ਨੀਟ ਪ੍ਰੀਖਿਆ 'ਚ NTA ਦੀ ਵੱਡੀ ਗਲਤੀ: ਵਿਦਿਆਰਥੀ ਦਾ ਸੈਂਟਰ ਦੇਸ਼ ਤੋਂ ਬਾਹਰ ਅਬੂ ਧਾਬੀ...ਪੇਪਰ ਦੇਣ ਵਾਲਿਆਂ ਦੇ ਵੀ ਉੱਡੇ ਹੋਸ਼

ਪੇਪਰ ਲੀਕ ਦੀ ਘਟਨਾ ਤੋਂ ਬਾਅਦ ਨੀਟ (NEET-2026) ਦੀ ਦੁਬਾਰਾ ਪ੍ਰੀਖਿਆ ਐਤਵਾਰ (21 ਜੂਨ) ਨੂੰ ਕਰਵਾਈ ਜਾ ਰਹੀ ਹੈ, ਜਿਸ ਵਿੱਚ ਦੇਸ਼ ਭਰ ਦੇ 22 ਲੱਖ ਵਿਦਿਆਰਥੀ ਹਿੱਸਾ ਲੈਣਗੇ। ਹਾਲਾਂਕਿ, ਪ੍ਰੀਖਿਆ ਤੋਂ ਪਹਿਲਾਂ ਨੈਸ਼ਨਲ ਟੈਸਟਿੰਗ ਏਜੰਸੀ (ਐਨ.ਟੀ.ਏ.) ਦੀ ਇੱਕ ਵੱਡੀ ਲਾਪਰਵਾਹੀ ਸਾਹਮਣੇ ਆਈ ਹੈ। ਨਵੇਂ ਜਾਰੀ ਕੀਤੇ ਗਏ ਐਡਮਿਟ ਕਾਰਡਾਂ ਵਿੱਚ ਨਾਗਪੁਰ ਦੇ ਇੱਕ ਵਿਦਿਆਰਥੀ, ਅਬਦੁੱਲਾ, ਨੂੰ ਪ੍ਰੀਖਿਆ ਕੇਂਦਰ ਵਜੋਂ ਅਬੂ ਧਾਬੀ (ਦੁਬਈ) ਦਿੱਤਾ ਗਿਆ ਹੈ, ਜਿਸ ਨੂੰ ਲੈ ਕੇ ਕਈ ਸਵਾਲ ਖੜ੍ਹੇ ਹੋ ਰਹੇ ਹਨ।

ਵਿਦਿਆਰਥੀ ਦੇ ਪਿਤਾ, ਡਾ. ਮੁਹੰਮਦ ਤਾਲਿਬ ਨੇ ਸਵਾਲ ਚੁੱਕਿਆ ਹੈ ਕਿ ਜਿਸ ਵਿਦਿਆਰਥੀ ਨੇ 3 ਮਈ ਨੂੰ ਹੋਈ ਅਸਲ ਨੀਟ ਪ੍ਰੀਖਿਆ ਨਾਗਪੁਰ ਵਿੱਚ ਦਿੱਤੀ ਸੀ, ਉਸ ਨੂੰ ਐਤਵਾਰ (21 ਜੂਨ) ਨੂੰ ਹੋਣ ਵਾਲੀ ਮੁੜ-ਪ੍ਰੀਖਿਆ ਲਈ ਅਬੂ ਧਾਬੀ ਵਿੱਚ ਕੇਂਦਰ ਕਿਵੇਂ ਦਿੱਤਾ ਜਾ ਸਕਦਾ ਹੈ? ਇਸ ਦੇ ਨਾਲ ਹੀ ਪਿਤਾ ਨੇ ਚਿੰਤਾ ਪ੍ਰਗਟਾਈ ਹੈ ਕਿ ਇਸ ਗਲਤੀ ਕਾਰਨ ਉਨ੍ਹਾਂ ਦੇ ਬੇਟੇ ਦਾ ਪੂਰਾ ਸਾਲ ਬਰਬਾਦ ਹੋ ਸਕਦਾ ਹੈ।

ਨਾਗਪੁਰ ਵਿੱਚ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਡਾ. ਤਾਲਿਬ ਨੇ ਦੱਸਿਆ ਕਿ ਉਹ 14 ਜੂਨ ਤੋਂ ਲਗਾਤਾਰ ਐਡਮਿਟ ਕਾਰਡ ਡਾਊਨਲੋਡ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਸਨ, ਪਰ ਤਕਨੀਕੀ ਕਾਰਨਾਂ ਕਰਕੇ ਉਹ ਡਾਊਨਲੋਡ ਨਹੀਂ ਹੋ ਰਿਹਾ ਸੀ। ਜਦੋਂ ਸ਼ੁੱਕਰਵਾਰ (19 ਜੂਨ) ਨੂੰ ਐਡਮਿਟ ਕਾਰਡ ਡਾਊਨਲੋਡ ਹੋਇਆ ਅਤੇ ਉਨ੍ਹਾਂ ਨੇ ਪ੍ਰੀਖਿਆ ਕੇਂਦਰ 'ਅਬੂ ਧਾਬੀ' ਦੇਖਿਆ, ਤਾਂ ਉਨ੍ਹਾਂ ਨੇ ਤੁਰੰਤ NTA ਦੀ ਹੈਲਪਲਾਈਨ 'ਤੇ ਸੰਪਰਕ ਕੀਤਾ। ਡਾ. ਤਾਲਿਬ ਨੇ ਦੱਸਿਆ ਕਿ NTA ਅਧਿਕਾਰੀਆਂ ਦੇ ਨਿਰਦੇਸ਼ਾਂ ਅਨੁਸਾਰ ਉਨ੍ਹਾਂ ਨੇ ਪ੍ਰੀਖਿਆ ਕੇਂਦਰ ਬਦਲਣ ਲਈ ਈ-ਮੇਲ ਵੀ ਭੇਜ ਦਿੱਤੀ ਹੈ।

NTA ਦੀ ਵੱਡੀ ਲਾਪਰਵਾਹੀ ਕਰਕੇ ਬਰਬਾਦ ਹੋ ਸਕਦਾ ਵਿਦਿਆਰਥੀ ਦਾ ਇੱਕ ਸਾਲ

ਅਧਿਕਾਰੀਆਂ ਨੇ ਭਰੋਸਾ ਦਿੱਤਾ ਹੈ ਕਿ ਸ਼ਨੀਵਾਰ (20 ਜੂਨ) ਸ਼ਾਮ 4 ਵਜੇ ਤੱਕ ਪ੍ਰੀਖਿਆ ਕੇਂਦਰ ਬਦਲ ਕੇ ਨਾਗਪੁਰ ਕਰ ਦਿੱਤਾ ਜਾਵੇਗਾ। ਇਸ ਲਈ ਡਾ. ਤਾਲਿਬ ਨੇ ਉਮੀਦ ਜਤਾਈ ਹੈ ਕਿ NTA ਆਪਣੇ ਵਾਅਦੇ ਨੂੰ ਨਿਭਾਏਗਾ। ਹੈਰਾਨੀਜਨਕ ਗੱਲ ਇਹ ਹੈ ਕਿ ਅਬਦੁੱਲਾ ਕੋਲ ਫਿਲਹਾਲ ਪਾਸਪੋਰਟ ਵੀ ਨਹੀਂ ਹੈ। ਅਜਿਹੀ ਸਥਿਤੀ ਵਿੱਚ, ਜੇਕਰ NTA ਨੇ ਉਸਦਾ ਪ੍ਰੀਖਿਆ ਕੇਂਦਰ ਨਹੀਂ ਬਦਲਿਆ, ਤਾਂ ਉਹ ਪ੍ਰੀਖਿਆ ਵਿੱਚ ਸ਼ਾਮਲ ਨਹੀਂ ਹੋ ਸਕੇਗਾ ਅਤੇ ਉਸਦਾ ਇੱਕ ਸਾਲ ਬਰਬਾਦ ਹੋ ਜਾਵੇਗਾ।

ਨੀਟ (NEET) ਪੇਪਰ ਲੀਕ ਦੇ ਦੋਸ਼ਾਂ ਤੋਂ ਬਾਅਦ, ਮੈਡੀਕਲ ਕੋਰਸਾਂ ਵਿੱਚ ਦਾਖਲੇ ਲਈ ਐਤਵਾਰ ਨੂੰ ਮੁੜ-ਪ੍ਰੀਖਿਆ (Re-exam) ਕਰਵਾਈ ਜਾ ਰਹੀ ਹੈ। ਇਸ ਪ੍ਰੀਖਿਆ ਲਈ ਐਨ.ਟੀ.ਏ. (NTA) ਵੱਲੋਂ ਸਾਰੇ ਵਿਦਿਆਰਥੀਆਂ ਨੂੰ ਨਵੇਂ ਐਡਮਿਟ ਕਾਰਡ ਜਾਰੀ ਕੀਤੇ ਗਏ ਹਨ। ਇਸ ਪੂਰੇ ਮਾਮਲੇ ਦੀ ਗੜਬੜੀ ਇਹ ਹੈ ਕਿ ਨਾਗਪੁਰ ਦੇ ਵਿਦਿਆਰਥੀ ਅਬਦੁੱਲਾ ਨੇ ਆਪਣੀ ਪ੍ਰੀਖਿਆ ਲਈ ਨਾਗਪੁਰ, ਵਰਧਾ ਜਾਂ ਭੰਡਾਰਾ ਵਿੱਚੋਂ ਕਿਸੇ ਇੱਕ ਸ਼ਹਿਰ ਨੂੰ ਕੇਂਦਰ ਵਜੋਂ ਚੁਣਿਆ ਸੀ, ਪਰ ਐਨ.ਟੀ.ਏ. ਵੱਲੋਂ ਉਸ ਨੂੰ ਪ੍ਰੀਖਿਆ ਕੇਂਦਰ ਵਜੋਂ ਸੰਯੁਕਤ ਅਰਬ ਅਮੀਰਾਤ (UAE) ਦਾ ਅਬੂ ਧਾਬੀ ਸ਼ਹਿਰ ਅਲਾਟ ਕਰ ਦਿੱਤਾ ਗਿਆ ਹੈ।

ਵਿਦਿਆਰਥੀ ਅਤੇ ਉਸਦੇ ਮਾਪਿਆਂ ਨੇ ਇਸ ਸਬੰਧ ਵਿੱਚ NTA ਦੀ ਹੈਲਪਲਾਈਨ 'ਤੇ ਸ਼ਿਕਾਇਤ ਦਰਜ ਕਰਵਾ ਕੇ ਪ੍ਰੀਖਿਆ ਕੇਂਦਰ ਬਦਲਣ ਦੀ ਮੰਗ ਕੀਤੀ ਹੈ। ਜੇਕਰ ਪ੍ਰੀਖਿਆ ਕੇਂਦਰ ਨਹੀਂ ਬਦਲਿਆ ਜਾਂਦਾ, ਤਾਂ ਅਬਦੁੱਲਾ ਦੇ ਮੁੜ-ਪ੍ਰੀਖਿਆ ਤੋਂ ਵਾਂਝੇ ਰਹਿਣ ਦਾ ਖਦਸ਼ਾ ਹੈ। ਫਿਲਹਾਲ, ਇਸ ਮਾਮਲੇ 'ਤੇ NTA ਵੱਲੋਂ ਕੇਂਦਰ ਬਦਲਣ ਦਾ ਭਰੋਸਾ ਦਿੱਤਾ ਗਿਆ ਹੈ।