IPL Match Today: ਮੁੱਲਾਂਪੁਰ 'ਚ PBKS ਤੇ GT ਵਿਚਾਲੇ ਅੱਜ IPL ਦਾ ਮਹਾਮੁਕਾਬਲਾ, ਪ੍ਰਸ਼ਾਸਨ ਵੱਲੋਂ ਟ੍ਰੈਫਿਕ ਐਡਵਾਈਜ਼ਰੀ ਜਾਰੀ, 'ਨੋ ਫਲਾਇੰਗ ਜ਼ੋਨ' ਐਲਾਨਿਆ
IPL Match: ਨਿਊ ਚੰਡੀਗੜ੍ਹ ਦੇ ਮੁੱਲਾਂਪੁਰ ਸਥਿਤ ਮਹਾਰਾਜਾ ਯਾਦਵਿੰਦਰ ਸਿੰਘ ਇੰਟਰਨੈਸ਼ਨਲ ਕ੍ਰਿਕਟ ਸਟੇਡੀਅਮ ਵਿੱਚ ਅੱਜ ਸ਼ਾਮ 7:30 ਵਜੇ ਪੰਜਾਬ ਕਿੰਗਜ਼ (PBKS) ਅਤੇ ਗੁਜਰਾਤ ਟਾਈਟਨਸ (GT) ਵਿਚਾਲੇ ਆਈ.ਪੀ.ਐਲ. (IPL) ਦਾ ਮੁਕਾਬਲਾ ਖੇਡਿਆ ਜਾਵੇਗਾ। ਪੰਜਾਬ ਦੀ ਟੀਮ ਲਈ ਇਸ ਸੀਜ਼ਨ ਦਾ ਇਹ ਪਹਿਲਾ ਮੈਚ ਹੈ। ਇਸ ਮੈਚ ਦੀ ਤਿਆਰੀ ਲਈ ਕੱਲ੍ਹ ਸੋਮਵਾਰ ਨੂੰ ਦੋਵਾਂ ਟੀਮਾਂ ਨੇ ਸ਼ਾਮ 6:00 ਵਜੇ ਤੋਂ ਰਾਤ 9:00 ਵਜੇ ਤੱਕ ਸਟੇਡੀਅਮ ਵਿੱਚ ਜ਼ੋਰਦਾਰ ਪ੍ਰੈਕਟਿਸ ਕੀਤੀ।
ਪੰਜਾਬ ਕਿੰਗਜ਼ ਲਈ ਇਹ ਮੁੱਲਾਂਪੁਰ ਦਾ ਮੈਦਾਨ ਉਨ੍ਹਾਂ ਦਾ ਹੋਮ ਗਰਾਊਂਡ ਹੈ। ਇੱਕ ਦਿਲਚਸਪ ਤੱਥ ਇਹ ਵੀ ਹੈ ਕਿ ਜਦੋਂ ਤੋਂ ਕਿੰਗਜ਼ ਨੇ ਆਪਣਾ ਨਾਂ ਬਦਲਿਆ ਹੈ, ਉਦੋਂ ਤੋਂ ਉਹ ਆਪਣਾ ਸ਼ੁਰੂਆਤੀ ਮੈਚ ਨਹੀਂ ਹਾਰੀ ਹੈ। ਪੰਜਾਬ ਕਿੰਗਜ਼ (punjab kings) ਦੇ ਕਪਤਾਨ ਸ਼੍ਰੇਅਸ ਅਈਅਰ ਨੇ ਵੀ ਮੈਦਾਨ 'ਤੇ ਖੂਬ ਪਸੀਨਾ ਵਹਾਇਆ। ਜੇਕਰ ਪਿਛਲੇ ਰਿਕਾਰਡ ਦੀ ਗੱਲ ਕਰੀਏ ਤਾਂ ਟੀਮ ਨੇ ਆਪਣੇ ਪਿਛਲੇ 6 ਮੈਚਾਂ ਵਿੱਚੋਂ ਤਿੰਨ ਵਿੱਚ ਜਿੱਤ ਦਰਜ ਕੀਤੀ ਹੈ।
ਪੰਜਾਬ ਅਤੇ ਗੁਜਰਾਤ ਵਿਚਾਲੇ ਬਰਾਬਰੀ ਦੀ ਟੱਕਰ
ਪੰਜਾਬ ਕਿੰਗਜ਼ ਅਤੇ ਗੁਜਰਾਤ ਟਾਈਟਨਸ (Gujarat Titans) ਵਿਚਾਲੇ ਆਈ.ਪੀ.ਐਲ. (IPL) ਦੇ ਇਤਿਹਾਸ ਵਿੱਚ ਹੋਏ ਪਿਛਲੇ 6 ਮੁਕਾਬਲਿਆਂ ਵਿੱਚ ਦੋਵਾਂ ਟੀਮਾਂ ਦੀ ਟੱਕਰ ਬਿਲਕੁਲ ਬਰਾਬਰੀ ਦੀ ਰਹੀ ਹੈ। ਇਹਨਾਂ 6 ਮੈਚਾਂ ਵਿੱਚੋਂ 3 ਮੈਚ ਪੰਜਾਬ ਨੇ ਜਿੱਤੇ ਹਨ ਅਤੇ 3 ਮੈਚਾਂ ਵਿੱਚ ਗੁਜਰਾਤ ਨੇ ਬਾਜ਼ੀ ਮਾਰੀ ਹੈ। ਜੇਕਰ ਸਕੋਰ ਦੀ ਗੱਲ ਕਰੀਏ ਤਾਂ ਆਈ.ਪੀ.ਐਲ. ਵਿੱਚ ਗੁਜਰਾਤ ਦਾ ਵੱਧ ਤੋਂ ਵੱਧ ਸਕੋਰ 232 ਦੌੜਾਂ ਰਿਹਾ ਹੈ, ਜਦਕਿ ਪੰਜਾਬ ਕਿੰਗਜ਼ ਨੇ ਆਪਣਾ ਸਭ ਤੋਂ ਵੱਡਾ ਸਕੋਰ 243 ਦੌੜਾਂ ਬਣਾਇਆ ਹੈ। ਅੰਕੜਿਆਂ ਨੂੰ ਦੇਖਦੇ ਹੋਏ ਅੱਜ ਦੇ ਮੈਚ ਵਿੱਚ ਦੋਵਾਂ ਟੀਮਾਂ ਵਿਚਾਲੇ ਕਾਂਟੇ ਦੀ ਟੱਕਰ ਹੋਣ ਦੀ ਉਮੀਦ ਹੈ।
ਦੁਪਹਿਰ 3:30 ਵਜੇ ਖੁੱਲ੍ਹ ਜਾਣਗੇ ਸਟੇਡੀਅਮ ਦੇ ਗੇਟ
ਪੰਜਾਬ ਕਿੰਗਜ਼ ਅਤੇ ਗੁਜਰਾਤ ਟਾਈਟਨਸ ਵਿਚਾਲੇ ਇਹ ਮੁਕਾਬਲਾ ਅੱਜ ਸ਼ਾਮ 7:30 ਵਜੇ ਸ਼ੁਰੂ ਹੋਵੇਗਾ, ਜਿਸ ਲਈ ਸ਼ਾਮ 7:00 ਵਜੇ ਟਾਸ ਕੀਤਾ ਜਾਵੇਗਾ। ਦਰਸ਼ਕਾਂ ਦੀ ਸਹੂਲਤ ਲਈ ਸਟੇਡੀਅਮ ਦੇ ਗੇਟ ਦੁਪਹਿਰ 3:30 ਵਜੇ ਹੀ ਖੋਲ੍ਹ ਦਿੱਤੇ ਜਾਣਗੇ। ਸਟੇਡੀਅਮ ਵਿੱਚ ਦਾਖਲੇ ਲਈ ਕੁੱਲ 10 ਗੇਟ ਬਣਾਏ ਗਏ ਹਨ, ਜਿਨ੍ਹਾਂ ਵਿੱਚੋਂ ਗੇਟ ਨੰਬਰ 1 ਵਿਸ਼ੇਸ਼ ਤੌਰ 'ਤੇ ਦਿਵਿਆਂਗ (Physically Disabled) ਵਿਅਕਤੀਆਂ ਲਈ ਰਾਖਵਾਂ ਰੱਖਿਆ ਗਿਆ ਹੈ। ਮੈਚ ਲਈ ਗੁਜਰਾਤ ਦੇ ਸਟਾਰ ਖਿਡਾਰੀ ਸ਼ੁਭਮਨ ਗਿੱਲ ਵੀ ਟੀਮ ਨਾਲ ਏਅਰਪੋਰਟ ਤੋਂ ਰਵਾਨਾ ਹੁੰਦੇ ਹੋਏ ਨਜ਼ਰ ਆਏ।
ਪ੍ਰਸ਼ਾਸਨ ਵੱਲੋਂ ਟ੍ਰੈਫਿਕ ਐਡਵਾਈਜ਼ਰੀ ਜਾਰੀ
ਦੱਖਣ ਮਾਰਗ (South Marg) ਰਾਹੀਂ ਆਉਣ ਵਾਲਿਆਂ ਲਈ: IPL 2026 ਦੇ ਮੱਦੇਨਜ਼ਰ ਮੁੱਲਾਂਪੁਰ-ਚੰਡੀਗੜ੍ਹ ਬੈਰੀਅਰ ਤੋਂ ਲੈ ਕੇ ਸਟੇਡੀਅਮ ਰੋਡ ਤੱਕ ਦੇ ਟ੍ਰੈਫਿਕ ਵਿੱਚ ਕੁਝ ਅਹਿਮ ਬਦਲਾਅ ਕੀਤੇ ਗਏ ਹਨ। ਦੱਖਣ ਮਾਰਗ ਤੋਂ ਆਉਣ ਵਾਲੇ ਵਾਹਨ ਚਾਲਕਾਂ ਕੋਲ ਸਟੇਡੀਅਮ ਪਹੁੰਚਣ ਲਈ ਦੋ ਵਿਕਲਪ ਹੋਣਗੇ।
ਪਹਿਲਾ ਵਿਕਲਪ ਇਹ ਹੈ ਕਿ ਮੁੱਲਾਂਪੁਰ-ਚੰਡੀਗੜ੍ਹ ਬੈਰੀਅਰ ਤੋਂ ਖੱਬੇ ਮੁੜ ਕੇ ਬੱਦੀ-ਕੁਰਾਲੀ ਰੋਡ ਵੱਲ ਵਧਿਆ ਜਾਵੇ ਅਤੇ 'ਓਮੈਕਸ ਸ਼ਿਪ ਬਿਲਡਿੰਗ' ਦੇ ਕੋਲੋਂ ਮੁੜ ਖੱਬੇ ਮੁੜ ਕੇ PR-7 (ਏਅਰਪੋਰਟ ਰੋਡ) 'ਤੇ ਚੜ੍ਹਿਆ ਜਾਵੇ, ਜਿੱਥੋਂ ਸਟੇਡੀਅਮ ਰੋਡ ਲਈ ਰਸਤਾ ਮਿਲੇਗਾ। ਦੂਜਾ ਰਸਤਾ ਇਹ ਹੈ ਕਿ ਬੈਰੀਅਰ ਤੋਂ ਖੱਬੇ ਮੁੜ ਕੇ ਬੱਦੀ-ਕੁਰਾਲੀ ਰੋਡ 'ਤੇ ਸਿੱਧਾ ਚੱਲਦੇ ਹੋਏ 'ਈਕੋ ਸਿਟੀ-1' ਟਾਊਨਸ਼ਿਪ ਕੋਲੋਂ ਖੱਬੇ ਮੁੜਿਆ ਜਾਵੇ ਅਤੇ PR-6 ਰੋਡ ਰਾਹੀਂ ਸਿੱਧਾ ਸਟੇਡੀਅਮ ਰੋਡ ਪਹੁੰਚਿਆ ਜਾਵੇ।
ਏਅਰਪੋਰਟ ਰੋਡ ਅਤੇ ਕੁਰਾਲੀ ਵੱਲੋਂ ਆਉਣ ਵਾਲੇ ਵਾਹਨਾਂ ਲਈ:
ਬੱਦੀ ਜਾਂ ਕੁਰਾਲੀ ਰੋਡ ਤੋਂ PR-7 (ਏਅਰਪੋਰਟ ਰੋਡ) 'ਤੇ ਸਿੱਧਾ ਚੱਲਦੇ ਹੋਏ ਸਟੇਡੀਅਮ ਰੋਡ ਵੱਲ ਸੱਜੇ ਮੁੜਿਆ ਜਾਵੇ। ਇਸੇ ਤਰ੍ਹਾਂ ਕੁਰਾਲੀ ਵਾਲੇ ਪਾਸੇ ਤੋਂ ਆਉਣ ਵਾਲੇ ਵਾਹਨ ਵੀ ਸਟੇਡੀਅਮ ਰੋਡ ਵੱਲ ਸੱਜੇ ਮੁੜ ਕੇ ਦਾਖਲ ਹੋ ਸਕਣਗੇ।
PGI/ਮੱਧ ਮਾਰਗ ਵੱਲੋਂ ਆਉਣ ਵਾਲੇ ਦਰਸ਼ਕਾਂ ਲਈ:
ਇੱਥੋਂ ਆਉਣ ਵਾਲਿਆਂ ਲਈ ਪਹਿਲਾ ਰਸਤਾ ਇਹ ਹੈ ਕਿ ਬੱਦੀ-ਕੁਰਾਲੀ ਰੋਡ ਵੱਲ ਸਿੱਧਾ ਵਧੋ ਅਤੇ PR-7 ਰੋਡ 'ਤੇ ਚੜ੍ਹਨ ਲਈ ਖੱਬੇ ਮੁੜੋ, ਫਿਰ ਉੱਥੋਂ ਸਟੇਡੀਅਮ ਰੋਡ ਲਈ ਮੁੜ ਖੱਬੇ ਮੁੜਿਆ ਜਾਵੇ। ਦੂਜਾ ਵਿਕਲਪ ਇਹ ਹੈ ਕਿ ਮੁੱਲਾਂਪੁਰ-ਚੰਡੀਗੜ੍ਹ ਬੈਰੀਅਰ ਤੋਂ ਖੱਬੇ ਮੁੜ ਕੇ ਕੁਰਾਲੀ ਵੱਲ ਵਧਿਆ ਜਾਵੇ ਅਤੇ ਈਕੋ ਸਿਟੀ-1 ਟਾਊਨਸ਼ਿਪ ਦੇ ਕੋਲੋਂ ਖੱਬੇ ਮੁੜ ਕੇ PR-6 ਰੋਡ ਰਾਹੀਂ ਸਟੇਡੀਅਮ ਰੋਡ ਤੱਕ ਪਹੁੰਚਿਆ ਜਾਵੇ।
ਟ੍ਰੈਫਿਕ ਪੁਲਿਸ ਨੇ ਦਰਸ਼ਕਾਂ ਦੀ ਸਹੂਲਤ ਲਈ ਕੁਝ ਅਹਿਮ ਹਦਾਇਤਾਂ ਜਾਰੀ ਕੀਤੀਆਂ ਹਨ:
ਜਲਦੀ ਘਰੋਂ ਨਿਕਲੋ: ਮੈਚ ਸ਼ੁਰੂ ਹੋਣ ਤੋਂ ਘੱਟੋ-ਘੱਟ 2 ਘੰਟੇ ਪਹਿਲਾਂ ਘਰੋਂ ਨਿਕਲਣ ਦੀ ਸਲਾਹ ਦਿੱਤੀ ਗਈ ਹੈ, ਤਾਂ ਜੋ ਪਾਰਕਿੰਗ ਅਤੇ ਸੁਰੱਖਿਆ ਜਾਂਚ (Security Check) ਵਿੱਚ ਹੋਣ ਵਾਲੀ ਦੇਰੀ ਤੋਂ ਬਚਿਆ ਜਾ ਸਕੇ।
ਪਾਰਕਿੰਗ ਸਟਿੱਕਰ: ਜੇਕਰ ਤੁਹਾਡੇ ਕੋਲ ਅਧਿਕਾਰਤ ਪਾਰਕਿੰਗ ਸਟਿੱਕਰ ਉਪਲਬਧ ਹੈ, ਤਾਂ ਉਸਨੂੰ ਆਪਣੇ ਵਾਹਨ 'ਤੇ ਪਹਿਲਾਂ ਹੀ ਲਗਾ ਲਓ।
ਗੂਗਲ ਮੈਪਸ (Google Maps) ਦੀ ਵਰਤੋਂ: ਲਾਈਵ ਟ੍ਰੈਫਿਕ ਅਪਡੇਟਸ ਲਈ ਨੇਵੀਗੇਸ਼ਨ ਆਨ ਰੱਖੋ, ਕਿਉਂਕਿ ਰੂਟ ਡਾਇਵਰਸ਼ਨ ਕਾਰਨ ਕੁਝ ਲਿੰਕ ਰੋਡਾਂ 'ਤੇ ਟ੍ਰੈਫਿਕ ਦਾ ਦਬਾਅ ਵਧ ਸਕਦਾ ਹੈ।
ਸੜਕ ਕਿਨਾਰੇ ਪਾਰਕਿੰਗ ਦੀ ਮਨਾਹੀ: ਸੜਕ ਦੇ ਕਿਨਾਰੇ ਵਾਹਨ ਖੜ੍ਹੇ ਕਰਨ ਤੋਂ ਬਚੋ, ਨਹੀਂ ਤਾਂ ਟ੍ਰੈਫਿਕ ਪੁਲਿਸ ਵੱਲੋਂ ਕ੍ਰੇਨ ਰਾਹੀਂ ਵਾਹਨ ਟੋ (Tow) ਕੀਤਾ ਜਾ ਸਕਦਾ ਹੈ। ਸਿਰਫ਼ ਨਿਰਧਾਰਿਤ ਪਾਰਕਿੰਗ ਸਥਾਨਾਂ ਦੀ ਹੀ ਵਰਤੋਂ ਕਰੋ।
