ਅਮਰੀਕਾ 'ਚ ਪੰਜਾਬੀ ਟਰੱਕ ਡਰਾਈਵਰ ਨੂੰ ਵੱਡੀ ਸਜ਼ਾ: 75 ਸਾਲ ਦੀ ਕੈਦ, 55 ਸਾਲ ਤੱਕ ਨਹੀਂ ਮਿਲੇਗੀ ਜ਼ਮਾਨਤ, ਜਾਣੋ ਪੂਰਾ ਮਾਮਲਾ ਹੈ ਕੀ?

ਅਮਰੀਕਾ ਤੋਂ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਜਿੱਥੇ ਇੱਕ ਅਦਾਲਤ ਨੇ ਪੰਜਾਬੀ ਮੂਲ ਦੇ 30 ਸਾਲਾ ਟਰੱਕ ਡਰਾਈਵਰ ਨੂੰ 75 ਸਾਲ ਦੀ ਸਜ਼ਾ ਸੁਣਾਈ ਹੈ। ਉਸ ਕੋਲੋਂ 90 ਕਰੋੜ ਰੁਪਏ ਦੀ 106 ਕਿੱਲੋ ਕੋਕੀਨ ਬਰਾਮਦ ਹੋਈ ਸੀ, ਜਿਸ ਨੂੰ ਉਹ ਕੂੜੇ ਦੇ ਪੈਕਟਾਂ ਵਿੱਚ ਲੁਕਾ ਕੇ ਲਿਜਾ ਰਿਹਾ ਸੀ। ਹਾਲਾਂਕਿ ਡਰਾਈਵਰ ਨੇ ਦਾਅਵਾ ਕੀਤਾ ਕਿ ਉਸ ਨੂੰ ਇਸ ਬਾਰੇ ਕੋਈ ਜਾਣਕਾਰੀ ਨਹੀਂ ਸੀ, ਪਰ ਉਸ ਦੀ ਵਟਸਐਪ ਚੈਟ ਤੋਂ ਇਹ ਖੁਲਾਸਾ ਹੋਇਆ ਕਿ ਉਸ ਨੇ ਕੋਕੀਨ ਦੀ ਡਿਲੀਵਰੀ ਬਦਲੇ 5400 ਡਾਲਰ ਵਿੱਚ ਸੌਦਾ ਕੀਤਾ ਸੀ। ਇਸ ਸਜ਼ਾ ਤਹਿਤ ਉਸ ਨੂੰ 55 ਸਾਲਾਂ ਤੱਕ ਜ਼ਮਾਨਤ ਨਹੀਂ ਮਿਲੇਗੀ, ਜਿਸ ਕਾਰਨ ਉਹ 85 ਸਾਲ ਦੀ ਉਮਰ ਤੋਂ ਬਾਅਦ ਹੀ ਬਾਹਰ ਆ ਸਕੇਗਾ। ਅਦਾਲਤ ਨੇ ਉਸ ਵੱਲੋਂ ਜੇਲ੍ਹ ਵਿੱਚ ਬਿਤਾਏ 407 ਦਿਨਾਂ ਨੂੰ ਵੀ ਇਸ ਸਜ਼ਾ ਵਿੱਚ ਸ਼ਾਮਲ ਕਰ ਲਿਆ ਹੈ।

ਇੰਝ ਪੁਲਿਸ ਨੇ ਬਰਾਮਦ ਕੀਤੀ ਕੋਕੀਨ 

ਇਹ ਘਟਨਾ 17 ਅਪ੍ਰੈਲ 2025 ਦੀ ਹੈ, ਜਦੋਂ ਇਲੀਨੋਇਸ ਸਟੇਟ ਪੁਲਿਸ (IPS) ਨੇ ਇੰਟਰਸਟੇਟ-74 'ਤੇ ਲੇਰੌਏ (LeRoy) ਨੇੜੇ ਇੱਕ ਸੈਮੀ-ਟਰੱਕ ਨੂੰ ਸੁਰੱਖਿਆ ਜਾਂਚ ਲਈ ਰੋਕਿਆ, ਜਿਸ ਨੂੰ ਜੋਬਨਪ੍ਰੀਤ ਸਿੰਘ ਚਲਾ ਰਿਹਾ ਸੀ। ਜਾਂਚ ਦੌਰਾਨ, ਇੱਕ ਕੇ-9 ਡੌਗ (ਖੋਜੀ ਕੁੱਤੇ) ਦੀ ਮਦਦ ਨਾਲ ਟਰੱਕ ਦੇ ਰੈਫ੍ਰਿਜਰੇਟਡ ਟ੍ਰੇਲਰ ਦੇ ਅੰਦਰੋਂ 4 ਵੱਡੇ ਕਾਲੇ ਕੂੜੇ ਦੇ ਬੈਗ ਬਰਾਮਦ ਕੀਤੇ ਗਏ। ਇਹਨਾਂ ਬੈਗਾਂ ਦੇ ਵਿੱਚੋਂ ਲਗਭਗ 234 ਪੌਂਡ, ਯਾਨੀ 106 ਕਿਲੋਗ੍ਰਾਮ ਕੋਕੀਨ ਮਿਲੀ।

ਬਰਾਮਦ ਕੋਕੀਨ ਦੀ ਕੀਮਤ ਕਰੋੜਾਂ ‘ਚ

ਪੁਲਿਸ ਅਧਿਕਾਰੀਆਂ ਅਨੁਸਾਰ, ਜੋਬਨਪ੍ਰੀਤ ਨੇ ਇਸ਼ਾਰਾ ਮਿਲਣ ਤੋਂ ਬਾਅਦ ਵੀ ਗੱਡੀ ਰੋਕਣ ਵਿੱਚ ਦੇਰੀ ਕੀਤੀ ਸੀ ਅਤੇ ਪੁੱਛਗਿੱਛ ਦੌਰਾਨ ਉਹ ਕਾਫ਼ੀ ਘਬਰਾਇਆ ਹੋਇਆ ਸੀ। ਉਸ ਕੋਲੋਂ ਬਰਾਮਦ ਕੀਤੀ ਗਈ ਕੋਕੀਨ ਦੀ ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਕੀਮਤ ਲਗਭਗ 10.6 ਮਿਲੀਅਨ ਡਾਲਰ, ਯਾਨੀ ਲਗਭਗ 90 ਕਰੋੜ ਰੁਪਏ ਦੱਸੀ ਗਈ ਹੈ।

ਇਸ ਮਾਮਲੇ ਵਿੱਚ ਕਾਨੂੰਨੀ ਕਾਰਵਾਈ ਕਰਦੇ ਹੋਏ, ਮਾਰਚ 2026 ਵਿੱਚ ਜਿਊਰੀ ਨੇ ਜੋਬਨਪ੍ਰੀਤ ਸਿੰਘ ਨੂੰ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਅਤੇ ਉਨ੍ਹਾਂ ਨੂੰ ਸਪਲਾਈ ਕਰਨ ਦੇ ਇਰਾਦੇ ਦਾ ਦੋਸ਼ੀ ਪਾਇਆ। ਇਸ ਤੋਂ ਬਾਅਦ 29 ਮਈ 2026 ਨੂੰ ਜੱਜ ਵਿਲੀਅਮ ਯੋਡਰ ਨੇ ਉਸ ਨੂੰ 75 ਸਾਲ ਦੀ ਸਖ਼ਤ ਸਜ਼ਾ ਸੁਣਾਈ। ਹਾਲਾਂਕਿ, ਜੋਬਨਪ੍ਰੀਤ ਨੂੰ ਪਹਿਲਾਂ ਤੋਂ ਜੇਲ੍ਹ ਵਿੱਚ ਬਿਤਾਏ ਗਏ 407 ਦਿਨਾਂ ਦਾ ਕ੍ਰੈਡਿਟ ਵੀ ਦਿੱਤਾ ਗਿਆ ਹੈ।

ਅਦਾਲਤ ਵਿੱਚ ਸੁਣਵਾਈ ਦੌਰਾਨ ਜੋਬਨਪ੍ਰੀਤ ਸਿੰਘ ਨੇ ਆਪਣਾ ਬਚਾਅ ਕਰਦਿਆਂ ਦਾਅਵਾ ਕੀਤਾ ਸੀ ਕਿ ਉਸ ਨੂੰ ਟਰੱਕ ਵਿੱਚ ਨਸ਼ੀਲੇ ਪਦਾਰਥ (ਡਰੱਗਜ਼) ਹੋਣ ਦੀ ਕੋਈ ਜਾਣਕਾਰੀ ਨਹੀਂ ਸੀ ਅਤੇ ਉਹ ਸਿਰਫ਼ ਇੱਕ ਕਾਨੂੰਨੀ (ਵੈਧ) ਸਾਮਾਨ ਹੀ ਢੋ ਰਿਹਾ ਸੀ। ਹਾਲਾਂਕਿ, ਸਰਕਾਰੀ ਵਕੀਲ (ਪ੍ਰੌਸੀਕਿਊਸ਼ਨ) ਨੇ ਉਸ ਦੇ ਇਸ ਦਾਅਵੇ ਨੂੰ ਖਾਰਜ ਕਰ ਦਿੱਤਾ ਅਤੇ ਉਸ ਦੇ ਫ਼ੋਨ ਤੋਂ ਪ੍ਰਾਪਤ ਹੋਏ ਸੰਦੇਸ਼ਾਂ (ਮੈਸੇਜਾਂ) ਨੂੰ ਸਬੂਤ ਵਜੋਂ ਪੇਸ਼ ਕੀਤਾ। ਇਹਨਾਂ ਮੈਸੇਜਾਂ ਵਿੱਚ ਇਸ ਕੰਮ ਲਈ 5400 ਡਾਲਰ ਦੇ ਭੁਗਤਾਨ ਦਾ ਸਾਫ਼ ਜ਼ਿਕਰ ਸੀ, ਜਿਸ ਨਾਲ ਇਹ ਸਾਬਤ ਹੋ ਗਿਆ ਕਿ ਜੋਬਨਪ੍ਰੀਤ ਸਿੰਘ ਇੱਕ ਡਰੱਗ ਮਿਊਲ (ਤਸਕਰੀ ਕਰਨ ਵਾਲੇ ਸਾਧਨ) ਵਜੋਂ ਕੰਮ ਕਰ ਰਿਹਾ ਸੀ।

ਇਲੀਨੋਇਸ ਦੀਆਂ ਡਰੱਗ ਟ੍ਰੈਫਿਕਿੰਗ ਗਾਈਡਲਾਈਨਾਂ ਅਨੁਸਾਰ, ਜੇਕਰ ਕੋਕੀਨ ਦੀ ਮਾਤਰਾ 900 ਗ੍ਰਾਮ ਤੋਂ ਵੱਧ ਹੁੰਦੀ ਹੈ, ਤਾਂ ਇਸ ਗੰਭੀਰ ਅਪਰਾਧ ਲਈ ਦੋਸ਼ੀ ਨੂੰ 30 ਤੋਂ 120 ਸਾਲ ਤੱਕ ਦੀ ਕੈਦ ਹੋ ਸਕਦੀ ਹੈ। ਕੈਲੀਫੋਰਨੀਆ ਤੋਂ ਟਰੱਕ ਚਲਾਉਣ ਵਾਲੇ ਪੰਜਾਬੀ ਮੂਲ ਦੇ ਜੋਬਨਪ੍ਰੀਤ ਸਿੰਘ ਦੀ ਗ੍ਰਿਫ਼ਤਾਰੀ ਅਤੇ ਇੰਨੀ ਲੰਬੀ ਸਜ਼ਾ ਦੀ ਖ਼ਬਰ ਨੇ ਅਮਰੀਕੀ-ਭਾਰਤੀ ਭਾਈਚਾਰੇ ਅਤੇ ਪੰਜਾਬੀ ਮੀਡੀਆ ਵਿੱਚ ਭਾਰੀ ਚਰਚਾ ਛੇੜ ਦਿੱਤੀ ਹੈ।