ਮੋਹਾਲੀ ਬੱਸ ਅੱਡੇ 'ਤੇ ਰੁਕਿਆ ਬੱਸਾਂ ਦਾ ਚੱਕਾ; ਖਰੜ ਦੇ ਬਾਜ਼ਾਰਾਂ 'ਚ ਵੀ ਪਸਰਿਆ ਸੰਨਾਟਾ, ਸਫਰ ਕਰਨ ਵਾਲੇ ਲੋਕ ਪ੍ਰੇਸ਼ਾਨ…
ਕੌਮੀ ਇਨਸਾਫ ਮੋਰਚੇ ਦੇ ਪੰਜਾਬ ਬੰਦ ਦਾ ਮੋਹਾਲੀ ਅਤੇ ਖਰੜ ਵਿੱਚ ਵਿਆਪਕ ਅਸਰ ਦੇਖਣ ਨੂੰ ਮਿਲਿਆ। ਮੋਹਾਲੀ ਬੱਸ ਅੱਡੇ ’ਤੇ ਸਰਕਾਰੀ ਤੇ ਨਿੱਜੀ ਬੱਸਾਂ ਬੰਦ ਰਹੀਆਂ, ਹਾਈਵੇਅ ਜਾਮ ਰਹੇ ਅਤੇ ਬਾਜ਼ਾਰ ਤੇ ਪ੍ਰਾਈਵੇਟ ਸਕੂਲ ਵੀ ਬੰਦ ਰਹੇ। ਖਰੜ ਵਿੱਚ ਵੀ ਦੁਕਾਨਾਂ ਬੰਦ ਹੋਣ ਕਾਰਨ ਬਾਜ਼ਾਰਾਂ ਵਿੱਚ ਸੰਨਾਟਾ ਛਾਇਆ ਰਿਹਾ। ਹਾਲਾਂਕਿ ਰੇਲ ਆਵਾਜਾਈ ਆਮ ਰਹੀ। ਪ੍ਰਦਰਸ਼ਨ ਦੌਰਾਨ ਐਂਬੂਲੈਂਸ ਅਤੇ ਹਸਪਤਾਲ ਕਰਮਚਾਰੀ ਨੂੰ ਜਾਮ ਵਿੱਚੋਂ ਰਸਤਾ ਵੀ ਦਿੱਤਾ ਗਿਆ।
ਕੌਮੀ ਇਨਸਾਫ ਮੋਰਚੇ ਵੱਲੋਂ ਸਜ਼ਾ ਪੂਰੀ ਕਰ ਚੁੱਕੇ ਬੰਦੀ ਸਿੰਘਾਂ ਦੀ ਰਿਹਾਈ ਅਤੇ ਸਾਬਕਾ ਮੁੱਖ ਮੰਤਰੀ ਬੇਅੰਤ ਸਿੰਘ ਦੇ ਕਤਲ ਕੇਸ ਵਿੱਚ ਜੇਲ੍ਹ ਵਿੱਚ ਬੰਦ ਜਗਤਾਰ ਸਿੰਘ ਹਵਾਰਾ ਦੀ ਪੈਰੋਲ ਦੀ ਮੰਗ ਨੂੰ ਲੈ ਕੇ ਦਿੱਤੇ ਗਏ ਪੰਜਾਬ ਬੰਦ ਦੇ ਸੱਦੇ ਦਾ ਮੋਹਾਲੀ ਅਤੇ ਖਰੜ ਇਲਾਕੇ ਵਿੱਚ ਵਿਆਪਕ ਅਸਰ ਦੇਖਣ ਨੂੰ ਮਿਲਿਆ।
ਮੋਹਾਲੀ ਬੱਸ ਅੱਡੇ 'ਤੇ ਸੁੰਨਸਾਨ, ਆਵਾਜਾਈ ਠੱਪ
ਬੰਦ ਦੇ ਚੱਲਦਿਆਂ ਮੋਹਾਲੀ ਬੱਸ ਅੱਡੇ 'ਤੇ ਸਰਕਾਰੀ ਅਤੇ ਨਿੱਜੀ ਬੱਸਾਂ ਦਾ ਸੰਚਾਲਨ ਪੂਰੀ ਤਰ੍ਹਾਂ ਠੱਪ ਰਿਹਾ, ਜਿਸ ਕਾਰਨ ਬੱਸ ਅੱਡੇ 'ਤੇ ਸੁੰਨਸਾਨ ਛਾਈ ਰਹੀ। ਬੱਸਾਂ ਨਾ ਚੱਲਣ ਕਾਰਨ ਆਮ ਯਾਤਰੀਆਂ ਨੂੰ ਭਾਰੀ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪਿਆ। ਇਸ ਤੋਂ ਇਲਾਵਾ ਸ਼ਹਿਰ ਦੇ ਮੁੱਖ ਹਾਈਵੇਅ ਵੀ ਜਾਮ ਰਹੇ, ਹਾਲਾਂਕਿ ਰੇਲਵੇ ਟਰੈਕਾਂ 'ਤੇ ਟ੍ਰੇਨਾਂ ਦੀ ਆਵਾਜਾਈ ਆਮ ਵਾਂਗ ਜਾਰੀ ਰਹੀ। ਇਲਾਕੇ ਦੇ ਪ੍ਰਾਈਵੇਟ ਸਕੂਲ ਅਤੇ ਮੁੱਖ ਮਾਰਕੀਟਾਂ ਵੀ ਪੂਰੀ ਤਰ੍ਹਾਂ ਬੰਦ ਰਹੀਆਂ।
ਪ੍ਰਦਰਸ਼ਨ ਦੌਰਾਨ ਕੁਝ ਖ਼ਾਸ ਘਟਨਾਵਾਂ ਵੀ ਸਾਹਮਣੇ ਆਈਆਂ:
ਐਂਬੂਲੈਂਸ ਲਈ ਬਣਾਇਆ ਰਸਤਾ: ਮੋਹਾਲੀ ਵਿੱਚ ਧਰਨੇ ਦੌਰਾਨ ਇੱਕ ਐਂਬੂਲੈਂਸ ਜਾਮ ਵਿੱਚ ਫਸ ਗਈ ਸੀ, ਜਿਸ ਨੂੰ ਪ੍ਰਦਰਸ਼ਨਕਾਰੀਆਂ ਨੇ ਤੁਰੰਤ ਮੁਸਤੈਦੀ ਦਿਖਾਉਂਦੇ ਹੋਏ ਸੁਰੱਖਿਅਤ ਬਾਹਰ ਕੱਢ ਕੇ ਅੱਗੇ ਰਵਾਨਾ ਕੀਤਾ।
ਵਾਈ.ਪੀ.ਐਸ. (YPS) ਚੌਂਕ 'ਚ ਲੇਡੀ ਨਿਹੰਗ ਵੱਲੋਂ ਮਦਦ: ਵਾਈ.ਪੀ.ਐਸ. ਚੌਂਕ 'ਤੇ ਲਗਾਏ ਜਾਮ ਦੌਰਾਨ ਮੈਕਸ ਹਸਪਤਾਲ ਦੀ ਇੱਕ ਮਹਿਲਾ ਕਰਮਚਾਰੀ ਫਸ ਗਈ ਸੀ। ਉਨ੍ਹਾਂ ਵੱਲੋਂ ਆਪਣਾ ਪਛਾਣ ਪੱਤਰ (ID Card) ਦਿਖਾਉਣ 'ਤੇ ਉੱਥੇ ਮੌਜੂਦ ਲੇਡੀ ਨਿਹੰਗ ਅਤੇ ਹੋਰ ਪ੍ਰਦਰਸ਼ਨਕਾਰੀਆਂ ਨੇ ਉਨ੍ਹਾਂ ਨੂੰ ਅੱਗੇ ਜਾਣ ਦੀ ਇਜਾਜ਼ਤ ਦਿੱਤੀ।
ਖਰੜ ਦੇ ਬਾਜ਼ਾਰਾਂ 'ਚ ਪਸਰਿਆ ਸੰਨਾਟਾ
ਖਰੜ ਸ਼ਹਿਰ ਵਿੱਚ ਵੀ ਕੌਮੀ ਇੰਸਾਫ਼ ਮੋਰਚੇ ਦੀ ਬੰਦ ਦੀ ਕਾਲ ਨੂੰ ਪੂਰਨ ਸਮਰਥਨ ਮਿਲਿਆ। ਖਰੜ ਦੇ ਜਿਨ੍ਹਾਂ ਬਾਜ਼ਾਰਾਂ ਵਿੱਚ ਆਮ ਦਿਨਾਂ 'ਚ ਪੈਰ ਧਰਨ ਨੂੰ ਜਗ੍ਹਾ ਨਹੀਂ ਹੁੰਦੀ ਸੀ, ਅੱਜ ਉੱਥੇ ਪੂਰੀ ਤਰ੍ਹਾਂ ਸੰਨਾਟਾ ਛਾਇਆ ਰਿਹਾ ਅਤੇ ਦੁਕਾਨਦਾਰਾਂ ਨੇ ਸਵੈ-ਇੱਛਾ ਨਾਲ ਆਪਣੀਆਂ ਦੁਕਾਨਾਂ ਬੰਦ ਰੱਖ ਕੇ ਮੋਰਚੇ ਦੀਆਂ ਮੰਗਾਂ ਦਾ ਸਮਰਥਨ ਕੀਤਾ।
