Ram Rahim Parole: ਰਾਮ ਰਹੀਮ ਨੂੰ ਇੱਕ ਵਾਰ ਮੁੜ ਮਿਲੀ 40 ਦਿਨਾਂ ਦੀ ਪੈਰੋਲ

ਸਿਰਸਾ:- ਡੇਰਾ ਸੱਚਾ ਸੌਦਾ ਮੁਖੀ ਗੁਰਮੀਤ ਰਾਮ ਰਹੀਮ ਨੂੰ ਇੱਕ ਵਾਰ ਫਿਰ 40 ਦਿਨਾਂ ਦੀ ਪੈਰੋਲ 'ਤੇ ਜੇਲ੍ਹ ਤੋਂ ਰਿਹਾਅ ਕੀਤਾ ਜਾ ਰਿਹਾ ਹੈ। ਇਸ ਦੌਰਾਨ, ਰਾਮ ਰਹੀਮ ਸਿਰਸਾ ਸਥਿਤ ਡੇਰਾ ਸੱਚਾ ਸੌਦਾ ਹੈੱਡਕੁਆਰਟਰ ਵਿੱਚ ਰਹਿਣਗੇ। ਡੇਰਾ ਸੱਚਾ ਸੌਦਾ ਦੇ ਦੂਜੇ ਗੁਰੂ ਸ਼ਾਹ ਸਤਨਾਮ ਜੀ ਦੇ ਜਨਮ ਦਿਵਸ ਦੇ ਮੌਕੇ 'ਤੇ ਇਹ ਪੈਰੋਲ ਦਿੱਤੀ ਗਈ ਹੈ।

ਜਾਣਕਾਰੀ ਅਨੁਸਾਰ ਗੁਰਮੀਤ ਰਾਮ ਰਹੀਮ ਨੂੰ ਕੁਝ ਸਮੇਂ ਬਾਅਦ ਸੁਨਾਰੀਆ ਜੇਲ੍ਹ ਤੋਂ ਰਿਹਾਅ ਕੀਤਾ ਜਾਵੇਗਾ। ਰਾਮ ਰਹੀਮ ਸਾਧਵੀਆਂ ਨਾਲ ਬਲਾਤਕਾਰ ਅਤੇ ਇੱਕ ਪੱਤਰਕਾਰ ਦੇ ਕਤਲ ਦੇ ਦੋਸ਼ ਵਿੱਚ ਰੋਹਤਕ ਦੀ ਸੁਨਾਰੀਆ ਜੇਲ੍ਹ ਵਿੱਚ ਉਮਰ ਕੈਦ ਦੀ ਸਜ਼ਾ ਕੱਟ ਰਹੇ ਹਨ। ਆਪਣੀ ਪੈਰੋਲ ਦੌਰਾਨ, ਰਾਮ ਰਹੀਮ ਨੂੰ ਕੁਝ ਸ਼ਰਤਾਂ ਦੀ ਪਾਲਣਾ ਕਰਨੀ ਪਵੇਗੀ ਅਤੇ ਉਹ ਸਿਰਸਾ ਡੇਰਾ ਪਰਿਸਰ ਤੋਂ ਬਾਹਰ ਕਿਸੇ ਵੀ ਸਮਾਗਮ ਵਿੱਚ ਹਿੱਸਾ ਨਹੀਂ ਲੈ ਸਕੇਗਾ। ਪ੍ਰਸ਼ਾਸਨ ਦੁਆਰਾ ਉਸ ਦੀਆਂ ਗਤੀਵਿਧੀਆਂ 'ਤੇ ਨੇੜਿਓਂ ਨਜ਼ਰ ਰੱਖੀ ਜਾਵੇਗੀ।

ਅਗਸਤ 2017 ਵਿੱਚ ਬਲਾਤਕਾਰ ਦੇ ਮਾਮਲੇ ਵਿੱਚ ਦੋਸ਼ੀ ਠਹਿਰਾਏ ਜਾਣ ਤੋਂ ਬਾਅਦ ਇਹ 15ਵੀਂ ਵਾਰ ਹੋਵੇਗਾ ਜਦੋਂ ਗੁਰਮੀਤ ਰਾਮ ਰਹੀਮ ਸਿੰਘ ਨੂੰ ਜੇਲ੍ਹ ਤੋਂ ਰਿਹਾਅ ਕੀਤਾ ਗਿਆ ਹੈ। ਇਸ ਤੋਂ ਪਹਿਲਾਂ, ਉਨ੍ਹਾਂ ਨੂੰ 15 ਅਗਸਤ ਨੂੰ ਰੋਹਤਕ ਦੀ ਸੁਨਾਰੀਆ ਜੇਲ੍ਹ ਤੋਂ ਰਿਹਾਅ ਕੀਤਾ ਗਿਆ ਸੀ। ਗੁਰਮੀਤ ਰਾਮ ਰਹੀਮ ਨੂੰ ਅਗਸਤ 2025 ਵਿੱਚ ਵੀ 40 ਦਿਨਾਂ ਦੀ ਪੈਰੋਲ ਦਿੱਤੀ ਗਈ ਸੀ। 

15ਵੀਂ ਵਾਰ ਜੇਲ੍ਹ ਤੋਂ ਰਿਹਾਈ

ਗੁਰਮੀਤ ਰਾਮ ਰਹੀਮ ਸਿੰਘ 2017 ਤੋਂ ਲੈ ਕੇ ਹੁਣ ਤੱਕ ਕਈ ਵਾਰ ਜੇਲ੍ਹ ਤੋਂ ਰਿਹਾਅ ਹੋ ਚੁੱਕੇ ਹਨ। ਇਹ ਉਹਨਾਂ ਦੀ 15ਵੀਂ ਵਾਰ ਜੇਲ੍ਹ ਤੋਂ ਰਿਹਾਈ ਹੈ। ਪਹਿਲੀ ਵਾਰ 24 ਅਕਤੂਬਰ, 2020 ਨੂੰ ਇੱਕ ਦਿਨ ਦੀ ਪੈਰੋਲ ‘ਤੇ ਜੇਲ੍ਹ ਤੋਂ ਫਿਰ ਬਾਹਰ ਆਏ: 

• 21 ਮਈ, 2021 – 12 ਘੰਟੇ ਦੀ ਪੈਰੋਲ

• ਫਰਵਰੀ, 2022 – 21 ਦਿਨ ਦੀ ਫਰਲੋ

• ਜੂਨ 2022 – 30 ਦਿਨ ਦੀ ਪੈਰੋਲ

• 14 ਅਕਤੂਬਰ, 2022 – 40 ਦਿਨ ਦੀ ਪੈਰੋਲ

• 21 ਜਨਵਰੀ, 2023 – 40 ਦਿਨ ਦੀ ਪੈਰੋਲ

• 20 ਜੁਲਾਈ, 2023 – 30 ਦਿਨ  ਦੀ ਪੈਰੋਲ

• ਨਵੰਬਰ, 2023 – 21 ਦਿਨ ਦੀ ਪੈਰੋਲ

• 19 ਜਨਵਰੀ, 2024 – 50 ਦਿਨ ਦੀ ਪੈਰੋਲ

• 13 ਅਗਸਤ, 2024 – 21 ਦਿਨ ਦੀ ਫਰਲੋ

• 2 ਅਕਤੂਬਰ, 2024 – 20 ਦਿਨ ਦੀ ਪੈਰੋਲ

• 28 ਜਨਵਰੀ, 2025 – 30 ਦਿਨ ਦੀ ਪੈਰੋਲ

• 9 ਅਪ੍ਰੈਲ, 2025 – 21 ਦਿਨ ਦੀ ਫਰਲੋ

• ਅਗਸਤ, 2025 – 40 ਦਿਨ ਦੀ ਪੈਰੋਲ

ਹਾਲਾਂਕਿ ਰਾਮ ਰਹੀਮ ਦੇ ਵਾਰ-ਵਾਰ ਪੈਰੋਲ ਅਤੇ ਫਰਲੋ 'ਤੇ ਸਵਾਲ ਉਠਾਏ ਗਏ ਹਨ। ਪੱਤਰਕਾਰ ਛਤਰਪਤੀ ਦੇ ਪੁੱਤਰ ਅੰਸ਼ੁਲ ਨੇ ਵੀ ਪੈਰੋਲ 'ਤੇ ਇਤਰਾਜ਼ ਜਤਾਉਂਦੇ ਹੋਏ ਕਿਹਾ ਕਿ ਰਾਮ ਰਹੀਮ ਕੋਈ ਆਮ ਕੈਦੀ ਨਹੀਂ ਹੈ, ਸਗੋਂ ਇੱਕ ਸਖ਼ਤ ਅਪਰਾਧੀ ਹੈ। ਹਾਲਾਂਕਿ, ਹਾਈ ਕੋਰਟ ਵਿੱਚ ਦਾਇਰ ਕੀਤੇ ਇੱਕ ਹਲਫ਼ਨਾਮੇ ਵਿੱਚ, ਹਰਿਆਣਾ ਸਰਕਾਰ ਨੇ ਰਾਮ ਰਹੀਮ ਨੂੰ ਸਖ਼ਤ ਅਪਰਾਧੀ ਐਲਾਨਣ ਤੋਂ ਇਨਕਾਰ ਕੀਤਾ ਹੈ। ਸਰਕਾਰ ਦਾ ਕਹਿਣਾ ਹੈ ਕਿ ਰਾਮ ਰਹੀਮ ਜੇਲ੍ਹ ਵਿੱਚ ਚੰਗੇ ਆਚਰਣ ਵਾਲਾ ਕੈਦੀ ਹੈ, ਅਤੇ ਜੇਲ੍ਹ ਦੇ ਨਿਯਮ ਇੱਕ ਕੈਦੀ ਨੂੰ ਪ੍ਰਤੀ ਸਾਲ 90 ਦਿਨਾਂ ਤੱਕ ਪੈਰੋਲ ਪ੍ਰਾਪਤ ਕਰਨ ਦੀ ਆਗਿਆ ਦਿੰਦੇ ਹਨ।