ਸੰਸਦ ਦੇ ਬਜਟ ਸੈਸ਼ਨ 'ਚ ਛਾਏ MP ਸਤਨਾਮ ਸਿੰਘ ਸੰਧੂ, ਪੰਜਾਬ ਦੇ ਮੁੱਦਿਆਂ 'ਤੇ ਸਭ ਤੋਂ ਵੱਧ ਸਵਾਲ ਪੁੱਛ ਕੇ ਬਣਾਇਆ ਰਿਕਾਰਡ, ਜਾਣੋ ਕੀ ਕਹਿੰਦਾ ਰਿਪੋਰਟ ਕਾਰਡ!

MP Satnam Singh Sandhu: ਸੰਸਦ ਦੇ ਹਾਲ ਹੀ ਵਿੱਚ ਖ਼ਤਮ ਹੋਏ ਬਜਟ ਸੈਸ਼ਨ 2026 ਦੌਰਾਨ, ਰਾਜ ਸਭਾ ਮੈਂਬਰ ਸਤਨਾਮ ਸਿੰਘ ਸੰਧੂ ਪੰਜਾਬ ਦੇ ਸਭ ਤੋਂ ਸਰਗਰਮ ਅਤੇ ਪ੍ਰਭਾਵਸ਼ਾਲੀ ਸੰਸਦ ਮੈਂਬਰ ਵਜੋਂ ਉਭਰੇ ਹਨ। ਉਨ੍ਹਾਂ ਨੇ ਪੰਜਾਬ ਦੀਆਂ ਹੱਕੀ ਮੰਗਾਂ ਅਤੇ ਜਨਤਕ ਮੁੱਦਿਆਂ ਨੂੰ ਸੰਸਦ ਵਿੱਚ ਪੂਰੀ ਗੰਭੀਰਤਾ ਨਾਲ ਉਠਾਇਆ।

ਪੰਜਾਬ ਦੇ ਸਾਰੇ ਸੰਸਦ ਮੈਂਬਰਾਂ ਵਿੱਚੋਂ ਪਹਿਲੇ ਨੰਬਰ 'ਤੇ

ਸਤਨਾਮ ਸਿੰਘ ਸੰਧੂ ਨੇ ਇਸ ਸੈਸ਼ਨ ਦੌਰਾਨ ਪੰਜਾਬ ਦੇ ਸਾਰੇ ਲੋਕ ਸਭਾ ਅਤੇ ਰਾਜ ਸਭਾ ਮੈਂਬਰਾਂ ਦੇ ਮੁਕਾਬਲੇ ਸਭ ਤੋਂ ਵੱਧ ਸਵਾਲ ਪੁੱਛ ਕੇ ਇੱਕ ਮਿਸਾਲ ਕਾਇਮ ਕੀਤੀ ਹੈ। ਕੁੱਲ ਸਵਾਲ: ਉਨ੍ਹਾਂ ਨੇ ਕੁੱਲ 51 ਸਵਾਲ ਪੁੱਛੇ, ਜਿਨ੍ਹਾਂ ਵਿੱਚੋਂ 41 ਅਨਸਟਾਰਡ (Unstarred), 5 ਸਟਾਰਡ (Starred) ਅਤੇ 5 ਸਪਲੀਮੈਂਟਰੀ ਸਵਾਲ ਸਨ। ਇੱਥੇ ਹੀ ਦੱਸ ਦਈਏ ਉਨ੍ਹਾਂ ਨੇ ਇਸ ਸੈਸ਼ਨ ਦੌਰਾਨ ਆਪਣੀ 100% ਹਾਜ਼ਰੀ ਬਰਕਰਾਰ ਰੱਖੀ।

ਸਵਾਲਾਂ ਦੀ ਸੀਮਾ: ਉਨ੍ਹਾਂ ਨੇ ਸੈਸ਼ਨ ਲਈ ਨਿਰਧਾਰਿਤ ਵੱਧ ਤੋਂ ਵੱਧ ਸੀਮਾ ਨੂੰ ਛੂਹਦਿਆਂ ਕੁੱਲ 217 ਸਵਾਲ ਫਾਈਲ ਕੀਤੇ।

ਪੰਜਾਬ ਦੇ ਸਭ ਤੋਂ ਵੱਧ ਮੁੱਦੇ ਚੁੱਕੇ

ਐੱਮ.ਪੀ. ਸੰਧੂ ਨੇ ਪੰਜਾਬ ਅਤੇ ਚੰਡੀਗੜ੍ਹ ਦੇ ਵਿਕਾਸ ਲਈ ਕੁੱਲ 15 ਸਵਾਲ ਪੁੱਛੇ। ਉਨ੍ਹਾਂ ਵੱਲੋਂ ਉਠਾਏ ਗਏ ਮੁੱਖ ਮੁੱਦੇ ਹੇਠ ਲਿਖੇ ਅਨੁਸਾਰ ਸਨ:

ਸਿੱਖ ਰੈਫਰੈਂਸ ਲਾਇਬ੍ਰੇਰੀ: ਸ਼੍ਰੀ ਹਰਿਮੰਦਰ ਸਾਹਿਬ ਦੀ ਸਿੱਖ ਰੈਫਰੈਂਸ ਲਾਇਬ੍ਰੇਰੀ ਦੀ ਬਹਾਲੀ ਦੀ ਮੰਗ ਕੀਤੀ, ਜੋ 1984 ਦੇ ਆਪ੍ਰੇਸ਼ਨ ਬਲੂ ਸਟਾਰ ਦੌਰਾਨ ਨੁਕਸਾਨੀ ਗਈ ਸੀ।

ਪਾਣੀ ਦੀ ਸਥਿਤੀ: ਪੰਜਾਬ ਦੇ 19 ਜ਼ਿਲ੍ਹਿਆਂ ਵਿੱਚ ਜ਼ਮੀਨੀ ਪਾਣੀ ਦੇ ਘੱਟ ਰਹੇ ਪੱਧਰ ਅਤੇ ਯੂਰੇਨੀਅਮ ਦੀ ਮਾਤਰਾ ਵੱਧਣ 'ਤੇ ਚਿੰਤਾ ਪ੍ਰਗਟਾਈ।

ਰੇਲ ਅਤੇ ਹਵਾਈ ਸੰਪਰਕ: ਸ਼ਹੀਦ ਭਗਤ ਸਿੰਘ ਅੰਤਰਰਾਸ਼ਟਰੀ ਹਵਾਈ ਅੱਡਾ, ਚੰਡੀਗੜ੍ਹ ਤੋਂ ਲੰਡਨ, ਵੈਨਕੂਵਰ ਅਤੇ ਸਿੰਗਾਪੁਰ ਲਈ ਸਿੱਧੀਆਂ ਉਡਾਣਾਂ ਦੀ ਮੰਗ ਦੇ ਨਾਲ-ਨਾਲ ਸਰਹੱਦੀ ਖੇਤਰਾਂ ਲਈ 'ਬਾਰਡਰ ਏਰੀਆ ਐਕਸਪ੍ਰੈਸ' ਚਲਾਉਣ ਦੀ ਮੰਗ ਕੀਤੀ।

ਸਿੱਖਿਆ ਅਤੇ ਖੇਤੀਬਾੜੀ: ਪੰਜਾਬ ਵਿੱਚ ਕੇਂਦਰੀ ਬਾਗਬਾਨੀ ਯੂਨੀਵਰਸਿਟੀ ਦੀ ਸਥਾਪਨਾ ਅਤੇ ਪਟਿਆਲਾ ਵਿੱਚ ਨਿਊਕਲੀਅਰ ਪਾਵਰ ਪਲਾਂਟ ਲਗਾਉਣ ਦੀ ਸੰਭਾਵਨਾ ਬਾਰੇ ਸਵਾਲ ਪੁੱਛੇ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਪੰਜਾਬ ਦੀਆਂ ਨਦੀਆਂ ਵਿੱਚ ਪ੍ਰਦੂਸ਼ਣ, ਹੜ੍ਹਾਂ ਸਣੇ ਕਈ ਹੋਰ ਅਹਿਮ ਮੁੱਦੇ ਚੁੱਕੇ।

ਵਿਧਾਨਕ ਕੰਮਕਾਜ ਵਿੱਚ ਯੋਗਦਾਨ

ਸਵਾਲਾਂ ਤੋਂ ਇਲਾਵਾ, MP ਸੰਧੂ ਨੇ ਤਿੰਨ ਪ੍ਰਾਈਵੇਟ ਮੈਂਬਰ ਬਿੱਲ ਵੀ ਪੇਸ਼ ਕੀਤੇ:

ਕਿਸਾਨ ਜੀਵਨ ਸੁਰੱਖਿਆ ਅਤੇ ਦੁਰਘਟਨਾ ਪ੍ਰਤੀਪੂਰਤੀ ਵਿਧਾਇਕ, 2025

ਪ੍ਰਵਾਸੀ ਭਾਰਤੀ ਕੌਸ਼ਲ ਅਤੇ ਪ੍ਰਤਿਭਾ ਪ੍ਰੇਰਕ ਵਿਧਾਇਕ, 2025

ਉੱਚ ਵਿੱਦਿਅਕ ਸੰਸਥਾਵਾਂ ਲਈ ਰਾਸ਼ਟਰੀ ਰੈਂਕਿੰਗ ਅਤੇ ਮਾਨਤਾ ਅਥਾਰਟੀ ਬਿੱਲ, 2025

ਉਨ੍ਹਾਂ ਨੇ ਕੇਂਦਰੀ ਬਜਟ 'ਤੇ ਰਾਸ਼ਟਰਪਤੀ ਦੇ ਭਾਸ਼ਣ ਅਤੇ 'ਐਪਰੋਪ੍ਰੀਏਸ਼ਨ ਬਿੱਲ 2026' 'ਤੇ ਚਰਚਾ ਦੌਰਾਨ ਦੋ ਵਾਰ ਭਾਸ਼ਣ ਦਿੱਤਾ ਅਤੇ 'ਜ਼ੀਰੋ ਆਵਰ' ਰਾਹੀਂ ਸੱਤ ਅਹਿਮ ਮੁੱਦੇ ਉਠਾਏ।

ਸਤਨਾਮ ਸਿੰਘ ਸੰਧੂ ਦੀ ਇਸ ਸਰਗਰਮੀ ਨੇ ਇਹ ਸਾਬਤ ਕਰ ਦਿੱਤਾ ਹੈ ਕਿ ਉਹ ਪੰਜਾਬ ਦੇ ਹਿੱਤਾਂ ਦੀ ਰਾਖੀ ਲਈ ਸੰਸਦ ਵਿੱਚ ਇੱਕ ਮਜ਼ਬੂਤ ਆਵਾਜ਼ ਬਣ ਕੇ ਡਟੇ ਹੋਏ ਹਨ।