ਸਿਹਤ ਵਿਭਾਗ ‘ਚ ਮੱਚੀ ਤਰਥੱਲੀ! CMO ਸਣੇ 8 ਡਾਕਟਰਾਂ 'ਤੇ ਹੋਵੇਗੀ ਕਾਰਵਾਈ, ਹੈਲਥ ਵਿਭਾਗ ਵੱਲੋਂ ਚਾਰਜਸ਼ੀਟ ਕਰਨ ਦੇ ਹੁਕਮ

By:  Lajwinder Kaur July 18th 2026 10:53 AM -- Updated: July 18th 2026 11:22 AM

ਹਰਿਆਣਾ ਦੇ ਸਿਹਤ ਵਿਭਾਗ ਨੇ ਲਾਪਰਵਾਹੀ ਵਰਤਣ ਵਾਲੇ ਅਧਿਕਾਰੀਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਕਰਨੀ ਸ਼ੁਰੂ ਕਰ ਦਿੱਤੀ ਹੈ। ਸਰਕਾਰ ਨੇ ਹਿਸਾਰ ਦੀ ਸਿਵਲ ਸਰਜਨ ਡਾ. ਸਪਨਾ ਗਹਿਲਾਵਤ ਸਮੇਤ ਜ਼ਿਲ੍ਹੇ ਦੇ 8 ਸੀਨੀਅਰ ਮੈਡੀਕਲ ਅਧਿਕਾਰੀਆਂ ਅਤੇ ਡਿਪਟੀ ਸਿਵਲ ਸਰਜਨਾਂ ਖ਼ਿਲਾਫ਼ ਅਨੁਸ਼ਾਸਨੀ ਕਾਰਵਾਈ ਕਰਨ ਦਾ ਫ਼ੈਸਲਾ ਕੀਤਾ ਹੈ। ਇਹ ਕਾਰਵਾਈ ਹਰਿਆਣਾ ਸਿਵਲ ਸੇਵਾ (ਦੰਡ ਅਤੇ ਅਪੀਲ) ਨਿਯਮ, 2016 ਦੇ ਨਿਯਮ-8 ਤਹਿਤ ਕੀਤੀ ਜਾ ਰਹੀ ਹੈ। ਇਸ ਸਬੰਧ ਵਿੱਚ ਸਿਹਤ ਵਿਭਾਗ ਦੇ ਵਧੀਕ ਮੁੱਖ ਸਕੱਤਰ ਵੱਲੋਂ ਡਾਇਰੈਕਟਰ ਜਨਰਲ ਨੂੰ ਸਖ਼ਤ ਨਿਰਦੇਸ਼ ਜਾਰੀ ਕੀਤੇ ਗਏ ਹਨ।

ਸਿਹਤ ਸੇਵਾਵਾਂ 'ਚ ਲਾਪਰਵਾਹੀ ਪਈ ਭਾਰੀ 

ਸਰਕਾਰੀ ਹੁਕਮਾਂ ਮੁਤਾਬਕ, ਇਹਨਾਂ ਸਾਰੇ ਅਧਿਕਾਰੀਆਂ ਨੂੰ ਸਾਰਥਕ ਟੀਮ ਵੱਲੋਂ ਨੋਟਿਸ ਜਾਰੀ ਕੀਤੇ ਗਏ ਸਨ। ਅਧਿਕਾਰੀਆਂ ਨੇ ਨਾ ਤਾਂ ਉਹਨਾਂ ਨੋਟਿਸਾਂ ਦਾ ਤਸੱਲੀਬਖਸ਼ ਜਵਾਬ ਦਿੱਤਾ ਅਤੇ ਨਾ ਹੀ ਆਪਣੇ ਕੰਮ ਪ੍ਰਤੀ ਕੋਈ ਗੰਭੀਰਤਾ ਦਿਖਾਈ। ਇਸ ਮਾਮਲੇ ਬਾਰੇ ਜਦੋਂ ਸਿਵਲ ਸਰਜਨ (CMO) ਡਾ. ਸਪਨਾ ਗਹਿਲਾਵਤ ਦਾ ਪੱਖ ਜਾਣਨ ਦੀ ਕੋਸ਼ਿਸ਼ ਕੀਤੀ ਗਈ ਤਾਂ ਉਨ੍ਹਾਂ ਨੇ ਫ਼ੋਨ ਨਹੀਂ ਚੁੱਕਿਆ।

ਹਿਸਾਰ ਵਿੱਚ ਚਾਰਜਸ਼ੀਟ ਕੀਤੇ ਗਏ 8 ਡਾਕਟਰਾਂ ਦੀ ਸੂਚੀ ਇਸ ਪ੍ਰਕਾਰ ਹੈ:

• ਡਾ. ਸਪਨਾ ਗਹਿਲਾਵਤ – ਸਿਵਲ ਸਰਜਨ, ਹਿਸਾਰ
• ਡਾ. ਸੱਜਣ – ਸੀਨੀਅਰ ਮੈਡੀਕਲ ਅਫਸਰ (SMO), CHC ਮੰਗਾਲੀ, ਹਿਸਾਰ
• ਡਾ. ਆਸ਼ਿਮਾ ਚੌਧਰੀ – ਸੀਨੀਅਰ ਮੈਡੀਕਲ ਅਫਸਰ (SMO), CHC ਸੀਸਵਾਲ, ਹਿਸਾਰ
• ਡਾ. ਨਰੇਂਦਰ ਸ਼ਰਮਾ – ਸੀਨੀਅਰ ਮੈਡੀਕਲ ਅਫਸਰ (SMO), CHC ਖਾਂਡਾਖੇੜੀ, ਹਿਸਾਰ
• ਡਾ. ਵਿਕਰਮ – ਸੀਨੀਅਰ ਮੈਡੀਕਲ ਅਫਸਰ (SMO), CHC ਮਿਰਚਪੁਰ, ਹਿਸਾਰ
• ਡਾ. ਰੋਸ਼ਨਲਾਲ – ਸੀਨੀਅਰ ਮੈਡੀਕਲ ਅਫਸਰ (SMO), CHC ਆਰਯਨਗਰ, ਹਿਸਾਰ
• ਡਾ. ਜਿਤੇਂਦਰ ਸ਼ਰਮਾ – ਉਪ ਸਿਵਲ ਸਰਜਨ (NTEP), ਹਿਸਾਰ
• ਡਾ. ਨੀਰੂ ਗੁਪਤਾ – ਉਪ ਸਿਵਲ ਸਰਜਨ (NCD), ਹਿਸਾਰ

15 ਦਿਨਾਂ ਦੀ ਸਮਾਂ-ਸੀਮਾ: ਸਿਹਤ ਵਿਭਾਗ ਦੇ ਵਧੀਕ ਮੁੱਖ ਸਕੱਤਰ ਨੇ ਆਦੇਸ਼ ਦਿੱਤਾ ਹੈ ਕਿ ਅਗਲੇ 15 ਦਿਨਾਂ ਦੇ ਅੰਦਰ ਇਨ੍ਹਾਂ ਸਾਰੇ 8 ਡਾਕਟਰਾਂ ਵਿਰੁੱਧ ਦੋਸ਼ ਪੱਤਰ ਦਾ ਖਰੜਾ (ਡਰਾਫਟ) ਤਿਆਰ ਕੀਤਾ ਜਾਵੇ।

ਕਾਨੂੰਨੀ ਜਾਂਚ: ਇਸ ਡਰਾਫਟ ਨੂੰ ਵਿਭਾਗੀ ਵਕੀਲ (ਏ.ਡੀ.ਏ.) ਤੋਂ ਕਾਨੂੰਨੀ ਤੌਰ 'ਤੇ ਚੈੱਕ ਕਰਵਾਇਆ ਜਾਵੇਗਾ ਤਾਂ ਜੋ ਡਾਕਟਰਾਂ 'ਤੇ ਲੱਗੇ ਦੋਸ਼ ਕਾਨੂੰਨੀ ਤੌਰ 'ਤੇ ਮਜ਼ਬੂਤ ਰਹਿਣ।

ਸਬੂਤ ਇਕੱਠੇ ਕਰਨੇ: ਨੈਸ਼ਨਲ ਹੈਲਥ ਮਿਸ਼ਨ (NHM) ਦੇ ਡਾਇਰੈਕਟਰ ਨੂੰ ਨਿਰਦੇਸ਼ ਦਿੱਤੇ ਗਏ ਹਨ ਕਿ ਡਾਕਟਰਾਂ ਦੀ ਲਾਪਰਵਾਹੀ ਨਾਲ ਜੁੜੇ ਸਾਰੇ ਜ਼ਰੂਰੀ ਦਸਤਾਵੇਜ਼, ਫਾਈਲਾਂ ਅਤੇ ਸਬੂਤ ਤੁਰੰਤ ਹੈੱਡ ਆਫਿਸ ਭੇਜੇ ਜਾਣ ਤਾਂ ਜੋ ਕੇਸ ਨੂੰ ਮਜ਼ਬੂਤ ਬਣਾਇਆ ਜਾ ਸਕੇ।