EPFO ਖਾਤਾਧਾਰਕਾਂ ਲਈ ਖੁਸ਼ਖਬਰੀ! ATM ਤੋਂ ਮਿਲੇਗੀ ਕੈਸ਼ ਕਢਵਾਉਣ ਦੀ ਸਹੂਲਤ, ਪੈਨਸ਼ਨ 7.5 ਗੁਣਾ ਵਧਾਉਣ 'ਤੇ ਵਿਚਾਰ

ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ (EPFO) ਨੂੰ ਲੈ ਕੇ ਇੱਕ ਵੱਡਾ ਅਪਡੇਟ ਸਾਹਮਣੇ ਆ ਰਿਹਾ ਹੈ। ਸਰਕਾਰ ਪੀਐੱਫ ਰਜਿਸਟਰਡ ਕਰਮਚਾਰੀਆਂ ਨੂੰ ਫਾਇਦਾ ਪਹੁੰਚਾਉਣ ਲਈ ਕਈ ਅਹਿਮ ਯੋਜਨਾਵਾਂ 'ਤੇ ਵਿਚਾਰ ਕਰ ਰਹੀ ਹੈ। ਖਾਸ ਤੌਰ 'ਤੇ ਪੈਨਸ਼ਨ ਵਿੱਚ ਯੋਗਦਾਨ ਪਾਉਣ ਵਾਲੇ ਕਰਮਚਾਰੀਆਂ ਨੂੰ ਵੱਡੀ ਰਾਹਤ ਦੇਣ ਦੀ ਤਿਆਰੀ ਹੈ। ਖ਼ਬਰਾਂ ਮੁਤਾਬਕ ਸਰਕਾਰ EPS-95 ਪੈਨਸ਼ਨ ਦੀ ਰਾਸ਼ੀ ਨੂੰ ਵਧਾਉਣ ਬਾਰੇ ਗੰਭੀਰਤਾ ਨਾਲ ਚਰਚਾ ਕਰ ਰਹੀ ਹੈ, ਤਾਂ ਜੋ ਸੇਵਾਮੁਕਤ ਕਰਮਚਾਰੀਆਂ ਨੂੰ ਬਿਹਤਰ ਵਿੱਤੀ ਸੁਰੱਖਿਆ ਮਿਲ ਸਕੇ।

ਪੈਨਸ਼ਨ 'ਚ ਹੋਵੇਗਾ ਵੱਡਾ ਵਾਧਾ

ਮਜ਼ਦੂਰ ਜਥੇਬੰਦੀਆਂ ਲਗਾਤਾਰ ਮੰਗ ਕਰ ਰਹੀਆਂ ਹਨ ਕਿ ਸਰਕਾਰ EPS ਦੇ ਤਹਿਤ ਮਿਲਣ ਵਾਲੀ ਘੱਟੋ-ਘੱਟ ਪੈਨਸ਼ਨ ਨੂੰ 1,000 ਰੁਪਏ ਤੋਂ ਵਧਾ ਕੇ 7,500 ਰੁਪਏ ਕਰੇ। ਜੇਕਰ ਸਰਕਾਰ ਪੈਨਸ਼ਨ ਨਾਲ ਸਬੰਧਤ ਇਸ ਤਜਵੀਜ਼ ਨੂੰ ਪ੍ਰਵਾਨ ਕਰ ਲੈਂਦੀ ਹੈ, ਤਾਂ ਪੈਨਸ਼ਨ ਵਿੱਚ ਸਿੱਧਾ 7.5 ਗੁਣਾ ਵਾਧਾ ਹੋਵੇਗਾ। ਜ਼ਿਕਰਯੋਗ ਹੈ ਕਿ ਸੰਸਦੀ ਕਮੇਟੀ ਨੇ ਵੀ ਪੈਨਸ਼ਨ ਵਧਾਉਣ ਦੀ ਸਿਫ਼ਾਰਸ਼ ਕੀਤੀ ਹੈ। ਇਸ ਤੋਂ ਇਲਾਵਾ, ਸਰਕਾਰ ਨੇ ਪੀਐੱਫ (PF) ਕਰਮਚਾਰੀਆਂ ਦੇ ਵਿਆਜ ਦੀ ਰਕਮ ਨੂੰ ਜਲਦ ਤੋਂ ਜਲਦ ਉਨ੍ਹਾਂ ਦੇ ਖਾਤਿਆਂ ਵਿੱਚ ਜਮ੍ਹਾਂ ਕਰਨ ਦਾ ਭਰੋਸਾ ਵੀ ਦਿੱਤਾ ਹੈ।

ਮਨਜ਼ੂਰੀ ਦਾ ਇੰਤਜ਼ਾਰ

ਪੀ.ਐੱਫ. ਖਾਤਾਧਾਰਕਾਂ ਦੇ ਖਾਤਿਆਂ ਵਿੱਚ 8.25% ਵਿਆਜ ਦੀ ਰਕਮ ਜਲਦ ਹੀ ਜਮ੍ਹਾਂ ਹੋ ਸਕਦੀ ਹੈ, ਜਿਸ ਦਾ ਕਰਮਚਾਰੀ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੇ ਹਨ। ਫਿਲਹਾਲ ਵਿੱਤ ਮੰਤਰਾਲੇ ਦੀ ਮਨਜ਼ੂਰੀ ਦਾ ਇੰਤਜ਼ਾਰ ਕੀਤਾ ਜਾ ਰਿਹਾ ਹੈ ਅਤੇ ਹਰੀ ਝੰਡੀ ਮਿਲਦੇ ਹੀ ਪੈਸਾ ਖਾਤਿਆਂ ਵਿੱਚ ਟ੍ਰਾਂਸਫਰ ਕਰ ਦਿੱਤਾ ਜਾਵੇਗਾ। ਅਜਿਹੀ ਸੰਭਾਵਨਾ ਜਤਾਈ ਜਾ ਰਹੀ ਹੈ ਕਿ ਮਈ ਦੇ ਮਹੀਨੇ ਵਿੱਚ ਪੀ.ਐੱਫ. ਦਾ ਵਿਆਜ ਕਰਮਚਾਰੀਆਂ ਦੇ ਖਾਤਿਆਂ ਵਿੱਚ ਆ ਸਕਦਾ ਹੈ।

ਈਪੀਐੱਫਓ (EPFO) ਪੋਰਟਲ ਵਿੱਚ ਕਈ ਤਕਨੀਕੀ ਬਦਲਾਅ ਕੀਤੇ ਜਾ ਰਹੇ ਹਨ, ਜਿਨ੍ਹਾਂ ਨੂੰ ਜਲਦ ਹੀ ਲਾਗੂ ਕੀਤਾ ਜਾ ਸਕਦਾ ਹੈ। ਸਭ ਤੋਂ ਵੱਡਾ ਬਦਲਾਅ ATM ਰਾਹੀਂ PF ਕਢਵਾਉਣ ਦੀ ਸਹੂਲਤ ਨੂੰ ਲੈ ਕੇ ਹੋਣ ਜਾ ਰਿਹਾ ਹੈ। ਇਸ ਸੁਵਿਧਾ ਦੇ ਸ਼ੁਰੂ ਹੋਣ ਨਾਲ ਮੈਂਬਰਾਂ ਲਈ ਆਪਣੇ ਪੀ.ਐੱਫ. ਦੇ ਪੈਸੇ ਤੱਕ ਪਹੁੰਚ ਬਹੁਤ ਆਸਾਨ ਹੋ ਜਾਵੇਗੀ। ਇਸ ਤੋਂ ਬਾਅਦ, ਬਿਲਕੁਲ ਸੇਵਿੰਗ ਖਾਤੇ ਵਾਂਗ, ਕਰਮਚਾਰੀ ਆਪਣੇ ਪੀ.ਐੱਫ. ਖਾਤੇ ਵਿੱਚੋਂ ਵੀ ਏ.ਟੀ.ਐੱਮ. ਕਾਰਡ ਰਾਹੀਂ ਪੈਸੇ ਕਢਵਾ ਸਕਣਗੇ। ਉਮੀਦ ਕੀਤੀ ਜਾ ਰਹੀ ਹੈ ਕਿ ਇਹ ਨਵਾਂ ਨਿਯਮ ਜਲਦ ਹੀ ਅਮਲ ਵਿੱਚ ਆ ਜਾਵੇਗਾ।

ਈਪੀਐੱਫਓ (EPFO) ਨੇ ਕਲੇਮ ਸੈਟਲਮੈਂਟ ਦੇ ਮਾਮਲੇ ਵਿੱਚ ਇੱਕ ਨਵਾਂ ਰਿਕਾਰਡ ਕਾਇਮ ਕੀਤਾ ਹੈ। ਵਿੱਤ ਵਰ੍ਹੇ 2025-26 ਦੌਰਾਨ ਸੰਸਥਾ ਵੱਲੋਂ ਕੁੱਲ 8.31 ਕਰੋੜ ਕਲੇਮਾਂ ਦਾ ਨਿਪਟਾਰਾ ਕੀਤਾ ਗਿਆ, ਜੋ ਕਿ ਪਿਛਲੇ ਸਾਲ ਦੇ 6.01 ਕਰੋੜ ਕਲੇਮਾਂ ਦੇ ਮੁਕਾਬਲੇ ਇੱਕ ਵੱਡੀ ਪ੍ਰਾਪਤੀ ਹੈ। 

ਡਿਜੀਟਲ ਸਹੂਲਤਾਂ ਨੇ EPFO ਦੀ ਪ੍ਰਕਿਰਿਆ ਨੂੰ ਬਹੁਤ ਆਸਾਨ ਬਣਾ ਦਿੱਤਾ ਹੈ। ਤਾਜ਼ਾ ਅੰਕੜਿਆਂ ਅਨੁਸਾਰ, 6.68 ਕਰੋੜ ਕਲੇਮ ਬਿਨਾਂ ਚੈੱਕ ਦੀ ਫੋਟੋ ਅਪਲੋਡ ਕੀਤੇ ਨਿਪਟਾਏ ਗਏ ਅਤੇ 1.59 ਕਰੋੜ ਖਾਤਿਆਂ ਵਿੱਚ ਬਿਨਾਂ ਮਾਲਕ (employer) ਦੀ ਮਨਜ਼ੂਰੀ ਦੇ ਬੈਂਕ ਖਾਤੇ ਲਿੰਕ ਕੀਤੇ ਗਏ ਹਨ। ਇਸ ਤੋਂ ਇਲਾਵਾ, 70.55 ਲੱਖ ਟ੍ਰਾਂਸਫਰ ਕਲੇਮ ਆਟੋ-ਪ੍ਰੋਸੈਸ ਕੀਤੇ ਗਏ ਅਤੇ 29.34 ਲੱਖ ਮੈਂਬਰਾਂ ਨੇ ਖੁਦ ਆਪਣੀ ਪ੍ਰੋਫਾਈਲ ਅਪਡੇਟ ਕੀਤੀ। ਅਪ੍ਰੈਲ 2026 ਦੌਰਾਨ ਕੁੱਲ 61.03 ਲੱਖ ਕਲੇਮਾਂ ਦਾ ਨਿਪਟਾਰਾ ਕੀਤਾ ਗਿਆ, ਜਿਨ੍ਹਾਂ ਵਿੱਚੋਂ 98.70% ਕਲੇਮ 20 ਦਿਨਾਂ ਤੋਂ ਵੀ ਘੱਟ ਸਮੇਂ ਵਿੱਚ ਹੱਲ ਕਰ ਦਿੱਤੇ ਗਏ।

ਨਵੀਂ ਪਹਿਲ: ਈ-ਪ੍ਰਾਪਤੀ (E-PRAAPTI) ਪੋਰਟਲ

ਈਪੀਐੱਫਓ (EPFO) ਨੇ ਇੱਕ ਨਵੀਂ ਪਹਿਲ ਕਰਦਿਆਂ ‘ਈ-ਪ੍ਰਾਪਤੀ’ ਪੋਰਟਲ ਦੀ ਸ਼ੁਰੂਆਤ ਕੀਤੀ ਹੈ। ਇਸ ਨਵੇਂ ਪਲੇਟਫਾਰਮ ਦੇ ਤਹਿਤ, ਹੁਣ ਨਿਸ਼ਕਿਰਿਆ (ਇਨਐਕਟਿਵ) ਪੀ.ਐੱਫ. ਖਾਤਿਆਂ ਨੂੰ ਸਰਗਰਮ ਕਰਨਾ ਬਹੁਤ ਸੌਖਾ ਹੋ ਜਾਵੇਗਾ। ਆਧਾਰ-ਅਧਾਰਿਤ ਐਕਸੈਸ ਰਾਹੀਂ ਪੁਰਾਣੇ ਖਾਤਿਆਂ ਨੂੰ ਮੌਜੂਦਾ ਖਾਤਿਆਂ ਨਾਲ ਜੋੜਨਾ ਹੁਣ ਪਹਿਲਾਂ ਨਾਲੋਂ ਕਿਤੇ ਜ਼ਿਆਦਾ ਆਸਾਨ ਹੋਵੇਗਾ। ਇਸ ਸਹੂਲਤ ਦਾ ਸਭ ਤੋਂ ਵੱਡਾ ਫਾਇਦਾ ਉਨ੍ਹਾਂ ਖਾਤਿਆਂ ਨੂੰ ਮਿਲੇਗਾ ਜੋ UAN ਨਾਲ ਲਿੰਕ ਨਹੀਂ ਹਨ। ਇਸ ਤੋਂ ਇਲਾਵਾ, ਆਉਣ ਵਾਲੇ ਸਮੇਂ ਵਿੱਚ ਬਿਨਾਂ ਮੈਂਬਰ ਆਈਡੀ (Member ID) ਵਾਲੇ ਉਪਭੋਗਤਾ ਵੀ ਇਸ ਡਿਜੀਟਲ ਸੁਵਿਧਾ ਦਾ ਲਾਭ ਲੈ ਸਕਣਗੇ।