ਗੁਰੂਗ੍ਰਾਮ 'ਚ ਸੋਗ ਦੀ ਲਹਿਰ: ਅਸਾਮ 'ਚ ਸੁਖੋਈ ਕਰੈਸ਼ ਦੌਰਾਨ ਸਕੁਐਡਰਨ ਲੀਡਰ ਅਨੁਜ ਵਸ਼ਿਸ਼ਠ ਦੀ ਮੌਤ, ਵਿਆਹ ਵਾਲੇ ਘਰ ਪਏ ਵੈਣ

ਅਸਾਮ ਵਿੱਚ ਹਵਾਈ ਸੈਨਾ ਦੇ ਸੁਖੋਈ-30 ਲੜਾਕੂ ਜਹਾਜ਼ ਦੇ ਕਰੈਸ਼ ਹੋਣ ਕਾਰਨ ਗੁਰੂਗ੍ਰਾਮ ਦੇ ਸੈਕਟਰ-22 ਦੇ ਰਹਿਣ ਵਾਲੇ ਸਕੁਐਡਰਨ ਲੀਡਰ ਅਨੁਜ ਵਸ਼ਿਸ਼ਠ ਦੀ ਮੌਤ ਹੋ ਗਈ। ਉਹਨਾਂ ਦੇ ਘਰ ਵਿੱਚ ਵਿਆਹ ਦੀਆਂ ਤਿਆਰੀਆਂ ਚੱਲ ਰਹੀਆਂ ਸਨ, ਪਰ ਹਾਦਸੇ ਦੀ ਖ਼ਬਰ ਮਿਲਦਿਆਂ ਹੀ ਖ਼ੁਸ਼ੀਆਂ ਦਾ ਮਾਹੌਲ ਮਾਤਮ ਵਿੱਚ ਬਦਲ ਗਿਆ।

ਜ਼ਿਕਰਯੋਗ ਹੈ ਕਿ ਵੀਰਵਾਰ ਸ਼ਾਮ ਨੂੰ ਹਵਾਈ ਸੈਨਾ ਦੇ ਇੱਕ ਸੁਖੋਈ ਜਹਾਜ਼ ਦਾ ਸੰਪਰਕ ਟੁੱਟ ਗਿਆ ਸੀ। ਜਹਾਜ਼ ਦੇ ਲਾਪਤਾ ਹੋਣ ਤੋਂ ਬਾਅਦ ਇਸ ਦੇ ਦੁਰਘਟਨਾਗ੍ਰਸਤ ਹੋਣ ਦੀ ਗੱਲ ਸਾਹਮਣੇ ਆਈ। ਇਸ ਹਾਦਸੇ ਵਿੱਚ ਸੁਖੋਈ 'ਤੇ ਸਵਾਰ ਦੋਵੇਂ ਪਾਇਲਟਾਂ ਦੀ ਮੌਤ ਹੋ ਗਈ, ਜਿਨ੍ਹਾਂ ਵਿੱਚ ਹਰਿਆਣਾ ਦੇ ਗੁਰੂਗ੍ਰਾਮ ਦੇ ਰਹਿਣ ਵਾਲੇ ਅਨੁਜ ਵਸ਼ਿਸ਼ਠ ਵੀ ਸ਼ਾਮਲ ਸਨ।

ਕੁਝ ਹੀ ਦੇਰ ਵਿੱਚ ਟੁੱਟ ਗਿਆ ਸੀ ਸੰਪਰਕ

ਹਵਾਈ ਸੈਨਾ ਦਾ ਸੁਖੋਈ ਜਹਾਜ਼ ਅਸਾਮ ਦੇ ਕਾਰਬੀ ਆਂਗਲੋਂਗ ਜ਼ਿਲ੍ਹੇ ਦੇ ਇੱਕ ਦੂਰ-ਦੁਰਾਡੇ ਪਹਾੜੀ ਇਲਾਕੇ ਵਿੱਚ ਕਰੈਸ਼ ਹੋ ਗਿਆ। ਇਸ ਫਾਈਟਰ ਜੈੱਟ ਨੇ ਜੋਰਹਾਟ ਏਅਰਬੇਸ ਤੋਂ ਇੱਕ ਨਿਯਮਤ ਟ੍ਰੇਨਿੰਗ ਮਿਸ਼ਨ ਲਈ ਉਡਾਣ ਭਰੀ ਸੀ। ਜਾਣਕਾਰੀ ਅਨੁਸਾਰ, ਟੇਕ-ਆਫ ਦੇ ਕੁਝ ਹੀ ਦੇਰ ਬਾਅਦ ਰਾਤ ਲਗਭਗ 7:42 ਵਜੇ ਜਹਾਜ਼ ਦਾ ਰਡਾਰ ਅਤੇ ਗਰਾਊਂਡ ਕੰਟਰੋਲ ਨਾਲੋਂ ਸੰਪਰਕ ਟੁੱਟ ਗਿਆ ਸੀ। ਇਸ ਹਾਦਸੇ ਤੋਂ ਬਾਅਦ ਹਵਾਈ ਸੈਨਾ ਵੱਲੋਂ ਵੱਡੇ ਪੱਧਰ 'ਤੇ ਖੋਜ ਮੁਹਿੰਮ ਚਲਾਈ ਗਈ ਸੀ।

ਜਹਾਜ਼ ਦਾ ਮਲਬਾ ਬਰਾਮਦ: ਦੋਵੇਂ ਜਾਂਬਾਜ਼ ਪਾਇਲਟ ਸ਼ਹੀਦ

ਇਸ ਹਾਦਸੇ ਤੋਂ ਬਾਅਦ ਜਹਾਜ਼ ਦਾ ਮਲਬਾ ਬਰਾਮਦ ਕਰ ਲਿਆ ਗਿਆ ਹੈ। ਇਸ ਦੁਖਦਾਈ ਘਟਨਾ ਵਿੱਚ ਸਕੁਐਡਰਨ ਲੀਡਰ ਅਨੁਜ ਵਸ਼ਿਸ਼ਠ ਦੀ ਮੌਤ ਹੋ ਗਈ। ਉਹ ਕੁਝ ਹੀ ਦਿਨਾਂ ਵਿੱਚ ਵਿਆਹ ਦੇ ਬੰਧਨ ਵਿੱਚ ਬੱਝਣ ਵਾਲੇ ਸਨ। ਅਨੁਜ ਦੇ ਨਾਲ ਫਲਾਈਟ ਲੈਫਟੀਨੈਂਟ ਪੂਰਵੇਸ਼ ਦੁਰਗਕਰ ਦੀ ਵੀ ਮੌਤ ਹੋ ਗਈ, ਜੋ ਮਹਾਰਾਸ਼ਟਰ ਦੇ ਨਾਗਪੁਰ ਦੇ ਰਹਿਣ ਵਾਲੇ ਸਨ।

ਦੋਵਾਂ ਪਾਇਲਟਾਂ ਦੀ ਸ਼ਹਾਦਤ 'ਤੇ ਭਾਰਤੀ ਹਵਾਈ ਸੈਨਾ ਨੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ। ਸੁਖੋਈ ਜਹਾਜ਼ ਕਿਵੇਂ ਕਰੈਸ਼ ਹੋਇਆ, ਇਸ ਦੀ ਅਸਲ ਵਜ੍ਹਾ ਪਤਾ ਲਗਾਉਣ ਲਈ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।

ਦੇਸ਼ ਸੇਵਾ ਲਈ ਛੱਡੀ ਸੀ TCS ਦੀ ਨੌਕਰੀ

ਦੇਸ਼ ਦੀ ਸੇਵਾ ਕਰਨ ਦੇ ਜਜ਼ਬੇ ਕਾਰਨ ਅਨੁਜ ਵਸ਼ਿਸ਼ਠ ਨੇ TCS ਵਰਗੀ ਵੱਡੀ ਕੰਪਨੀ ਦੀ ਨੌਕਰੀ ਛੱਡ ਦਿੱਤੀ ਸੀ। ਅਨੁਜ ਆਪਣੇ ਪਿਤਾ, ਸੇਵਾ-ਮੁਕਤ ਸੂਬੇਦਾਰ ਆਨੰਦ ਕੁਮਾਰ ਤੋਂ ਬਹੁਤ ਪ੍ਰੇਰਿਤ ਸਨ ਅਤੇ ਬਚਪਨ ਤੋਂ ਹੀ ਉਹਨਾਂ ਦਾ ਸੁਪਨਾ ਫੌਜ ਵਿੱਚ ਭਰਤੀ ਹੋਣ ਦਾ ਸੀ। ਬੀ.ਟੈਕ (B.Tech) ਕਰਨ ਤੋਂ ਬਾਅਦ ਅਨੁਜ ਨੇ ਕੁਝ ਸਮਾਂ TCS ਵਿੱਚ ਕੰਮ ਕੀਤਾ, ਪਰ ਸਾਲ 2015 ਵਿੱਚ ਉਹ ਭਾਰਤੀ ਹਵਾਈ ਸੈਨਾ ਵਿੱਚ ਸ਼ਾਮਲ ਹੋ ਗਏ।

ਪਰਿਵਾਰਕ ਮੈਂਬਰਾਂ ਅਨੁਸਾਰ, ਅਨੁਜ ਦੇ ਦਿਲ ਵਿੱਚ ਦੇਸ਼ ਲਈ ਕੁਝ ਵੱਡਾ ਕਰਨ ਦਾ ਸੁਪਨਾ ਸੀ, ਜਿਸ ਕਾਰਨ ਉਹਨਾਂ ਨੇ ਹੁਣ ਤੱਕ ਵਿਆਹ ਨਹੀਂ ਕਰਵਾਇਆ ਸੀ ਅਤੇ ਸਾਰਾ ਧਿਆਨ ਆਪਣੇ ਕੰਮ 'ਤੇ ਲਗਾਇਆ ਹੋਇਆ ਸੀ। ਹਾਲ ਹੀ ਵਿੱਚ ਜਦੋਂ ਉਹਨਾਂ ਨੇ ਵਿਆਹ ਲਈ ਹਾਮੀ ਭਰੀ, ਤਾਂ ਪਰਿਵਾਰ ਬੜੇ ਚਾਅ ਨਾਲ ਤਿਆਰੀਆਂ ਵਿੱਚ ਜੁਟ ਗਿਆ ਸੀ। ਅਨੁਜ ਦਾ ਪਰਿਵਾਰ ਮੂਲ ਰੂਪ ਵਿੱਚ ਰੋਹਤਕ ਦੇ ਪਿੰਡ ਕਾਕਰਾਣਾ ਦਾ ਰਹਿਣ ਵਾਲਾ ਹੈ। ਅਨੁਜ ਨੇ ਆਖਰੀ ਵਾਰ ਹੋਲੀ ਦੇ ਮੌਕੇ 'ਤੇ ਆਪਣੇ ਪਰਿਵਾਰ ਵਾਲਿਆਂ ਨਾਲ ਗੱਲਬਾਤ ਕੀਤੀ ਸੀ।