ਸਿਆਸਤ ‘ਚ ਮੱਚੀ ਹਲਚਲ! ਸੀਨੀਅਰ ਆਗੂ ਨੇ ਭਾਜਪਾ ਤੋਂ ਦਿੱਤਾ ਅਸਤੀਫਾ…ਇਸ ਪਾਰਟੀ ‘ਚ ਜਾਣ ਨੂੰ ਲੈ ਕੇ ਚਰਚਾਵਾਂ ਤੇਜ਼

ਇੰਡੀਆ ਦੀ ਸਿਆਸਤ 'ਚ ਘਮਸਾਣ ਮਚਿਆ ਹੋਇਆ ਹੈ। ਹੁਣ ਵੱਡੀ ਖਬਰ ਤਾਮਿਲਨਾਡੂ ਤੋਂ ਸਾਹਮਣੇ ਆਈ ਹੈ, ਜਿੱਥੇ ਭਾਜਪਾ ਦੇ ਨਾਮੀ ਚਿਹਰੇ ਨੇ ਪਾਰਟੀ ਨੂੰ ਅਲਵਿਦਾ ਕਹਿ ਦਿੱਤਾ ਹੈ।

ਥਲਾਪਤੀ ਸੀ. ਜੋਸਫ਼ ਵਿਜੇ ਦੇ ਤਾਮਿਲਨਾਡੂ ਦੇ ਮੁੱਖ ਮੰਤਰੀ ਬਣਨ ਤੋਂ ਬਾਅਦ ਉਨ੍ਹਾਂ ਦੀ ਪਾਰਟੀ, ਤਮਿਲਗਾ ਵੇਤਰੀ ਕਜ਼ਾਗਮ (TVK) ਵਿੱਚ ਸਿਆਸਤਦਾਨਾਂ ਅਤੇ ਮਸ਼ਹੂਰ ਹਸਤੀਆਂ ਦੀ ਇੱਕ ਲਹਿਰ ਜੁੜ ਰਹੀ ਹੈ। ਇਸ ਦੇ ਹਿੱਸੇ ਵਜੋਂ, ਕੇਰਲ ਭਾਜਪਾ ਦੇ ਆਗੂ ਅਤੇ ਅਦਾਕਾਰ ਟੀਵੀਕੇ ਵਿੱਚ ਸ਼ਾਮਲ ਹੋਣ ਲਈ ਉਤਸ਼ਾਹਿਤ ਹਨ। ਮਲਿਆਲਮ ਅਦਾਕਾਰ ਦੇਵਨ ਨੇ ਕੇਰਲ ਭਾਜਪਾ ਤੋਂ ਅਸਤੀਫਾ ਦੇ ਦਿੱਤਾ ਹੈ ਅਤੇ ਮੁੱਖ ਮੰਤਰੀ ਵਿਜੇ ਨਾਲ ਮੁਲਾਕਾਤ ਦੀ ਉਡੀਕ ਕਰ ਰਹੇ ਹਨ।

ਭਾਜਪਾ 'ਤੇ ਸਾਧਿਆ ਤਿੱਖਾ ਨਿਸ਼ਾਨਾ 

ਟੀਵੀਕੇ ਵਿੱਚ ਸ਼ਾਮਲ ਹੋਣ ਨੂੰ ਲੈ ਕੇ ਨਿਊਜ਼ ਏਜੰਸੀ ਏਐਨਆਈ ਨਾਲ ਸੋਮਵਾਰ (24 ਅਗਸਤ) ਨੂੰ ਗੱਲ ਕਰਦੇ ਹੋਏ ਦੇਵਨ ਨੇ ਕਿਹਾ, "ਮੈਂ ਭਾਜਪਾ ਲਈ ਬਹੁਤ ਜੋਸ਼ ਨਾਲ ਕੰਮ ਕਰ ਰਿਹਾ ਸੀ ਅਤੇ ਬਹੁਤ ਸਾਰੇ ਜੋਖਮ ਵੀ ਚੁੱਕ ਰਿਹਾ ਸੀ, ਪਰ ਉਹ ਮੇਰੇ ਮਿਸ਼ਨ ਅਤੇ ਮੇਰੀ ਯੋਜਨਾ ਨੂੰ ਸਮਝਣ ਵਿੱਚ ਅਸਫਲ ਰਹੇ।" 

ਮਲਿਆਲਮ ਅਦਾਕਾਰ ਨੇ ਕੀ ਕਿਹਾ

ਮਲਿਆਲਮ ਅਦਾਕਾਰ ਤੇ ਨੇਤਾ ਨੇ ਕਿਹਾ, "ਉਹ (ਭਾਜਪਾ) ਇਸ ਸਭ ਦੇ ਵਿਰੁੱਧ ਹਨ। ਮੈਨੂੰ ਲੱਗਦਾ ਹੈ ਕਿ ਉਨ੍ਹਾਂ ਨੂੰ ਚੋਣਾਂ ਜਿੱਤਣ ਵਿੱਚ ਕੋਈ ਦਿਲਚਸਪੀ ਨਹੀਂ ਹੈ। ਉਹ ਪੈਸਾ ਕਮਾਉਣ ਵਿੱਚ ਦਿਲਚਸਪੀ ਰੱਖਦੇ ਹਨ, ਜਿਸਦਾ ਮੈਂ ਵਿਰੋਧ ਕੀਤਾ।" ਦੇਵਨ ਨੇ ਅੱਗੇ ਕਿਹਾ, "ਉਨ੍ਹਾਂ ਨੇ ਮੈਨੂੰ ਕਾਬੂ ਵਿੱਚ ਰੱਖਿਆ। 2024-25 ਦੌਰਾਨ, ਮੈਂ ਇਸ ਪਾਰਟੀ ਨੂੰ ਛੱਡਣ ਬਾਰੇ ਸੋਚਣਾ ਸ਼ੁਰੂ ਕਰ ਦਿੱਤਾ। ਮੈਨੂੰ ਲੱਗਾ ਕਿ ਭਾਜਪਾ ਨਾਲ ਰਹਿਣ ਨਾਲ ਇੱਕ ਸਿਆਸਤਦਾਨ ਵਜੋਂ ਮੇਰੀਆਂ ਇੱਛਾਵਾਂ ਪੂਰੀਆਂ ਨਹੀਂ ਹੋਣਗੀਆਂ।"

ਉਨ੍ਹਾਂ ਨੇ ਅੱਗੇ ਦੱਸਿਆ ਕਿ, ਜਦੋਂ ਮੈਂ ਭਾਜਪਾ ਤੋਂ ਅਸਤੀਫਾ ਦੇ ਦਿੱਤਾ, ਤਾਂ ਜੋਸਫ਼ ਵਿਜੇ ਨੇ ਇਹ ਦੇਖਿਆ ਅਤੇ ਉਨ੍ਹਾਂ ਨੇ ਕੁਝ ਲੋਕਾਂ ਨੂੰ ਮੈਨੂੰ ਪੁੱਛਣ ਲਈ ਭੇਜਿਆ ਕਿ ਕੀ ਮੈਂ ਟੀਵੀਕੇ ਵਿੱਚ ਸ਼ਾਮਲ ਹੋਣ ਵਿੱਚ ਦਿਲਚਸਪੀ ਰੱਖਦਾ ਹਾਂ। ਸਾਡੀ ਇਸ ਬਾਰੇ ਬਹੁਤ ਵਿਸਥਾਰਪੂਰਵਕ ਅਤੇ ਦਿਲਚਸਪ ਗੱਲਬਾਤ ਹੋਈ। ਮਲਿਆਲਮ ਅਦਾਕਾਰ ਨੇ ਅੱਗੇ ਕਿਹਾ, "ਮੈਂ ਅੰਤ ਵਿੱਚ ਚੇਨਈ ਵਿੱਚ ਟੀਵੀਕੇ ਦੇ ਸੀਨੀਅਰ ਆਗੂਆਂ ਨਾਲ ਇੱਕ ਆਨਲਾਈਨ ਮੀਟਿੰਗ ਕੀਤੀ, ਅਤੇ ਮੈਂ ਸਿਧਾਂਤਕ ਤੌਰ 'ਤੇ ਸਹਿਮਤ ਹੋ ਗਿਆ।"

ਅਦਾਕਾਰ ਦੇਵਨ ਨੇ ਦੱਸਿਆ ਕਿ, "ਮੈਂ ਉਨ੍ਹਾਂ ਨੂੰ ਕਿਹਾ ਕਿ ਮੈਂ ਜੋਸਫ਼ ਵਿਜੇ ਨੂੰ ਵੱਖਰੇ ਤੌਰ 'ਤੇ ਮਿਲਣਾ ਚਾਹੁੰਦਾ ਹਾਂ ਅਤੇ ਉਨ੍ਹਾਂ ਨਾਲ ਇਸ ਮਾਮਲੇ 'ਤੇ ਚਰਚਾ ਕਰਨਾ ਚਾਹੁੰਦਾ ਹਾਂ। ਫਿਰ ਉਨ੍ਹਾਂ ਨੇ ਮੈਨੂੰ ਉਨ੍ਹਾਂ ਨਾਲ ਮਿਲਣ ਲਈ 10 ਸਤੰਬਰ ਦੀ ਤਾਰੀਖ ਦਿੱਤੀ ਹੈ। ਮੈਂ ਉਸ ਮੁਲਾਕਾਤ ਦੀ ਉਡੀਕ ਕਰ ਰਿਹਾ ਹਾਂ।"