ਕੇਂਦਰ ਸਰਕਾਰ ਵੱਲੋਂ ਅਗਨੀਵੀਰਾਂ ਨੂੰ ਦਿਵਾਲੀ ਦਾ ਤੋਹਫ਼ਾ! ਹੁਣ 4 ਦੀ ਬਜਾਏ 6 ਸਾਲ ਕਰ ਸਕਣਗੇ ਨੌਕਰੀ, 25% ਨੂੰ ਪੱਕਾ ਕਰਨ ਦਾ ਨਿਯਮ ਰਹੇਗਾ ਜਾਰੀ

ਅਗਨੀਵੀਰਾਂ ਲਈ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਹੁਣ ਅਗਨੀਵੀਰ ਚਾਰ ਸਾਲ ਦੀ ਬਜਾਏ ਛੇ ਸਾਲ ਤੱਕ ਫੌਜ ਵਿੱਚ ਨੌਕਰੀ ਕਰ ਸਕਣਗੇ। ਚੀਫ਼ ਆਫ਼ ਡਿਫੈਂਸ ਸਟਾਫ਼ ਜਨਰਲ ਐਨਐਸ ਰਾਜਾ ਸੁਬ੍ਰਮਣੀ ਨੇ ਬੁੱਧਵਾਰ ਨੂੰ ਅਗਨੀਵੀਰਾਂ ਦੇ ਸੇਵਾ ਕਾਲ ਵਿੱਚ ਦੋ ਸਾਲ ਦਾ ਵਾਧਾ ਕਰਨ ਦਾ ਐਲਾਨ ਕੀਤਾ ਹੈ। ਇਸ ਫੈਸਲੇ ਨਾਲ ਉਨ੍ਹਾਂ 75 ਫ਼ੀਸਦੀ ਅਗਨੀਵੀਰਾਂ ਨੂੰ ਫਾਇਦਾ ਮਿਲੇਗਾ, ਜਿਨ੍ਹਾਂ ਨੂੰ ਪਹਿਲਾਂ ਚਾਰ ਸਾਲ ਦੀ ਸੇਵਾ ਪੂਰੀ ਹੋਣ ਤੋਂ ਬਾਅਦ ਫੌਜ ਛੱਡਣੀ ਪੈਂਦੀ ਸੀ।

ਣ ਤੱਕ ਹਰ ਬੈਚ ਦੇ 25 ਫ਼ੀਸਦੀ ਅਗਨੀਵੀਰਾਂ ਨੂੰ ਚਾਰ ਸਾਲ ਦੀ ਸੇਵਾ ਤੋਂ ਬਾਅਦ ਮੈਰਿਟ ਦੇ ਆਧਾਰ 'ਤੇ ਨਿਯਮਤ ਫੌਜ ਵਿੱਚ ਸ਼ਾਮਲ ਕੀਤਾ ਜਾਂਦਾ ਸੀ, ਜਦਕਿ ਬਾਕੀ 75 ਫ਼ੀਸਦੀ ਨੂੰ ਸੇਵਾ ਤੋਂ ਬਾਹਰ ਕਰ ਦਿੱਤਾ ਜਾਂਦਾ ਸੀ। ਨਵੇਂ ਨਿਯਮ ਤਹਿਤ 25 ਫ਼ੀਸਦੀ ਅਗਨੀਵੀਰਾਂ ਨੂੰ ਪੱਕਾ ਕਰਨ ਦੀ ਪੁਰਾਣੀ ਵਿਵਸਥਾ ਜਾਰੀ ਰਹੇਗੀ। ਇਸ ਤੋਂ ਇਲਾਵਾ ਬਾਕੀ 75 ਫ਼ੀਸਦੀ ਅਗਨੀਵੀਰਾਂ ਨੂੰ ਉਨ੍ਹਾਂ ਦੀ ਸਹਿਮਤੀ ਨਾਲ ਦੋ ਸਾਲ ਹੋਰ ਨੌਕਰੀ ਕਰਨ ਦਾ ਮੌਕਾ ਮਿਲੇਗਾ। ਇਸ ਵਾਧੂ ਸਮੇਂ ਦੌਰਾਨ ਉਨ੍ਹਾਂ ਨੂੰ ਵਧੀ ਹੋਈ ਤਨਖਾਹ ਅਤੇ ਭੱਤੇ ਵੀ ਦਿੱਤੇ ਜਾਣਗੇ।

ਛੇ ਸਾਲ ਦੀ ਸੇਵਾ ਪੂਰੀ ਹੋਣ ਤੋਂ ਬਾਅਦ ਵੀ ਜਿਹੜੇ ਅਗਨੀਵੀਰ ਫੌਜ ਵਿੱਚ ਨੌਕਰੀ ਜਾਰੀ ਰੱਖਣਾ ਚਾਹੁਣਗੇ, ਉਨ੍ਹਾਂ ਨੂੰ ਚੋਣ ਪ੍ਰਕਿਰਿਆ ਵਿੱਚੋਂ ਲੰਘਣਾ ਪਵੇਗਾ। ਫਿਲਹਾਲ ਤਿੰਨਾਂ ਸੈਨਾਵਾਂ ਵਿੱਚ ਕਰੀਬ 3.18 ਲੱਖ ਅਗਨੀਵੀਰ ਸੇਵਾ ਨਿਭਾਅ ਰਹੇ ਹਨ।

ਦਸੰਬਰ ਤੱਕ 18,300 ਅਗਨੀਵੀਰਾਂ ਦਾ ਕਾਰਜਕਾਲ ਹੋਣਾ ਸੀ ਪੂਰਾ

ਅੰਕੜਿਆਂ ਮੁਤਾਬਕ 31 ਦਸੰਬਰ ਤੱਕ ਪਹਿਲੇ ਬੈਚ ਦੇ ਕਰੀਬ 18,300 ਅਗਨੀਵੀਰਾਂ ਦੇ ਚਾਰ ਸਾਲ ਪੂਰੇ ਹੋਣ ਵਾਲੇ ਸਨ। ਇਹ ਪਹਿਲੇ ਬੈਚ ਵਿੱਚ ਭਰਤੀ ਹੋਏ ਕੁੱਲ 24,400 ਅਗਨੀਵੀਰਾਂ ਦਾ ਲਗਭਗ 75 ਫ਼ੀਸਦੀ ਹਿੱਸਾ ਹਨ। ਪੁਰਾਣੀ ਯੋਜਨਾ ਮੁਤਾਬਕ ਨਵੰਬਰ ਦੇ ਮੱਧ ਤੋਂ ਇਨ੍ਹਾਂ ਅਗਨੀਵੀਰਾਂ ਨੂੰ ਪੜਾਅਵਾਰ ਤਰੀਕੇ ਨਾਲ ਸੇਵਾ ਤੋਂ ਬਾਹਰ ਕੀਤਾ ਜਾਣਾ ਸੀ। ਪਰ ਨਵੇਂ ਫੈਸਲੇ ਨਾਲ ਹੁਣ ਇਨ੍ਹਾਂ ਨੂੰ ਦੋ ਸਾਲ ਹੋਰ ਨੌਕਰੀ ਕਰਨ ਦਾ ਮੌਕਾ ਮਿਲੇਗਾ। ਇਹ ਵਾਧਾ ਅਗਨੀਵੀਰਾਂ ਦੀ ਸਹਿਮਤੀ ਨਾਲ ਹੀ ਹੋਵੇਗਾ।

ਹਵਾਈ ਫੌਜ ਨੇ 712 ਅਗਨੀਵੀਰਾਂ ਨੂੰ ਕੀਤਾ ਪੱਕਾ

ਪਿਛਲੇ ਮਹੀਨੇ ਭਾਰਤੀ ਹਵਾਈ ਫੌਜ ਨੇ ਆਪਣੇ ਪਹਿਲੇ ਅਗਨੀਵੀਰ ਵਾਯੂ ਬੈਚ ਦੇ 2,850 ਭਰਤੀ ਨੌਜਵਾਨਾਂ ਵਿੱਚੋਂ 712 ਨੂੰ ਨਿਯਮਤ ਸੇਵਾ ਵਿੱਚ ਰੱਖਣ ਦਾ ਫੈਸਲਾ ਕੀਤਾ ਸੀ। ਇਨ੍ਹਾਂ ਨੂੰ ਮੈਰਿਟ ਅਤੇ ਨਿਰਧਾਰਤ ਪ੍ਰਕਿਰਿਆ ਦੇ ਆਧਾਰ 'ਤੇ ਪੱਕੀ ਸੇਵਾ ਦਾ ਮੌਕਾ ਦਿੱਤਾ ਗਿਆ।

ਅਗਨੀਵੀਰ ਭਰਤੀ: ਉਮਰ, ਯੋਗਤਾ ਅਤੇ ਚੋਣ ਪ੍ਰਕਿਰਿਆ

ਅਗਨੀਪਥ ਯੋਜਨਾ ਦੀ ਸ਼ੁਰੂਆਤ 14 ਜੂਨ 2022 ਨੂੰ ਕੀਤੀ ਗਈ ਸੀ। ਇਸ ਯੋਜਨਾ ਤਹਿਤ ਥਲ ਸੈਨਾ, ਜਲ ਸੈਨਾ ਅਤੇ ਹਵਾਈ ਫੌਜ ਵਿੱਚ ਚਾਰ ਸਾਲਾਂ ਲਈ ਅਗਨੀਵੀਰਾਂ ਦੀ ਭਰਤੀ ਕੀਤੀ ਜਾਂਦੀ ਹੈ। ਤਿੰਨਾਂ ਸੈਨਾਵਾਂ ਵਿੱਚ ਭਰਤੀ ਦੀ ਪ੍ਰਕਿਰਿਆ ਅਤੇ ਯੋਗਤਾ ਵੱਖ-ਵੱਖ ਹੁੰਦੀ ਹੈ।

ਅਗਨੀਵੀਰਾਂ ਦੀ ਮਹੀਨਾਵਾਰ ਤਨਖਾਹ (Salary Package) ਦਾ ਵੇਰਵਾ ਸੇਵਾ ਦੇ ਸਾਲ ਅਨੁਸਾਰ ਤੈਅ ਕੀਤਾ ਗਿਆ ਹੈ। ਇਸ ਵਿੱਚ ਪਹਿਲੇ ਸਾਲ ਅਗਨੀਵੀਰਾਂ ਨੂੰ ₹30,000 ਮਹੀਨਾਵਾਰ ਪੈਕੇਜ ਮਿਲਦਾ ਹੈ। ਦੂਜੇ ਸਾਲ ਇਹ ਵਧ ਕੇ ₹33,000 ਮਹੀਨਾ ਹੋ ਜਾਂਦਾ ਹੈ। ਤੀਜੇ ਸਾਲ ਵਿੱਚ ਅਗਨੀਵੀਰਾਂ ਨੂੰ ₹36,500 ਮਹੀਨਾਵਾਰ ਦਿੱਤੇ ਜਾਂਦੇ ਹਨ, ਜਦੋਂ ਕਿ ਚੌਥੇ ਸਾਲ ਵਿੱਚ ਇਹ ਮਹੀਨਾਵਾਰ ਪੈਕੇਜ ₹40,000 ਤੱਕ ਪਹੁੰਚ ਜਾਂਦਾ ਹੈ।

1. ਅਗਨੀਵੀਰ ਭਰਤੀ ਲਈ ਉਮਰ ਕਿੰਨੀ ਹੋਣੀ ਚਾਹੀਦੀ ਹੈ?

ਅਗਨੀਵੀਰ ਭਰਤੀ ਲਈ ਘੱਟੋ-ਘੱਟ ਉਮਰ 17 ਸਾਲ 6 ਮਹੀਨੇ ਹੋਣੀ ਚਾਹੀਦੀ ਹੈ। ਵੱਧ ਤੋਂ ਵੱਧ ਉਮਰ ਆਮ ਤੌਰ 'ਤੇ ਥਲ ਸੈਨਾ ਲਈ 22 ਸਾਲ ਅਤੇ ਜਲ ਸੈਨਾ ਤੇ ਹਵਾਈ ਫੌਜ ਲਈ 21 ਸਾਲ ਹੁੰਦੀ ਹੈ। ਹਾਲਾਂਕਿ, ਉਮਰ ਦੀ ਅੰਤਿਮ ਹੱਦ ਸਬੰਧਤ ਭਰਤੀ ਦੇ ਨੋਟੀਫਿਕੇਸ਼ਨ ਅਨੁਸਾਰ ਤੈਅ ਕੀਤੀ ਜਾਂਦੀ ਹੈ।

2. ਅਗਨੀਵੀਰ ਬਣਨ ਲਈ ਕਿੰਨੀ ਪੜ੍ਹਾਈ ਜ਼ਰੂਰੀ ਹੈ?

ਅਹੁਦੇ ਦੇ ਹਿਸਾਬ ਨਾਲ ਉਮੀਦਵਾਰ ਦਾ 8ਵੀਂ, 10ਵੀਂ ਜਾਂ 12ਵੀਂ ਪਾਸ ਹੋਣਾ ਜ਼ਰੂਰੀ ਹੈ। ਜਨਰਲ ਡਿਊਟੀ (GD) ਅਤੇ ਜਲ ਸੈਨਾ ਦੇ MR ਅਹੁਦਿਆਂ ਲਈ ਆਮ ਤੌਰ 'ਤੇ 10ਵੀਂ ਪਾਸ ਹੋਣਾ ਲਾਜ਼ਮੀ ਹੈ। ਜਦਕਿ ਟੈਕਨੀਕਲ, ਕਲਰਕ, SSR ਅਤੇ ਹਵਾਈ ਫੌਜ ਦੇ ਕਈ ਅਹੁਦਿਆਂ ਲਈ 12ਵੀਂ ਪਾਸ ਹੋਣਾ ਜ਼ਰੂਰੀ ਹੈ।