ਗਾਹਕਾਂ ਲਈ ਖੁਸ਼ਖਬਰੀ: ਸੋਨੇ-ਚਾਂਦੀ ਦੀਆਂ ਕੀਮਤਾਂ 'ਚ ਭਾਰੀ ਕਟੌਤੀ, ਜਾਣੋ 10 ਗ੍ਰਾਮ ਦਾ ਨਵਾਂ ਰੇਟ

ਸੋਨੇ ਅਤੇ ਚਾਂਦੀ ਦੀਆਂ ਕੀਮਤਾਂ ਵਿੱਚ ਗਿਰਾਵਟ ਦਾ ਸਿਲਸਿਲਾ ਲਗਾਤਾਰ ਜਾਰੀ ਹੈ। ਹਫ਼ਤੇ ਦੇ ਪਹਿਲੇ ਕਾਰੋਬਾਰੀ ਦਿਨ ਮਲਟੀ ਕਮੋਡਿਟੀ ਐਕਸਚੇਂਜ (MCX) 'ਤੇ ਕਾਰੋਬਾਰ ਸ਼ੁਰੂ ਹੁੰਦੇ ਹੀ ਦੋਵੇਂ ਕੀਮਤੀ ਧਾਤਾਂ ਹੋਰ ਸਸਤੀਆਂ ਹੋ ਗਈਆਂ ਹਨ। ਚਾਂਦੀ ਦੀ ਕੀਮਤ ਇੱਕੋ ਝਟਕੇ ਵਿੱਚ ਆਪਣੇ ਪਿਛਲੇ ਬੰਦ ਦੇ ਮੁਕਾਬਲੇ 2800 ਰੁਪਏ ਪ੍ਰਤੀ ਕਿਲੋ ਤੋਂ ਵੀ ਜ਼ਿਆਦਾ ਡਿੱਗ ਗਈ, ਜਦਕਿ ਸੋਨੇ ਦਾ ਭਾਅ ਵੀ 1300 ਰੁਪਏ ਤੋਂ ਜ਼ਿਆਦਾ ਘੱਟ ਗਿਆ ਹੈ।

ਇਸ ਵੱਡੀ ਗਿਰਾਵਟ ਤੋਂ ਬਾਅਦ, ਹੁਣ 1 ਕਿਲੋ ਚਾਂਦੀ ਦੀ ਕੀਮਤ ਆਪਣੇ ਲਾਈਫ ਟਾਈਮ ਹਾਈ ਲੈਵਲ (ਸਭ ਤੋਂ ਉੱਚੇ ਪੱਧਰ) ਤੋਂ ਕ੍ਰੈਸ਼ ਹੋ ਕੇ 2.09 ਲੱਖ ਰੁਪਏ ਤੱਕ ਸਸਤੀ ਹੋ ਗਈ ਹੈ। ਜੇਕਰ ਤੁਸੀਂ ਸੋਨੇ ਜਾਂ ਚਾਂਦੀ ਵਿੱਚ ਨਿਵੇਸ਼ ਕਰਨ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਖਰੀਦਦਾਰੀ ਕਰਨ ਤੋਂ ਪਹਿਲਾਂ ਇਨ੍ਹਾਂ ਦੇ ਤਾਜ਼ਾ ਰੇਟ ਜਾਣ ਲੈਣਾ ਤੁਹਾਡੇ ਲਈ ਬਹੁਤ ਜ਼ਰੂਰੀ ਹੈ।

ਚਾਂਦੀ ਦੀਆਂ ਕੀਮਤਾਂ ਵਿੱਚ ਇੱਕ ਵਾਰ ਫਿਰ ਵੱਡੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ। ਸੋਮਵਾਰ ਨੂੰ ਕਾਰੋਬਾਰ ਦੀ ਸ਼ੁਰੂਆਤ ਹੁੰਦੇ ਹੀ ਐਮਸੀਐਕਸ (MCX) 'ਤੇ ਚਾਂਦੀ ਦੀ ਕੀਮਤ ਮੂਧੇ ਮੂੰਹ ਜਾ ਡਿੱਗੀ। ਪਿਛਲੇ ਹਫ਼ਤੇ ਦੇ ਆਖਰੀ ਕਾਰੋਬਾਰੀ ਦਿਨ ਯਾਨੀ ਵੀਰਵਾਰ ਨੂੰ ਚਾਂਦੀ 2,32,495 ਰੁਪਏ ਪ੍ਰਤੀ ਕਿਲੋ 'ਤੇ ਬੰਦ ਹੋਈ ਸੀ। ਹੁਣ ਲੰਬੇ ਵੀਕੈਂਡ ਤੋਂ ਬਾਅਦ ਜਦੋਂ ਕਮੋਡਿਟੀ ਮਾਰਕੀਟ ਖੁੱਲ੍ਹੀ, ਤਾਂ ਚਾਂਦੀ ਦੀ ਕੀਮਤ ਫਿਸਲ ਕੇ 2,29,651 ਰੁਪਏ 'ਤੇ ਆ ਗਈ। ਇਸ ਹਿਸਾਬ ਨਾਲ ਚਾਂਦੀ ਅਚਾਨਕ 2844 ਰੁਪਏ ਪ੍ਰਤੀ ਕਿਲੋਗ੍ਰਾਮ ਸਸਤੀ ਹੋ ਗਈ ਹੈ।

ਸੋਮਵਾਰ ਨੂੰ ਆਈ ਇਸ ਸ਼ੁਰੂਆਤੀ ਗਿਰਾਵਟ ਤੋਂ ਬਾਅਦ ਹੁਣ ਚਾਂਦੀ ਆਪਣੇ ਉੱਚ ਪੱਧਰ (High Level) ਤੋਂ ਹੋਰ ਵੀ ਘੱਟ ਕੀਮਤ 'ਤੇ ਮਿਲ ਰਹੀ ਹੈ। ਜੇਕਰ MCX 'ਤੇ ਚਾਂਦੀ ਦੀਆਂ ਕੀਮਤਾਂ 'ਤੇ ਨਜ਼ਰ ਮਾਰੀਏ, ਤਾਂ ਇਸ ਕੀਮਤੀ ਧਾਤੂ ਦਾ ਹੁਣ ਤੱਕ ਦਾ ਸਭ ਤੋਂ ਉੱਚਾ ਪੱਧਰ (Life Time High) 4,39,337 ਰੁਪਏ ਪ੍ਰਤੀ ਕਿੱਲੋਗ੍ਰਾਮ ਰਿਹਾ ਹੈ। ਅੱਜ ਦੇ ਤਾਜ਼ਾ ਭਾਅ ਨਾਲ ਤੁਲਨਾ ਕਰੀਏ ਤਾਂ ਹੁਣ 1 ਕਿੱਲੋ ਚਾਂਦੀ ਦੀ ਕੀਮਤ 2,09,686 ਰੁਪਏ ਤੱਕ ਘੱਟ ਚੁੱਕੀ ਹੈ।

ਚਾਂਦੀ ਵਾਂਗ ਸੋਨੇ ਦਾ ਵੀ ਇਹੀ ਹਾਲ ਹੈ; ਨਾ ਸਿਰਫ਼ ਚਾਂਦੀ ਦੇ ਭਾਅ ਡਿੱਗੇ ਹਨ, ਸਗੋਂ ਹਫ਼ਤੇ ਦੇ ਪਹਿਲੇ ਕਾਰੋਬਾਰੀ ਦਿਨ ਸੋਨੇ ਦੀ ਕੀਮਤ ਵਿੱਚ ਵੀ ਭਾਰੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ। ਬੀਤੇ ਵੀਰਵਾਰ ਨੂੰ ਸੋਨੇ ਦਾ ਵਾਅਦਾ ਭਾਅ 1,49,680 ਰੁਪਏ ਪ੍ਰਤੀ 10 ਗ੍ਰਾਮ 'ਤੇ ਬੰਦ ਹੋਇਆ ਸੀ, ਜੋ ਸੋਮਵਾਰ ਨੂੰ ਗਿਰਾਵਟ ਨਾਲ 1,48,298 ਰੁਪਏ 'ਤੇ ਖੁੱਲ੍ਹਿਆ। ਇਸਦਾ ਮਤਲਬ ਹੈ ਕਿ 24 ਕੈਰੇਟ ਸੋਨੇ ਦਾ ਰੇਟ 1382 ਰੁਪਏ ਪ੍ਰਤੀ 10 ਗ੍ਰਾਮ ਘੱਟ ਗਿਆ ਹੈ।

ਸੋਨਾ ਵੀ ਹੁਣ ਆਪਣੇ ਉੱਚ ਪੱਧਰ ਤੋਂ ਕਾਫ਼ੀ ਸਸਤਾ ਹੋ ਚੁੱਕਾ ਹੈ। ਐਮਸੀਐਕਸ (MCX) 'ਤੇ ਸੋਨੇ ਦਾ ਹੁਣ ਤੱਕ ਦਾ ਸਭ ਤੋਂ ਉੱਚਾ ਪੱਧਰ (Life Time High) 2,02,984 ਰੁਪਏ ਪ੍ਰਤੀ 10 ਗ੍ਰਾਮ ਰਿਹਾ ਹੈ, ਅਤੇ ਅੱਜ ਦਾ ਤਾਜ਼ਾ ਭਾਅ ਇਸ ਹਾਈ ਲੈਵਲ ਦੇ ਮੁਕਾਬਲੇ 54,686 ਰੁਪਏ ਸਸਤਾ ਹੈ।

ਗਲੋਬਲ ਤਣਾਅ ਦੇ ਬਾਵਜੂਦ ਸੋਨੇ-ਚਾਂਦੀ ਦੀਆਂ ਕੀਮਤਾਂ 'ਚ ਗਿਰਾਵਟ

ਮਿਡਲ ਈਸਟ (ਮੱਧ ਪੂਰਬ) ਦੀ ਜੰਗ ਕਾਰਨ ਗਲੋਬਲ ਤਣਾਅ ਸਿਖਰ 'ਤੇ ਹੈ ਅਤੇ ਡੋਨਾਲਡ ਟਰੰਪ ਵੱਲੋਂ ਇਰਾਨ ਨੂੰ ਦਿੱਤੀਆਂ ਗਈਆਂ ਨਵੀਆਂ ਧਮਕੀਆਂ ਨੇ ਇਸ ਨੂੰ ਹੋਰ ਵਧਾ ਦਿੱਤਾ ਹੈ। ਅਜਿਹੇ ਹਾਲਾਤਾਂ ਵਿੱਚ ਵੀ ਸੋਨੇ ਅਤੇ ਚਾਂਦੀ ਦੀਆਂ ਕੀਮਤਾਂ ਵਿੱਚ ਆਈ ਇਹ ਗਿਰਾਵਟ ਕਾਫ਼ੀ ਹੈਰਾਨ ਕਰਨ ਵਾਲੀ ਹੈ। 

ਆਮ ਤੌਰ 'ਤੇ ਜਦੋਂ ਵੀ ਕੋਈ ਵੱਡੀ ਮੁਸੀਬਤ ਜਾਂ ਭੂ-ਰਾਜਨੀਤਿਕ (Geo-political) ਤਣਾਅ ਪੈਦਾ ਹੁੰਦਾ ਹੈ, ਤਾਂ ਨਿਵੇਸ਼ਕ ਸੋਨੇ-ਚਾਂਦੀ ਨੂੰ ਸੁਰੱਖਿਅਤ ਮੰਨਦੇ ਹਨ ਅਤੇ ਇਨ੍ਹਾਂ ਕੀਮਤੀ ਧਾਤਾਂ ਦੇ ਭਾਅ ਅਸਮਾਨ ਨੂੰ ਛੂਹਣ ਲੱਗਦੇ ਹਨ। ਪਰ ਮੌਜੂਦਾ ਸਥਿਤੀ ਇਸ ਦੇ ਬਿਲਕੁਲ ਉਲਟ ਨਜ਼ਰ ਆ ਰਹੀ ਹੈ।

ਮੌਜੂਦਾ ਹਾਲਾਤ ਵਿੱਚ ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ ਆਈ ਤੇਜ਼ੀ ਕਾਰਨ ਵਧੇ ਮਹਿੰਗਾਈ ਦੇ ਖ਼ਤਰੇ ਨੇ ਸੋਨੇ ਅਤੇ ਚਾਂਦੀ ਦੀਆਂ ਕੀਮਤਾਂ 'ਤੇ ਦਬਾਅ ਵਧਾ ਦਿੱਤਾ ਹੈ। ਕੱਚਾ ਤੇਲ ਇਸ ਸਮੇਂ 110 ਡਾਲਰ ਪ੍ਰਤੀ ਬੈਰਲ ਦੇ ਕਰੀਬ ਕਾਰੋਬਾਰ ਕਰ ਰਿਹਾ ਹੈ। ਅਜਿਹੇ ਸਮੇਂ ਲੋਕ ਨਿਵੇਸ਼ ਕਰਨ ਦੀ ਬਜਾਏ ਆਪਣੇ ਹੱਥ ਵਿੱਚ ਨਕਦੀ (Cash) ਰੱਖਣਾ ਜ਼ਿਆਦਾ ਬਿਹਤਰ ਸਮਝ ਰਹੇ ਹਨ। ਇਸ ਤੋਂ ਇਲਾਵਾ, ਅਮਰੀਕੀ ਡਾਲਰ ਦੇ ਮਜ਼ਬੂਤ ਹੋਣ ਕਾਰਨ ਵੀ ਸੋਨਾ ਅਤੇ ਚਾਂਦੀ ਆਪਣੀ ਉਡਾਣ ਨਹੀਂ ਭਰ ਪਾ ਰਹੇ ਅਤੇ ਇਨ੍ਹਾਂ ਦੀਆਂ ਕੀਮਤਾਂ ਵਿੱਚ ਗਿਰਾਵਟ ਦੇਖਣ ਨੂੰ ਮਿਲ ਰਹੀ ਹੈ।