ਵੱਡਾ ਪ੍ਰਸ਼ਾਸਨਿਕ ਫੇਰਬਦਲ: ਉਪ ਚੋਣਾਂ ਤੋਂ ਪਹਿਲਾਂ 23 ਸੀਨੀਅਰ ਪੁਲਿਸ ਅਧਿਕਾਰੀਆਂ ਦੇ ਤਬਾਦਲੇ

ਪਿਛਲੇ ਕੁੱਝ ਮਹੀਨਿਆਂ ਤੋਂ ਸੂਬਿਆਂ ਦੇ ਵਿੱਚ ਵੱਡੇ ਪੱਧਰ ਉੱਤੇ ਪ੍ਰਸ਼ਾਸਨਿਕ ਫੇਰਬਦਲ ਦੇਖਣ ਨੂੰ ਮਿਲ ਰਿਹਾ ਹੈ। ਚੋਣਾਂ ਤੋਂ ਬਾਅਦ ਪੱਛਮੀ ਬੰਗਾਲ 'ਚ ਉਲਟਫੇਰ ਦਾ ਸਿਲਸਿਲਾ ਦੇਖਣ ਨੂੰ ਮਿਲ ਰਿਹਾ ਹੈ। ਹੁਣ ਉਪ ਚੋਣਾਂ ਤੋਂ ਪਹਿਲਾਂ 23 ਸੀਨੀਅਰ ਪੁਲਿਸ ਅਫਸਰਾਂ ਦੇ ਤਬਾਦਲੇ ਕੀਤੇ ਗਏ ਹਨ। 

ਪੁਲਿਸ ਅਧਿਕਾਰੀਆਂ ਦੇ ਹੋਏ ਤਬਾਦਲੇ

 ਪੱਛਮੀ ਬੰਗਾਲ ਦੀਆਂ ਦੋ ਵਿਧਾਨ ਸਭਾ ਸੀਟਾਂ 'ਤੇ ਹੋਣ ਵਾਲੀਆਂ ਉਪ ਚੋਣਾਂ ਤੋਂ ਪਹਿਲਾਂ ਸੂਬੇ ਦੀ ਸਰਕਾਰ ਨੇ ਪੁਲਿਸ ਵਿਭਾਗ ਵਿੱਚ ਵੱਡਾ ਫੇਰਬਦਲ ਕੀਤਾ ਹੈ। ਇਸ ਪ੍ਰਸ਼ਾਸਨਿਕ ਕਾਰਵਾਈ ਨੇ ਸਿਆਸੀ ਅਤੇ ਅਧਿਕਾਰੀ ਹਲਕਿਆਂ ਵਿੱਚ ਹਲਚਲ ਮਚਾ ਦਿੱਤੀ ਹੈ। ਸਰਕਾਰ ਨੇ ਜਨਤਕ ਸੇਵਾ ਦੇ ਹਿੱਤ ਵਿੱਚ ਕੁੱਲ 23 ਸੀਨੀਅਰ ਪੁਲਿਸ ਅਧਿਕਾਰੀਆਂ ਦੇ ਤਬਾਦਲੇ ਕਰ ਦਿੱਤੇ ਹਨ।

17 ਆਈਪੀਐਸ ਅਤੇ 6 ਡਬਲਯੂਬੀਪੀਐਸ ਅਧਿਕਾਰੀ ਸ਼ਾਮਲ

ਸਰਕਾਰ ਵੱਲੋਂ ਜਾਰੀ ਕੀਤੀ ਗਈ ਸੂਚੀ ਮੁਤਾਬਕ, ਤਬਦਿਲ ਕੀਤੇ ਗਏ ਇਨ੍ਹਾਂ 23 ਸੀਨੀਅਰ ਅਧਿਕਾਰੀਆਂ ਵਿੱਚ 17 ਭਾਰਤੀ ਪੁਲਿਸ ਸੇਵਾ (IPS) ਅਤੇ 6 ਪੱਛਮੀ ਬੰਗਾਲ ਪੁਲਿਸ ਸੇਵਾ (WBPS) ਦੇ ਅਧਿਕਾਰੀ ਸ਼ਾਮਲ ਹਨ। ਪੱਛਮੀ ਬੰਗਾਲ ਸਰਕਾਰ ਦੇ ਗ੍ਰਹਿ ਅਤੇ ਪਹਾੜੀ ਮਾਮਲਿਆਂ ਦੇ ਵਿਭਾਗ ਨੇ ਸ਼ੁੱਕਰਵਾਰ (25 ਸਤੰਬਰ, 2026) ਨੂੰ ਇਸ ਸਬੰਧ ਵਿੱਚ ਅਧਿਕਾਰਤ ਨੋਟੀਫਿਕੇਸ਼ਨ ਜਾਰੀ ਕਰ ਦਿੱਤਾ ਹੈ।

ਐਸ.ਟੀ.ਐਫ. (STF) ਦੇ ਆਈ.ਜੀ. ਦਾ ਵੀ ਹੋਇਆ ਤਬਾਦਲਾ

ਇਸ ਫੇਰਬਦਲ ਵਿੱਚ ਸਪੈਸ਼ਲ ਟਾਸਕ ਫੋਰਸ (STF) ਦੇ ਆਈ.ਜੀ. ਸੁਧੀਰ ਕੁਮਾਰ ਨੀਲਕੰਠਮ ਅਤੇ ਖੁਫੀਆ ਸ਼ਾਖਾ ਦੇ ਡੀ.ਆਈ.ਜੀ. ਭੋਲਾਨਾਥ ਪਾਂਡੇ ਦੇ ਨਾਮ ਵੀ ਸ਼ਾਮਲ ਹਨ। ਨੋਟੀਫਿਕੇਸ਼ਨ ਦੇ ਅਨੁਸਾਰ, ਐਸ.ਟੀ.ਐਫ. ਆਈ.ਜੀ. ਸੁਧੀਰ ਕੁਮਾਰ ਨੀਲਕੰਠਮ ਨੂੰ ਕੋਲਕਾਤਾ ਪੁਲਿਸ ਦਾ ਵਧੀਕ ਪੁਲਿਸ ਕਮਿਸ਼ਨਰ ਨਿਯੁਕਤ ਕੀਤਾ ਗਿਆ ਹੈ, ਜਿੱਥੇ ਉਹ ਦੇਵੇਂਦਰ ਪ੍ਰਕਾਸ਼ ਸਿੰਘ ਦੀ ਜਗ੍ਹਾ ਲੈਣਗੇ।

ਅਗਲੇ ਮਹੀਨੇ ਹੋਣੀਆਂ ਹਨ ਉਪ ਚੋਣਾਂਸੂਬੇ ਵਿੱਚ ਅਗਲੇ ਮਹੀਨੇ ਯਾਨੀ 6 ਅਕਤੂਬਰ, 2026 ਨੂੰ ਨੰਦੀਗ੍ਰਾਮ ਅਤੇ ਰਾਜਨਗਰ ਵਿਧਾਨ ਸਭਾ ਸੀਟਾਂ ਲਈ ਉਪ ਚੋਣਾਂ ਹੋਣ ਜਾ ਰਹੀਆਂ ਹਨ। ਚੋਣਾਂ ਦੇ ਮੱਦੇਨਜ਼ਰ ਸੂਬੇ ਦਾ ਸਿਆਸੀ ਪਾਰਾ ਪਹਿਲਾਂ ਹੀ ਕਾਫ਼ੀ ਗਰਮਾਇਆ ਹੋਇਆ ਹੈ। ਭਾਜਪਾ, ਕਾਂਗਰਸ ਅਤੇ ਤ੍ਰਿਣਮੂਲ ਕਾਂਗਰਸ (TMC) ਸਮੇਤ ਸਾਰੀਆਂ ਪ੍ਰਮੁੱਖ ਪਾਰਟੀਆਂ ਨੇ ਆਪਣੇ ਉਮੀਦਵਾਰ ਮੈਦਾਨ ਵਿੱਚ ਉਤਾਰ ਦਿੱਤੇ ਹਨ, ਜਿਸ ਕਾਰਨ ਪ੍ਰਸ਼ਾਸਨਿਕ ਪੱਧਰ 'ਤੇ ਇਹ ਬਦਲਾਅ ਕਾਫ਼ੀ ਅਹਿਮ ਮੰਨੇ ਜਾ ਰਹੇ ਹਨ।