਿੰਗ ਲਈ 'ਪੀੜਤਾਂ' ਨੇ ਮੁੱਖ ਮਾਸਟਰਮਾਈਂਡ ਨੂੰ ਪੈਸੇ ਦਿੱਤੇ ਸਨ, ਜਿਸ ਨੇ ਬਦਲੇ ਵਿੱਚ ਸਟੋਰ ਮਾਲਕਾਂ ਨੂੰ ਵੀ ਉਨ੍ਹਾਂ ਦਾ ਹਿੱਸਾ ਦਿੱਤਾ ਸੀ। ਇਹ ਸਾਰਾ ਸਿਲਸਿਲਾ ਇਸ ਤਰ੍ਹਾਂ ਬਣਾਇਆ ਗਿਆ ਸੀ ਤਾਂ ਜੋ ਪੁਲਿਸ ਰਿਕਾਰਡ ਵਿੱਚ ਇਸ ਨੂੰ ਇੱਕ ਅਸਲੀ ਵਾਰਦਾਤ ਮੰਨਿਆ ਜਾਵੇ ਅਤੇ ਉਸ ਦੇ ਆਧਾਰ 'ਤੇ ਵੀਜ਼ਾ ਪ੍ਰਾਪਤ ਕਰਨ ਦੀ ਕਾਰਵਾਈ ਅੱਗੇ ਵਧਾਈ ਜਾ ਸਕੇ।

ਇਹ ਲੋਕ ਕੀਤੇ ਗਏ ਕਾਬੂ

ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮਾਂ ਵਿੱਚ ਜਤਿੰਦਰ ਕੁਮਾਰ ਪਟੇਲ (39), ਮਹੇਸ਼ ਕੁਮਾਰ ਪਟੇਲ (36), ਸੰਜੇ ਕੁਮਾਰ ਪਟੇਲ (45), ਦੀਪਿਕਾ ਬੇਨ ਪਟੇਲ (40), ਰਮੇਸ਼ ਭਾਈ ਪਟੇਲ (52), ਅਮਿਤਾਭ ਬੇਨ ਪਟੇਲ (43), ਰੌਣਕ ਕੁਮਾਰ ਪਟੇਲ (28), ਸੰਗੀਤਾ ਬੇਨ ਪਟੇਲ (36), ਮਿੰਕੇਸ਼ ਪਟੇਲ (42), ਸੋਨਲ ਪਟੇਲ (42) ਅਤੇ ਮਿਤੁਲ ਪਟੇਲ (40) ਸ਼ਾਮਲ ਹਨ। ਇਨ੍ਹਾਂ ਵਿੱਚੋਂ ਕੁਝ ਨੂੰ ਮੈਸਾਚੁਸੇਟਸ, ਓਹੀਓ ਅਤੇ ਕੈਂਟਕੀ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਵੀਜ਼ਾ ਧੋਖਾਧੜੀ ਦੀ ਸਾਜ਼ਿਸ਼ ਰਚਣ ਦੇ ਦੋਸ਼ ਵਿੱਚ ਇਨ੍ਹਾਂ ਨੂੰ 5 ਸਾਲ ਤੱਕ ਦੀ ਕੈਦ ਅਤੇ 2,50,000 ਅਮਰੀਕੀ ਡਾਲਰ (ਲਗਭਗ 2 ਕਰੋੜ ਰੁਪਏ ਤੋਂ ਵੱਧ) ਦੇ ਜੁਰਮਾਨੇ ਦੀ ਸਜ਼ਾ ਹੋ ਸਕਦੀ ਹੈ।