ਜਲੰਧਰ 'ਚ ਏਸ਼ੀਅਨ ਹਾਕੀ ਚੈਂਪੀਅਨਜ਼ ਟਰਾਫ਼ੀ ਦਾ ਆਗਾਜ਼ ਅੱਜ: ਪਹਿਲਾ ਮੈਚ ਮਲੇਸ਼ੀਆ ਤੇ ਚੀਨ ਵਿਚਾਲੇ; CM ਮਾਨ ਨਵੇਂ ਸਟੇਡੀਅਮ ਦਾ ਕਰਨਗੇ ਉਦਘਾਟਨ

By:  Lajwinder Kaur October 27th 2026 10:23 AM -- Updated: October 27th 2026 10:30 AM

ਪੰਜਾਬ ਦੇ ਹਾਕੀ ਹੱਬ ਜਲੰਧਰ ਵਿੱਚ ਅੱਜ ਤੋਂ 'ਹੀਰੋ ਏਸ਼ੀਅਨ ਹਾਕੀ ਚੈਂਪੀਅਨਜ਼ ਟਰਾਫ਼ੀ ਪੰਜਾਬ 2026' ਦੀ ਇਤਿਹਾਸਕ ਸ਼ੁਰੂਆਤ ਹੋਣ ਜਾ ਰਹੀ ਹੈ। ਆਜ਼ਾਦੀ ਤੋਂ ਬਾਅਦ ਇਹ ਪਹਿਲਾ ਮੌਕਾ ਹੈ ਜਦੋਂ ਜਲੰਧਰ ਵਿੱਚ ਇੰਨੀ ਵੱਡੀ ਪੁਰਸ਼ ਹਾਕੀ ਚੈਂਪੀਅਨਸ਼ਿਪ ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ। ਬਰਲਟਨ ਪਾਰਕ ਸਥਿਤ ਨਵ-ਨਿਰਮਾਣਿਤ ਸੁਰਜੀਤ ਹਾਕੀ ਸਟੇਡੀਅਮ ਵਿੱਚ ਖੇਡੇ ਜਾਣ ਵਾਲੇ ਇਸ ਟੂਰਨਾਮੈਂਟ ਦਾ ਰਸਮੀ ਉਦਘਾਟਨ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਮੰਗਲਵਾਰ (27 ਅਕਤੂਬਰ) ਨੂੰ ਕਰਨਗੇ।

ਇਸ ਵੱਕਾਰੀ ਪ੍ਰਤੀਯੋਗਤਾ ਵਿੱਚ ਭਾਰਤ, ਮਲੇਸ਼ੀਆ, ਜਾਪਾਨ, ਕੋਰੀਆ, ਚੀਨ ਅਤੇ ਬੰਗਲਾਦੇਸ਼ ਦੀਆਂ ਟੀਮਾਂ ਹਿੱਸਾ ਲੈ ਰਹੀਆਂ ਹਨ। ਜਲੰਧਰ ਦੇ ਖੇਡ ਪ੍ਰੇਮੀਆਂ ਲਈ 27 ਅਕਤੂਬਰ ਦਾ ਦਿਨ ਬੇਹੱਦ ਖਾਸ ਰਹਿਣ ਵਾਲਾ ਹੈ।

ਕਪਤਾਨਾਂ ਨੇ ਭਰੀ ਹੁੰਕਾਰ

ਟੂਰਨਾਮੈਂਟ ਸ਼ੁਰੂ ਹੋਣ ਤੋਂ ਠੀਕ ਇੱਕ ਦਿਨ ਪਹਿਲਾਂ ਸੋਮਵਾਰ ਨੂੰ ਹਿੱਸਾ ਲੈਣ ਵਾਲੀਆਂ ਸਾਰੀਆਂ 6 ਏਸ਼ੀਆਈ ਟੀਮਾਂ ਦੇ ਕਪਤਾਨਾਂ ਨੇ ਪ੍ਰੈੱਸ ਕਾਨਫ਼ਰੰਸ ਕੀਤੀ। ਸਾਰੇ ਕਪਤਾਨਾਂ ਨੇ ਆਪਣੀ ਟੀਮ ਦੇ ਸਰਵੋਤਮ ਪ੍ਰਦਰਸ਼ਨ ਅਤੇ ਖਿਤਾਬ ਜਿੱਤਣ ਦਾ ਦਾਅਵਾ ਕੀਤਾ ਹੈ।

ਪਹਿਲੇ ਦਿਨ ਹੋਣਗੇ 3 ਮੁਕਾਬਲੇ, ਸ਼ਾਮ ਨੂੰ ਭਾਰਤ ਦਾ ਮੈਚ

ਟੂਰਨਾਮੈਂਟ ਦੇ ਪਹਿਲੇ ਦਿਨ ਕੁੱਲ 3 ਮੁਕਾਬਲੇ ਖੇਡੇ ਜਾਣਗੇ। ਮੈਚਾਂ ਦਾ ਸਮਾਂ ਇਸ ਤਰ੍ਹਾਂ ਹੈ:

- ਦੁਪਹਿਰ 1 ਵਜੇ: ਮਲੇਸ਼ੀਆ ਬਨਾਮ ਚੀਨ

- ਦੁਪਹਿਰ 3:15 ਵਜੇ: ਜਾਪਾਨ ਬਨਾਮ ਦੱਖਣੀ ਕੋਰੀਆ

- ਸ਼ਾਮ 5:30 ਤੋਂ 6:30 ਵਜੇ ਤੱਕ: ਉਦਘਾਟਨੀ ਸਮਾਰੋਹ

- ਸ਼ਾਮ 7 ਵਜੇ: ਭਾਰਤ ਬਨਾਮ ਬੰਗਲਾਦੇਸ਼

ਭਾਰਤੀ ਟੀਮ ਆਪਣੇ ਪਹਿਲੇ ਮੁਕਾਬਲੇ ਵਿੱਚ ਬੰਗਲਾਦੇਸ਼ ਨਾਲ ਭਿੜੇਗੀ। ਇਸ ਮੈਚ ਨੂੰ ਲੈ ਕੇ ਦਰਸ਼ਕਾਂ ਵਿੱਚ ਖ਼ਾਸ ਉਤਸ਼ਾਹ ਦੇਖਣ ਨੂੰ ਮਿਲ ਸਕਦਾ ਹੈ।

ਮੋਹਾਲੀ 'ਚ ਖੇਡੇ ਜਾਣਗੇ ਨਾਕਆਊਟ ਅਤੇ ਫਾਈਨਲ ਮੈਚ

ਟੂਰਨਾਮੈਂਟ ਦੇ ਸਾਰੇ ਗਰੁੱਪ (ਪੂਲ) ਮੈਚ 27 ਅਕਤੂਬਰ ਤੋਂ 2 ਨਵੰਬਰ ਤੱਕ ਜਲੰਧਰ ਦੇ ਸੁਰਜੀਤ ਹਾਕੀ ਸਟੇਡੀਅਮ ਵਿੱਚ ਆਯੋਜਿਤ ਹੋਣਗੇ। ਇਸ ਤੋਂ ਬਾਅਦ 4 ਨਵੰਬਰ ਤੋਂ ਕਲਾਸੀਫਿਕੇਸ਼ਨ ਅਤੇ ਸੈਮੀਫ਼ਾਈਨਲ ਮੁਕਾਬਲੇ ਮੋਹਾਲੀ ਵਿੱਚ ਸ਼ੁਰੂ ਹੋਣਗੇ। ਚੈਂਪੀਅਨਸ਼ਿਪ ਦਾ ਬ੍ਰੌਂਜ਼ ਮੈਡਲ (ਕਾਂਸੀ ਦੇ ਤਗਮੇ) ਮੈਚ ਅਤੇ ਫਾਈਨਲ (ਗੋਲਡ ਮੈਡਲ) ਮੁਕਾਬਲਾ 5 ਨਵੰਬਰ 2026 ਨੂੰ ਮੋਹਾਲੀ ਵਿੱਚ ਖੇਡਿਆ ਜਾਵੇਗਾ।