LPG ਨੂੰ ਲੈ ਕੇ ਵੱਡਾ ਅਪਡੇਟ, ਸਰਕਾਰ ਨੇ ਦਿੱਤੀ ਖੁਸ਼ਖਬਰੀ; ਕਮਰਸ਼ੀਅਲ LPG ਗੈਸ ਸਪਲਾਈ 'ਤੇ ਪਾਬੰਦੀਆਂ ਹਟੀਆਂ

ਇਰਾਨ ਅਤੇ ਅਮਰੀਕਾ ਵਿਚਕਾਰ ਸ਼ਾਂਤੀ ਸਮਝੌਤਾ ਹੋਣ ਤੋਂ ਬਾਅਦ ਸਟ੍ਰੇਟ ਆਫ ਹਾਰਮੁਜ਼ (Strait of Hormuz) ਤੋਂ ਜਹਾਜ਼ਾਂ ਦੀ ਆਵਾਜਾਈ ਸ਼ੁਰੂ ਹੋ ਗਈ ਹੈ। ਇਸ ਰਸਤੇ ਦੇ ਖੁੱਲ੍ਹਦੇ ਹੀ ਭਾਰਤ ਸਰਕਾਰ ਨੇ ਨਾਨ-ਡੋਮੇਸਟਿਕ ਪੈਕਡ ਯਾਨੀ ਕਿ ਕਮਰਸ਼ੀਅਲ LPG ਦੀ ਸਪਲਾਈ 'ਤੇ ਲਗਾਈਆਂ ਗਈਆਂ ਪਾਬੰਦੀਆਂ ਨੂੰ ਹਟਾ ਦਿੱਤਾ ਹੈ। ਇਰਾਨ-ਅਮਰੀਕਾ ਸੰਘਰਸ਼ ਤੋਂ ਪਹਿਲਾਂ ਵਾਲੇ ਪੱਧਰ 'ਤੇ ਕਮਰਸ਼ੀਅਲ ਸਿਲੰਡਰਾਂ ਦੀ ਸਪਲਾਈ ਨੂੰ ਬਹਾਲ ਕਰ ਦਿੱਤਾ ਗਿਆ ਹੈ। ਇਸ ਦੇ ਨਾਲ ਹੀ ਸਰਕਾਰ ਨੇ ਬਲਕ (Bulk) LPG ਸਪਲਾਈ 'ਤੇ ਲੱਗੀਆਂ ਪਾਬੰਦੀਆਂ ਵਿੱਚ ਵੀ ਢਿੱਲ ਦੇ ਦਿੱਤੀ ਹੈ। 

ਸਰਕਾਰ ਦੇ ਇਸ ਫੈਸਲੇ ਨਾਲ ਕਮਰਸ਼ੀਅਲ ਅਤੇ ਇੰਡਸਟ੍ਰੀਅਲ ਗਾਹਕਾਂ ਨੂੰ ਵੱਡੀ ਰਾਹਤ ਮਿਲੀ ਹੈ, ਕਿਉਂਕਿ ਪੱਛਮੀ ਏਸ਼ੀਆ (West Asia) ਦੇ ਸੰਕਟ ਕਾਰਨ ਸਪਲਾਈ ਵਿੱਚ ਰੁਕਾਵਟ ਆਉਣ ਤੋਂ ਬਾਅਦ ਕਈ ਮਹੀਨਿਆਂ ਤੋਂ ਉਹਨਾਂ 'ਤੇ ਕਈ ਤਰ੍ਹਾਂ ਦੀਆਂ ਪਾਬੰਦੀਆਂ ਲੱਗੀਆਂ ਹੋਈਆਂ ਸਨ। ਇੰਡਸਟ੍ਰੀਅਲ ਮੰਗ ਅਤੇ ਊਰਜਾ ਸੁਰੱਖਿਆ (Energy Security) ਵਿਚਕਾਰ ਸੰਤੁਲਨ ਬਣਾਉਣ ਦੇ ਮਕਸਦ ਨਾਲ, ਪੈਟਰੋਲੀਅਮ ਅਤੇ ਕੁਦਰਤੀ ਗੈਸ ਮੰਤਰਾਲੇ ਨੇ ਐਲਾਨ ਕੀਤਾ ਹੈ ਕਿ ਨਾਨ-ਡੋਮੇਸਟਿਕ ਪੈਕਡ LPG 'ਤੇ ਲੱਗੀਆਂ ਸਾਰੀਆਂ ਸੈਕਟਰ-ਵਾਈਜ਼ ਪਾਬੰਦੀਆਂ ਹਟਾ ਲਈਆਂ ਗਈਆਂ ਹਨ।

ਬਲਕ LPG ਸਪਲਾਈ ਵਿੱਚ 50% ਤੱਕ ਦੀ ਢਿੱਲ:

ਇਸ ਤੋਂ ਇਲਾਵਾ, ਸੰਕਟ ਦੀ ਸ਼ੁਰੂਆਤ ਵਿੱਚ ਬਲਕ (Bulk) LPG ਦੀ ਸਪਲਾਈ ਰੋਕ ਦਿੱਤੀ ਗਈ ਸੀ, ਪਰ ਹੁਣ ਇਸ ਵਿੱਚ ਸੰਕਟ ਤੋਂ ਪਹਿਲਾਂ ਵਾਲੀ ਖਪਤ ਦੇ ਪੱਧਰ ਦਾ 50% ਤੱਕ ਢਿੱਲ ਦੇ ਦਿੱਤੀ ਗਈ ਹੈ, ਜਿਸ ਨਾਲ ਕਮਰਸ਼ੀਅਲ ਅਤੇ ਇੰਡਸਟ੍ਰੀਅਲ ਗਾਹਕਾਂ ਨੂੰ ਕਾਫੀ ਰਾਹਤ ਮਿਲੀ ਹੈ।

ਮਿਡਲ ਈਸਟ ਸੰਕਟ ਕਾਰਨ ਭਾਰਤ ਦੀ ਗੈਸ ਦਰਾਮਦ ਪ੍ਰਭਾਵਿਤ ਹੋਈ ਸੀ। ਇਸ ਦੇ ਚਲਦਿਆਂ ਸਰਕਾਰ ਨੇ 'ਜ਼ਰੂਰੀ ਵਸਤੂਆਂ ਕਾਨੂੰਨ' (Essential Commodities Act) ਤਹਿਤ ਪ੍ਰਬੰਧ ਲਾਗੂ ਕੀਤੇ ਸਨ। ਸਰਕਾਰ ਨੇ ਇਹ ਹਦਾਇਤ ਦਿੱਤੀ ਸੀ ਕਿ C3-C4 ਹਾਈਡਰੋਕਾਰਬਨ ਸਟ੍ਰੀਮ ਦੀ ਵਰਤੋਂ ਸਿਰਫ਼ LPG ਉਤਪਾਦਨ ਲਈ ਕੀਤੀ ਜਾਵੇ। ਇਸ ਨਾਲ ਪੈਟਰੋਕੇਮੀਕਲ ਅਤੇ ਹੋਰ ਡਾਊਨਸਟ੍ਰੀਮ ਉਦਯੋਗਾਂ ਤੋਂ ਸਪਲਾਈ ਹਟਾ ਕੇ LPG ਲਈ ਇਸਤੇਮਾਲ ਕੀਤੀ ਜਾ ਸਕੇ।

ਜੰਗ ਦੌਰਾਨ ਲੱਗੀਆਂ ਪਾਬੰਦੀਆਂ ਅਤੇ ਹੁਣ ਮਿਲੀ ਰਾਹਤ

ਜ਼ਿਕਰਯੋਗ ਹੈ ਕਿ ਮੱਧ ਪੂਰਬ (Middle East) ਵਿੱਚ ਚੱਲੇ ਸੰਘਰਸ਼ ਦੇ ਦੌਰਾਨ, ਭਾਰਤ ਵਿੱਚ ਗੈਸ ਦੀ ਸਪਲਾਈ ਨੂੰ ਸੁਚਾਰੂ ਬਣਾਈ ਰੱਖਣ ਲਈ ਸਰਕਾਰ ਨੇ ਕਮਰਸ਼ੀਅਲ LPG ਗੈਸ ਸਪਲਾਈ 'ਤੇ ਸਖ਼ਤ ਪਾਬੰਦੀਆਂ ਲਗਾ ਦਿੱਤੀਆਂ ਸਨ। ਇਸ ਸਮੇਂ ਦੌਰਾਨ ਕਮਰਸ਼ੀਅਲ ਅਦਾਰਿਆਂ ਨੂੰ ਮਿਲਣ ਵਾਲੇ ਸਿਲੰਡਰਾਂ ਦੀ ਗਿਣਤੀ ਵਿੱਚ ਭਾਰੀ ਕਟੌਤੀ ਕਰ ਦਿੱਤੀ ਗਈ ਸੀ, ਜਿਸ ਨਾਲ ਹੋਟਲਾਂ, ਰੈਸਟੋਰੈਂਟਾਂ ਅਤੇ ਹੋਰ ਉਦਯੋਗਿਕ ਇਕਾਈਆਂ ਨੂੰ ਕੰਮਕਾਜ ਵਿੱਚ ਕਾਫੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪਿਆ ਸੀ। ਪਰ ਹੁਣ ਹਾਲਾਤ ਸੁਧਰਨ ਤੋਂ ਬਾਅਦ ਪਾਬੰਦੀਆਂ ਹਟਾ ਦਿੱਤੀਆਂ ਗਈਆਂ ਹਨ, ਜਿਸ ਨਾਲ ਵਪਾਰੀਆਂ ਨੇ ਸੁੱਖ ਦਾ ਸਾਹ ਲਿਆ ਹੈ ਅਤੇ ਉਦਯੋਗਿਕ ਗਤੀਵਿਧੀਆਂ ਦੇ ਮੁੜ ਤੇਜ਼ ਹੋਣ ਦੀ ਉਮੀਦ ਹੈ।