ਲਖਨਊ ਅਗਨੀਕਾਂਡ: ਅੱਗ ਦੀ ਲਪੇਟ 'ਚ ਆਏ 15 ਲੋਕਾਂ ਨੇ ਤੋੜਿਆ ਦਮ, ਜ਼ਖ਼ਮੀ ਵਿਦਿਆਰਥੀ ਤੇ ਮੁਲਾਜ਼ਮ ਜ਼ੇਰੇ ਇਲਾਜ, ਇਲਾਕੇ 'ਚ ਸੋਗ ਦੀ ਲਹਿਰ

ਅਜੇ ਲੋਕ ਦਿੱਲੀ ਦੇ ਹੋਟਲ ਵਾਲੇ ਅਗਨੀਕਾਂਡ ਨੂੰ ਹੀ ਨਹੀਂ ਸੀ ਭੁੱਲੇ, ਮੁੜ ਦੇਸ਼ ਵਿੱਚ ਇੱਕ ਹੋਰ ਅਗਨੀਕਾਂਡ ਹੋ ਗਿਆ। ਜੀ ਹਾਂ ਬੀਤੇ ਦਿਨ ਲਖਨਊ ਦੇ ਅਲੀਗੰਜ ਸਥਿਤ ਪੁਰਨੀਆ ਇਲਾਕੇ ਵਿੱਚ ਸੋਮਵਾਰ (22 ਜੂਨ) ਨੂੰ ਇੱਕ ਨਿੱਜੀ ਕੋਚਿੰਗ ਸੈਂਟਰ ਵਿੱਚ ਭਿਆਨਕ ਅੱਗ ਲੱਗ ਗਈ। ਇਸ ਦਰਦਨਾਕ ਹਾਦਸੇ ਵਿੱਚ ਹੁਣ ਤੱਕ 15 ਵਿਦਿਆਰਥੀਆਂ ਦੀ ਮੌਤ ਹੋ ਚੁੱਕੀ ਹੈ ਅਤੇ ਕਈ ਹੋਰ ਜ਼ਖ਼ਮੀ ਹੋ ਗਏ ਹਨ। ਜ਼ਖ਼ਮੀਆਂ ਵਿੱਚ ਜਯੰਤ, ਲਵਪ੍ਰੀਤ, ਮੁਹੰਮਦ ਆਸਿਫ਼, ਭੁਵਨ ਸ੍ਰੀਵਾਸਤਵ, ਪੰਕਜ, ਸ਼ੈਲੇਂਦਰ, ਅਭਿਸ਼ੇਕ, ਪੰਕਜ ਜੋਸ਼ੀ ਅਤੇ ਗੌਰਵ ਕੁਮਾਰ ਸ਼ਾਮਲ ਹਨ। ਇਸ ਭਿਆਨਕ ਅੱਗ ਨੇ 15 ਘਰਾਂ ਦੇ ਚਿਰਾਗ ਬੁਝਾ ਦਿੱਤੇ ਹਨ। ਜਿਨ੍ਹਾਂ ਲੋਕਾਂ ਨੇ ਆਪਣੀ ਜਾਨ ਗਵਾਈ, ਉਨ੍ਹਾਂ ਵਿੱਚੋਂ ਕਿਸੇ ਦਾ ਵਿਆਹ ਹੋਣ ਵਾਲਾ ਸੀ ਅਤੇ ਕੋਈ ਆਪਣੇ ਮਾਪਿਆਂ ਦਾ ਇਕਲੌਤਾ ਸਹਾਰਾ ਸੀ। 

ਦਸੰਬਰ 'ਚ ਹੋਣਾ ਸੀ ਵਿਆਹ

ਨੀਲੇਸ਼ ਅਤੇ ਅਨਾਮਿਕਾ ਦਾ ਇਸ ਸਾਲ ਦਸੰਬਰ ਵਿੱਚ ਵਿਆਹ ਹੋਣ ਵਾਲਾ ਸੀ। ਉਹ ਦੋਵੇਂ ਇਕੱਠੇ ਕੰਮ ਕਰਦੇ ਸਨ, ਪਰ ਵਿਆਹ ਦੀਆਂ ਖੁਸ਼ੀਆਂ ਤੋਂ ਪਹਿਲਾਂ ਹੀ ਉਨ੍ਹਾਂ ਦੀ ਮੌਤ ਦੀ ਖ਼ਬਰ ਆ ਗਈ। ਇਸ ਹਾਦਸੇ ਵਿੱਚ ਨੀਲੇਸ਼ ਅਤੇ ਅਨਾਮਿਕਾ ਦੋਵਾਂ ਦੀ ਮੌਤ ਹੋ ਗਈ ਹੈ, ਜਿਸ ਨੇ ਉਨ੍ਹਾਂ ਦੇ ਪਰਿਵਾਰਾਂ ਦੀ ਦੁਨੀਆ ਹੀ ਉਜਾੜ ਦਿੱਤੀ ਹੈ। ਇਸ ਦਰਦਨਾਕ ਹਾਦਸੇ ਵਿੱਚ ਅਬਦੁੱਲ ਰਹਿਮਾਨ ਨੇ ਵੀ ਦੁਨੀਆ ਨੂੰ ਅਲਵਿਦਾ ਕਹਿ ਦਿੱਤਾ, ਜੋ ਆਪਣੇ ਪਰਿਵਾਰ ਦਾ ਇਕਲੌਤਾ ਕਮਾਉਣ ਵਾਲਾ ਸੀ। ਉਨ੍ਹਾਂ ਦੀ ਮੌਤ ਨਾਲ ਹੁਣ ਉਨ੍ਹਾਂ ਦਾ ਪਰਿਵਾਰ ਵੱਡੇ ਸੰਕਟ ਵਿੱਚ ਆ ਗਿਆ ਹੈ।

ਇਕਲੌਤੇ ਪੁੱਤਰ ਦੀ ਮੌਤ, ਮਾਪੇ ਨਹੀਂ ਪਹੁੰਚ ਪਾਏ ਮੋਰਚਰੀ 

ਇਸ ਹਾਦਸੇ ਵਿੱਚ ਘਰ ਦੇ ਇਕਲੌਤੇ ਪੁੱਤਰ ਅਬਦੁਲ ਰਹਿਮਾਨ ਦੀ ਵੀ ਮੌਤ ਹੋ ਗਈ। ਅਬਦੁਲ ਰਹਿਮਾਨ ਆਪਣੇ ਮਾਤਾ-ਪਿਤਾ ਨਾਲ ਰਹਿੰਦਾ ਸੀ। ਉਸਦੇ ਦੋਸਤਾਂ ਅਨੁਸਾਰ, ਉਹ ਇੱਕ ਆਈਟੀ ਟੈਕਨੀਸ਼ੀਅਨ ਸੀ ਅਤੇ ਲੰਬੇ ਸਮੇਂ ਤੱਕ ਨੌਕਰੀ ਲੱਭਣ ਤੋਂ ਬਾਅਦ ਇੱਥੇ ਕੰਮ ਕਰ ਰਿਹਾ ਸੀ। ਉਸਦੀ ਮੌਤ ਦੇ ਸਮੇਂ ਉਸਦੇ ਮਾਤਾ-ਪਿਤਾ ਬਿਮਾਰ ਸਨ, ਜਿਸ ਕਾਰਨ ਉਹ ਮੋਰਚਰੀ ਵਿੱਚ ਪਈ ਲਾਸ਼ ਨੂੰ ਲੈਣ ਲਈ ਨਹੀਂ ਪਹੁੰਚ ਸਕੇ।

ਕੋਚਿੰਗ ਸੈਂਟਰ ਵਿੱਚ ਅੱਗ ਕਿਵੇਂ ਲੱਗੀ?

ਅਲੀਗੰਜ ਦੇ ਪੁਰਨੀਆ ਇਲਾਕੇ ਵਿੱਚ ਸਥਿਤ ਇੱਕ ਬਹੁ-ਮੰਜ਼ਿਲਾ ਇਮਾਰਤ ਵਿੱਚ ਕੱਲ੍ਹ ਦੁਪਹਿਰ ਤੋਂ ਬਾਅਦ ਅਚਾਨਕ ਅੱਗ ਲੱਗ ਗਈ। ਅੱਗ ਲੱਗਣ ਕਾਰਨ ਪੂਰੀ ਇਮਾਰਤ ਵਿੱਚ ਧੂੰਆਂ ਭਰ ਗਿਆ, ਜਿਸ ਨਾਲ ਉੱਥੇ ਮੌਜੂਦ ਵਿਦਿਆਰਥੀਆਂ ਅਤੇ ਕਰਮਚਾਰੀਆਂ ਵਿੱਚ ਹਫੜਾ-ਦਫੜੀ ਮਚ ਗਈ। ਘਟਨਾ ਦੀ ਸੂਚਨਾ ਮਿਲਦਿਆਂ ਹੀ ਫਾਇਰ ਬ੍ਰਿਗੇਡ, ਪੁਲਿਸ, ਐਸ.ਡੀ.ਆਰ.ਐਫ. ਅਤੇ ਐਨ.ਡੀ.ਆਰ.ਐਫ. ਦੀਆਂ ਟੀਮਾਂ ਮੌਕੇ 'ਤੇ ਪਹੁੰਚ ਗਈਆਂ ਅਤੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤੇ।

ਹਾਦਸੇ ਵਿੱਚ ਮਰਨ ਵਾਲੇ ਕੌਣ ਸਨ?

ਇਸ ਦੁਖਦਾਈ ਘਟਨਾ ਵਿੱਚ ਮਰਨ ਵਾਲਿਆਂ ਅਤੇ ਜ਼ਖ਼ਮੀਆਂ ਦੇ ਨਾਮ ਸਾਹਮਣੇ ਆਏ ਹਨ। ਜਿਨ੍ਹਾਂ ਲੋਕਾਂ ਨੇ ਆਪਣੀ ਜਾਨ ਗਵਾਈ, ਉਨ੍ਹਾਂ ਵਿੱਚ ਸਾਗਰ, ਨੀਲੇਸ਼, ਅਨਾਮਿਕਾ, ਸੰਯਮ, ਅਨੁਸ਼ਾ, ਸੁਖਮਨੀ, ਆਦਿਤਿਆ ਸ੍ਰੀਵਾਸਤਵ, ਜੋਤੀ, ਭਵਿੱਖ, ਅਬਦੁਲ ਰਹਿਮਾਨ, ਸੂਰਜ, ਸ਼ਹਿਜ਼ਾਨ, ਜਯਨਿਲ ਚੱਕਰਵਰਤੀ, ਮੁਹੰਮਦ ਅੰਮਾਰ ਅਤੇ ਸੁਮਲਿਆ ਸ਼ਾਮਲ ਹਨ।

ਜ਼ਖ਼ਮੀਆਂ ਨੂੰ ਕੇ.ਜੀ.ਐਮ.ਯੂ. (KGMU) ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ ਹੈ। ਇਸ ਦੁਖਦਾਈ ਘਟਨਾ ਵਿੱਚ ਜਾਨ ਗਵਾਉਣ ਵਾਲਿਆਂ ਦੇ ਪਰਿਵਾਰਾਂ ਲਈ 5 ਲੱਖ ਰੁਪਏ ਅਤੇ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋਏ ਲੋਕਾਂ ਲਈ 50,000 ਰੁਪਏ ਦੀ ਤੁਰੰਤ ਆਰਥਿਕ ਸਹਾਇਤਾ ਦਾ ਐਲਾਨ ਕੀਤਾ ਗਿਆ ਹੈ। ਸਰਕਾਰ ਇਸ ਹਾਦਸੇ ਨੂੰ ਲੈ ਕੇ ਲਗਾਤਾਰ ਕਾਰਵਾਈ ਕਰ ਰਹੀ ਹੈ ਅਤੇ ਮੁੱਖ ਮੰਤਰੀ ਨੇ ਘਟਨਾ ਦੀ ਉੱਚ ਪੱਧਰੀ ਜਾਂਚ ਦੇ ਹੁਕਮ ਦਿੱਤੇ ਹਨ।

ਬ੍ਰਿਗੇਡ ਦੀਆਂ ਕਰੀਬ 10 ਗੱਡੀਆਂ ਨੇ ਪਾਇਆ ਅੱਗ 'ਤੇ ਕਾਬੂ

ਰਾਹਤ ਅਤੇ ਬਚਾਅ ਕਾਰਜਾਂ ਦੌਰਾਨ ਫਾਇਰ ਬ੍ਰਿਗੇਡ ਦੀਆਂ ਕਰੀਬ 10 ਗੱਡੀਆਂ ਨੇ ਅੱਗ 'ਤੇ ਕਾਬੂ ਪਾਇਆ। ਬਚਾਅ ਟੀਮ ਨੇ ਇਮਾਰਤ ਦੀ ਪਿਛਲੀ ਕੰਧ ਤੋੜ ਕੇ ਅੰਦਰ ਫਸੇ ਲੋਕਾਂ ਤੱਕ ਪਹੁੰਚਣ ਦੀ ਕੋਸ਼ਿਸ਼ ਕੀਤੀ, ਇਸੇ ਰਸਤੇ ਰਾਹੀਂ ਕਈ ਲਾਸ਼ਾਂ ਨੂੰ ਬਾਹਰ ਕੱਢਿਆ ਗਿਆ। ਅਧਿਕਾਰੀਆਂ ਅਨੁਸਾਰ, ਇਮਾਰਤ ਦੀ ਪੂਰੀ ਤਰ੍ਹਾਂ ਤਲਾਸ਼ੀ ਲਈ ਜਾ ਚੁੱਕੀ ਹੈ ਅਤੇ ਹੁਣ ਉੱਥੇ ਕਿਸੇ ਦੇ ਫਸੇ ਹੋਣ ਦਾ ਕੋਈ ਖਦਸ਼ਾ ਨਹੀਂ ਹੈ।

ਹਾਦਸੇ ਤੋਂ ਬਾਅਦ ਹੁਣ ਤੱਕ ਕੀ ਕਾਰਵਾਈ ਹੋਈ?

ਇਸ ਹਾਦਸੇ ਤੋਂ ਬਾਅਦ ਪ੍ਰਸ਼ਾਸਨ ਕਾਫ਼ੀ ਸਖ਼ਤ ਦਿਖਾਈ ਦੇ ਰਿਹਾ ਹੈ। ਘਟਨਾ ਤੋਂ ਬਾਅਦ ਬਿਲਡਿੰਗ ਮਾਲਕ ਵੀਰੇਂਦਰ ਸ਼ੁਕਲਾ, ਪੈੱਟ ਸ਼ੌਪ ਦੇ ਮਾਲਕ ਰਾਮ ਕ੍ਰਿਸ਼ਨ ਉਪਾਧਿਆਏ ਅਤੇ ਐਨੀਮੇਸ਼ਨ ਕੋਚਿੰਗ ਦੇ ਸੰਚਾਲਕ ਤੁਸ਼ਾਕ ਕ੍ਰਿਸ਼ਨਾ ਜੈਸਵਾਲ ਨੂੰ ਪੁਲਿਸ ਨੇ ਗ੍ਰਿਫਤਾਰ ਕਰ ਲਿਆ ਹੈ। ਇਸ ਦੇ ਨਾਲ ਹੀ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ (Yogi Adityanath) ਦੇ ਨਿਰਦੇਸ਼ਾਂ 'ਤੇ ਚਾਰ ਅਧਿਕਾਰੀਆਂ 'ਤੇ ਗਾਜ ਡਿੱਗੀ ਹੈ, ਜਿਨ੍ਹਾਂ ਨੂੰ ਤੁਰੰਤ ਪ੍ਰਭਾਵ ਨਾਲ ਮੁਅੱਤਲ (ਸਸਪੈਂਡ) ਕਰ ਦਿੱਤਾ ਗਿਆ ਹੈ। ਇਸ ਘਟਨਾ ਦੀ ਜਾਂਚ ਲਈ 2 ਮੈਂਬਰੀ ਐਸ.ਆਈ.ਟੀ. (SIT) ਦਾ ਗਠਨ ਵੀ ਕੀਤਾ ਗਿਆ ਹੈ, ਜੋ ਪੂਰੇ ਮਾਮਲੇ ਦੀ ਜਾਂਚ ਕਰਕੇ 7 ਦਿਨਾਂ ਦੇ ਅੰਦਰ ਮੁੱਖ ਮੰਤਰੀ ਨੂੰ ਰਿਪੋਰਟ ਸੌਂਪੇਗੀ।