ਕਾਂਗਰਸ ਪਾਰਟੀ 'ਚ ਅੰਦਰੂਨੀ ਕਲੇਸ਼ ਜੱਗ-ਜ਼ਾਹਿਰ: ਪੋਸਟਰਾਂ 'ਚੋਂ ਰਾਜਾ ਵੜਿੰਗ ਦੀ ਤਸਵੀਰ ਗਾਇਬ! ਸਿਆਸੀ ਹਲਚਲ ਤੇਜ਼….

ਪੰਜਾਬ ਕਾਂਗਰਸ ਵਿੱਚ ਚੱਲ ਰਹੀ ਅੰਦਰੂਨੀ ਖਾਨਾ-ਜੰਗੀ ਇੱਕ ਵਾਰ ਫਿਰ ਸੁਰਖੀਆਂ ਵਿੱਚ ਹੈ। ਇਸ ਵਾਰ ਮਾਮਲਾ ਬਲਾਚੌਰ ਇਲਾਕੇ ਵਿੱਚ ਲਗਾਏ ਗਏ ਪੋਸਟਰਾਂ ਨਾਲ ਜੁੜਿਆ ਹੋਇਆ ਹੈ, ਜਿੱਥੋਂ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਦੀ ਤਸਵੀਰ ਗਾਇਬ ਹੋਣ ਕਾਰਨ ਸਿਆਸੀ ਗਲਿਆਰਿਆਂ ਵਿੱਚ ਚਰਚਾਵਾਂ ਦਾ ਬਾਜ਼ਾਰ ਗਰਮ ਹੋ ਗਿਆ ਹੈ।

ਕੀ ਹੈ ਪੂਰਾ ਮਾਮਲਾ?

ਬਲਾਚੌਰ ਵਿਖੇ ਕਾਂਗਰਸ ਵੱਲੋਂ ਕਈ ਥਾਵਾਂ 'ਤੇ ਪੋਸਟਰ ਲਗਾਏ ਗਏ ਹਨ। ਇਨ੍ਹਾਂ ਪੋਸਟਰਾਂ 'ਤੇ ਪਾਰਟੀ ਹਾਈਕਮਾਨ ਦੇ ਕਈ ਵੱਡੇ ਆਗੂਆਂ ਦੀਆਂ ਤਸਵੀਰਾਂ ਤਾਂ ਮੌਜੂਦ ਹਨ, ਜਿਨ੍ਹਾਂ ਵਿੱਚ ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੀ ਤਸਵੀਰ ਵੀ ਪ੍ਰਮੁੱਖਤਾ ਨਾਲ ਦਿਖਾਈ ਦੇ ਰਹੀ ਹੈ, ਪਰ ਸੂਬਾ ਪ੍ਰਧਾਨ ਰਾਜਾ ਵੜਿੰਗ ਦੀ ਗੈਰ-ਹਾਜ਼ਰੀ ਨੇ ਕਈ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।

ਇਹ ਪੋਸਟਰ ਜਸਵਿੰਦਰ (ਵਿੱਕੀ) ਚੌਧਰੀ, ਕਾਠਗੜ੍ਹ ਅਤੇ ਸਮੂਹ ਕਾਂਗਰਸ ਪਰਿਵਾਰ ਵੱਲੋਂ ਲਗਵਾਏ ਗਏ ਹਨ, ਜੋ ਕਿ ਸਾਬਕਾ ਵਿਧਾਇਕ ਮਾਸਟਰ ਦਲੀਪ ਚੰਦ ਦੇ ਪੋਤੇ ਹਨ। ਪੋਸਟਰਾਂ ਉੱਤੇ 'ਹੱਥ ਵਿਕਾਸ ਦਾ, ਸਾਥ ਵਿਸ਼ਵਾਸ ਦਾ, ਸੂਰਜ ਚਮਕੇਗਾ ਨਵੀਂ ਆਸ ਦਾ' ਵਰਗੇ ਨਾਅਰੇ ਵੀ ਲਿਖੇ ਗਏ ਹਨ। ਇੱਕ ਹੋਰ ਪੋਸਟਰ ਜਿਸ ਉੱਤੇ ਮਿਸ਼ਨ 2027 ਲਿਖਿਆ ਹੋਇਆ ਅਤੇ ਨਾਲ ਹੀ ਲਿਖਿਆ 'ਲੋਕਾਂ ਦੀ ਹੈ ਆਵਾਜ਼ ਚੰਨੀ ਇਸ ਵਾਰ'। ਇਹ ਦੋਵੇਂ ਪੋਸਟਰ ਸੋਸ਼ਲ ਮੀਡੀਆ ਉੱਤੇ ਸੁਰਖੀਆਂ ਦੇ ਵਿੱਚ ਬਣੇ ਹੋਏ ਹਨ।

ਪਾਰਟੀ ਅੰਦਰ ਵਧ ਰਿਹਾ ਹੈ ਕਲੇਸ਼?

ਸਿਆਸੀ ਮਾਹਿਰਾਂ ਦਾ ਮੰਨਣਾ ਹੈ ਕਿ ਪੋਸਟਰਾਂ ਵਿੱਚੋਂ ਸੂਬਾ ਪ੍ਰਧਾਨ ਦੀ ਤਸਵੀਰ ਦਾ ਗਾਇਬ ਹੋਣਾ ਪਾਰਟੀ ਅੰਦਰ ਵਧ ਰਹੀ ਅੰਦਰੂਨੀ ਫੁੱਟ ਦਾ ਸਿੱਧਾ ਸੰਕੇਤ ਹੈ। ਪਾਰਟੀ ਦੇ ਹੀ ਆਗੂਆਂ ਵੱਲੋਂ ਲਗਾਏ ਗਏ ਇਨ੍ਹਾਂ ਪੋਸਟਰਾਂ ਨੇ ਇਹ ਸਾਬਤ ਕਰ ਦਿੱਤਾ ਹੈ ਕਿ ਕਾਂਗਰਸ ਦੇ ਅੰਦਰ ਸਭ ਕੁਝ ਠੀਕ ਨਹੀਂ ਚੱਲ ਰਿਹਾ। ਰਾਜਾ ਵੜਿੰਗ ਦੀ ਤਸਵੀਰ ਦਾ ਨਾ ਹੋਣਾ ਇਹ ਦਰਸਾਉਂਦਾ ਹੈ ਕਿ ਪਾਰਟੀ ਦੇ ਸਥਾਨਕ ਆਗੂਆਂ ਵਿੱਚ ਪ੍ਰਧਾਨ ਦੀ ਅਗਵਾਈ ਨੂੰ ਲੈ ਕੇ ਨਰਾਜ਼ਗੀ ਜਾਂ ਮਤਭੇਦ ਹੋ ਸਕਦੇ ਹਨ।

ਸਿਆਸੀ ਗਲਿਆਰਿਆਂ 'ਚ ਚਰਚਾ

ਇਸ ਘਟਨਾ ਤੋਂ ਬਾਅਦ ਵਿਰੋਧੀ ਧਿਰਾਂ ਨੂੰ ਵੀ ਕਾਂਗਰਸ 'ਤੇ ਨਿਸ਼ਾਨਾ ਸਾਧਣ ਦਾ ਮੌਕਾ ਮਿਲ ਗਿਆ ਹੈ। ਹਾਲਾਂਕਿ ਪਾਰਟੀ ਵੱਲੋਂ ਅਜੇ ਤੱਕ ਇਸ ਮਾਮਲੇ 'ਤੇ ਕੋਈ ਅਧਿਕਾਰਤ ਪ੍ਰਤੀਕਿਰਿਆ ਨਹੀਂ ਆਈ ਹੈ, ਪਰ ਬਲਾਚੌਰ ਵਿੱਚ ਲੱਗੇ ਇਹ ਪੋਸਟਰ ਪੰਜਾਬ ਕਾਂਗਰਸ ਲਈ ਇੱਕ ਵੱਡੀ ਸਿਰਦਰਦੀ ਬਣਦੇ ਜਾ ਰਹੇ ਹਨ।

ਕੀ ਇਹ ਕੋਈ ਤਕਨੀਕੀ ਗਲਤੀ ਹੈ ਜਾਂ ਸੋਚੀ-ਸਮਝੀ ਰਣਨੀਤੀ, ਇਹ ਤਾਂ ਆਉਣ ਵਾਲਾ ਸਮਾਂ ਹੀ ਦੱਸੇਗਾ, ਪਰ ਇਸ ਘਟਨਾ ਨੇ ਇਹ ਸਪੱਸ਼ਟ ਕਰ ਦਿੱਤਾ ਹੈ ਕਿ ਪੰਜਾਬ ਕਾਂਗਰਸ ਵਿੱਚ ਅੰਦਰੂਨੀ ਖਾਨਾ-ਜੰਗੀ ਹੁਣ ਸੜਕਾਂ 'ਤੇ ਆ ਚੁੱਕੀ ਹੈ।