ਪੰਜਾਬ 'ਚ ਮੱਚੀ ਹਲਚਲ! ‘ਆਪ’ ਮੰਤਰੀ ਗ੍ਰਿਫ਼ਤਾਰ, ਈਡੀ ਸੰਜੀਵ ਅਰੋੜਾ ਨੂੰ ਲੈ ਕੇ ਦਿੱਲੀ ਲਈ ਹੋਈ ਰਵਾਨਾ; ₹157 ਕਰੋੜ ਦੀ ਫਰਜ਼ੀ ਖਰੀਦ ਦਾ ਮਾਮਲਾ

ਕੇਂਦਰੀ ਜਾਂਚ ਏਜੰਸੀ ਈਡੀ (ED) ਨੇ ਮਨੀ ਲਾਂਡਰਿੰਗ ਦੇ ਮਾਮਲੇ ਵਿੱਚ ਪੰਜਾਬ ਦੀ ਆਮ ਆਦਮੀ ਪਾਰਟੀ ਸਰਕਾਰ ਦੇ ਮੰਤਰੀ ਸੰਜੀਵ ਅਰੋੜਾ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਸ਼ਨੀਵਾਰ ਸਵੇਰੇ ਜਦੋਂ ਈਡੀ ਨੇ ਛਾਪੇਮਾਰੀ ਕੀਤੀ, ਤਾਂ ਉਹ ਚੰਡੀਗੜ੍ਹ ਦੇ ਸੈਕਟਰ-2 ਸਥਿਤ ਆਪਣੀ ਸਰਕਾਰੀ ਕੋਠੀ ਵਿੱਚ ਹੀ ਮੌਜੂਦ ਸਨ।

ਈਡੀ ਦੇ ਲਾਕਅੱਪ ਵਿੱਚ ਗੁਜ਼ਰੇਗੀ ਰਾਤ

ਉੱਥੇ ਕਰੀਬ 10 ਘੰਟੇ ਤੱਕ ਚੱਲੀ ਲੰਬੀ ਪੁੱਛਗਿੱਛ ਤੋਂ ਬਾਅਦ, ਸ਼ਾਮ ਕਰੀਬ 5 ਵਜੇ ਈਡੀ ਦੀ ਟੀਮ ਉਨ੍ਹਾਂ ਨੂੰ ਚੰਡੀਗੜ੍ਹ ਅਤੇ ਹਰਿਆਣਾ ਨੰਬਰ ਦੀਆਂ ਗੱਡੀਆਂ ਵਿੱਚ ਬਿਠਾ ਕੇ ਦਿੱਲੀ ਲਈ ਰਵਾਨਾ ਹੋ ਗਈ। ਹੁਣ ਅਗਲੇਰੀ ਜਾਂਚ ਅਤੇ ਪੁੱਛਗਿੱਛ ਦਿੱਲੀ ਵਿੱਚ ਹੀ ਕੀਤੀ ਜਾਵੇਗੀ ਅਤੇ ਉਨ੍ਹਾਂ ਦੀ ਅੱਜ ਦੀ ਰਾਤ ਈਡੀ ਦੇ ਲਾਕਅੱਪ ਵਿੱਚ ਗੁਜ਼ਰੇਗੀ।

157 ਕਰੋੜ ਦੀ ਫਰਜ਼ੀ ਖਰੀਦ-ਫਰੋਖਤ ਦਾ ਮਾਮਲਾ; 5 ਟਿਕਾਣਿਆਂ 'ਤੇ ਹੋਈ ਛਾਪੇਮਾਰੀ

ਈਡੀ (ED) ਨੇ ਸ਼ਨੀਵਾਰ ਸਵੇਰੇ ਮੰਤਰੀ ਸੰਜੀਵ ਅਰੋੜਾ ਦੇ ਚੰਡੀਗੜ੍ਹ ਸਥਿਤ ਸਰਕਾਰੀ ਘਰ ਤੋਂ ਇਲਾਵਾ ਦਿੱਲੀ ਅਤੇ ਗੁਰੂਗ੍ਰਾਮ ਸਮੇਤ ਕੁੱਲ 5 ਟਿਕਾਣਿਆਂ 'ਤੇ ਛਾਪੇਮਾਰੀ ਕੀਤੀ। ਜਾਂਚ ਏਜੰਸੀ ਨੇ ਖੁਲਾਸਾ ਕੀਤਾ ਹੈ ਕਿ ਅਰੋੜਾ ਨੇ ਆਪਣੀਆਂ ਫਰਮਾਂ ਰਾਹੀਂ ਮੋਬਾਈਲ ਫੋਨਾਂ ਦੀ ਖਰੀਦ-ਫਰੋਖਤ ਵਿੱਚ ਕਰੀਬ 157.12 ਕਰੋੜ ਰੁਪਏ ਦੀ ਹੇਰਾਫੇਰੀ ਕੀਤੀ ਹੈ। ਈਡੀ ਮੁਤਾਬਕ, ਉਨ੍ਹਾਂ ਨੇ ਸ਼ੈੱਲ ਕੰਪਨੀਆਂ (ਫਰਜ਼ੀ ਕੰਪਨੀਆਂ) ਰਾਹੀਂ ਮੋਬਾਈਲ ਦੀ ਫਰਜ਼ੀ ਵਿਕਰੀ ਦਿਖਾਈ ਅਤੇ ਗਲਤ ਤਰੀਕੇ ਨਾਲ 'ਫਰਜ਼ੀ ਐਕਸਪੋਰਟ' (ਨਿਰਯਾਤ) ਕੀਤੇ ਹਨ।

ਸਰਕਾਰੀ ਖ਼ਜ਼ਾਨੇ ਨੂੰ ਲਾਇਆ ਚੂਨਾ; ਫਰਜ਼ੀ ਬਿੱਲਾਂ ਰਾਹੀਂ ਕਮਾਇਆ ਨਿੱਜੀ ਮੁਨਾਫ਼ਾ

ਈਡੀ ਮੁਤਾਬਕ, ਮੰਤਰੀ ਨੇ ਇਨ੍ਹਾਂ ਸਾਮਾਨਾਂ ਦੇ ਐਕਸਪੋਰਟ (ਨਿਰਯਾਤ) ਦਾ ਸਹਾਰਾ ਲੈ ਕੇ ਦੁਬਈ ਤੋਂ ਭਾਰਤ ਵਿੱਚ ਨਜਾਇਜ਼ ਪੈਸੇ ਦੀ 'ਰਾਊਂਡ-ਟ੍ਰਿਪਿੰਗ' (ਕਾਲੇ ਧਨ ਨੂੰ ਘੁੰਮਾ ਕੇ ਵਾਪਸ ਲਿਆਉਣਾ) ਕੀਤੀ। ਇਸ ਤੋਂ ਇਲਾਵਾ, ਫਰਜ਼ੀ ਇਨਪੁਟ ਟੈਕਸ ਕ੍ਰੈਡਿਟ (ITC), ਜੀਐਸਟੀ ਰਿਫੰਡ ਅਤੇ ਡਿਊਟੀ ਡਰਾਅਬੈਕ ਦਾ ਫਾਇਦਾ ਲੈਣ ਲਈ ਦਿੱਲੀ ਦੀਆਂ ਅਜਿਹੀਆਂ ਫਰਮਾਂ ਤੋਂ ਫਰਜ਼ੀ ਬਿੱਲ ਤਿਆਰ ਕਰਵਾਏ ਗਏ ਜੋ ਅਸਲ ਵਿੱਚ ਮੌਜੂਦ ਹੀ ਨਹੀਂ ਹਨ। ਇਨ੍ਹਾਂ ਫਰਜ਼ੀ ਜੀਐਸਟੀ ਖਰੀਦ ਬਿੱਲਾਂ ਰਾਹੀਂ ਜਿੱਥੇ ਸਰਕਾਰੀ ਖ਼ਜ਼ਾਨੇ ਨੂੰ ਵੱਡਾ ਨੁਕਸਾਨ ਪਹੁੰਚਾਇਆ ਗਿਆ, ਉੱਥੇ ਹੀ ਨਿੱਜੀ ਤੌਰ 'ਤੇ ਮੋਟੀ ਕਮਾਈ ਕੀਤੀ ਗਈ।

ਕੇਜਰੀਵਾਲ ਅਤੇ ਸੀਐਮ ਮਾਨ ਦਾ ਪਲਟਵਾਰ; ਈਡੀ ਦੀ ਕਾਰਵਾਈ ਨੂੰ ਦੱਸਿਆ ਭਾਜਪਾ ਦੀ ਸਾਜ਼ਿਸ਼

ਮੰਤਰੀ 'ਤੇ ਹੋਈ ਛਾਪੇਮਾਰੀ ਤੋਂ ਤੁਰੰਤ ਬਾਅਦ ‘ਆਪ’ ਸੁਪਰੀਮੋ ਅਰਵਿੰਦ ਕੇਜਰੀਵਾਲ ਨੇ ਪ੍ਰੈੱਸ ਕਾਨਫਰੰਸ ਕਰਕੇ ਕਿਹਾ ਕਿ ਮੋਦੀ ਰਾਜ ਵਿੱਚ ਕੇਂਦਰੀ ਏਜੰਸੀਆਂ ਦੀ ਦੁਰਵਰਤੋਂ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਇਲਜ਼ਾਮ ਲਾਇਆ ਕਿ ਪ੍ਰਧਾਨ ਮੰਤਰੀ ਮੋਦੀ ਪੰਜਾਬ ਦੇ ਲੋਕਾਂ ਨਾਲ ਧੱਕਾ ਕਰ ਰਹੇ ਹਨ ਅਤੇ ਈਡੀ ਨੂੰ ਕਿਸੇ ਭ੍ਰਿਸ਼ਟਾਚਾਰ ਨੂੰ ਫੜਨ ਲਈ ਨਹੀਂ, ਸਗੋਂ ਪਾਰਟੀਆਂ ਤੋੜਨ ਦੇ ਕੰਮ 'ਤੇ ਲਗਾਇਆ ਗਿਆ ਹੈ।

ਦੂਜੇ ਪਾਸੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਤਿੱਖਾ ਹਮਲਾ ਕਰਦਿਆਂ ਕਿਹਾ ਕਿ ਈਡੀ ਦੀ ਰੇਡ ਦਾ ਮਕਸਦ ਕਾਲਾ ਧਨ ਫੜਨਾ ਨਹੀਂ, ਸਗੋਂ ਆਗੂਆਂ ਨੂੰ ਜ਼ਬਰਦਸਤੀ ਭਾਜਪਾ ਵਿੱਚ ਸ਼ਾਮਲ ਕਰਵਾਉਣਾ ਹੈ। ਉਨ੍ਹਾਂ ਉਦਾਹਰਨ ਦਿੰਦਿਆਂ ਕਿਹਾ ਕਿ ਕੁਝ ਦਿਨ ਪਹਿਲਾਂ ਅਸ਼ੋਕ ਮਿੱਤਲ ਦੇ ਘਰ ਦੋ ਦਿਨ ਰੇਡ ਚੱਲੀ ਅਤੇ ਤੀਜੇ ਦਿਨ ਉਨ੍ਹਾਂ ਨੇ ਭਾਜਪਾ ਜੁਆਇਨ ਕਰ ਲਈ। ਸੀਐਮ ਮਾਨ ਨੇ ਭਾਜਪਾ (BJP) 'ਤੇ ਤੰਜ ਕੱਸਦਿਆਂ ਕਿਹਾ ਕਿ ਇਸ ਦਾ ਅਸਲੀ ਮਤਲਬ 'ਭਾਰਤ ਜਲਾਓ ਪਾਰਟੀ' ਹੈ।