PGI ਚੰਡੀਗੜ੍ਹ ਵੱਲੋਂ ਗਰਮੀਆਂ ਦੀਆਂ ਛੁੱਟੀਆਂ ਦਾ ਐਲਾਨ; ਮਰੀਜ਼ਾਂ ਦੀ ਸਹੂਲਤ ਲਈ ਕਰਮਚਾਰੀਆਂ ਨੂੰ ਦੋ ਪੜਾਵਾਂ ‘ਚ ਮਿਲੇਗੀ ਛੁੱਟੀ
ਚੰਡੀਗੜ੍ਹ ਤੋਂ ਅਹਿਮ ਖਬਰ ਸਾਹਮਣੇ ਆਈ ਹੈ। ਜਿੱਥੇ ਪੀ.ਜੀ.ਆਈ. (PGI) ਪ੍ਰਸ਼ਾਸਨ ਨੇ ਟੀਚਿੰਗ ਫੈਕਲਟੀ ਲਈ ਇਸ ਸਾਲ ਦੀਆਂ ਗਰਮੀਆਂ ਦੀਆਂ ਛੁੱਟੀਆਂ ਦੇ ਸ਼ਡਿਊਲ ਦਾ ਐਲਾਨ ਕਰ ਦਿੱਤਾ ਹੈ। ਜਾਰੀ ਕੀਤੇ ਗਏ ਹੁਕਮਾਂ ਅਨੁਸਾਰ ਇਹ ਛੁੱਟੀਆਂ 16 ਮਈ ਤੋਂ ਸ਼ੁਰੂ ਹੋ ਕੇ 15 ਜੁਲਾਈ ਤੱਕ ਰਹਿਣਗੀਆਂ। ਹਸਪਤਾਲ ਦੀਆਂ ਸੇਵਾਵਾਂ ਅਤੇ ਮਰੀਜ਼ਾਂ ਦੇ ਇਲਾਜ ਨੂੰ ਬਿਨਾਂ ਕਿਸੇ ਰੁਕਾਵਟ ਦੇ ਜਾਰੀ ਰੱਖਣ ਲਈ ਪ੍ਰਸ਼ਾਸਨ ਨੇ ਇਹਨਾਂ ਛੁੱਟੀਆਂ ਨੂੰ ਦੋ ਵਿਸ਼ੇਸ਼ ਪੜਾਵਾਂ ਵਿੱਚ ਵੰਡਿਆ ਹੈ।
ਛੁੱਟੀਆਂ ਦਾ ਪੂਰਾ ਸ਼ਡਿਊਲ:
- ਪਹਿਲਾ ਪੜਾਅ: 16 ਮਈ ਤੋਂ 14 ਜੂਨ ਤੱਕ।
- ਦੂਜਾ ਪੜਾਅ: 16 ਜੂਨ ਤੋਂ 15 ਜੁਲਾਈ ਤੱਕ।
ਵਿਸ਼ੇਸ਼ ਨੋਟ: 15 ਜੂਨ ਨੂੰ ਸਾਰੇ ਫੈਕਲਟੀ ਮੈਂਬਰਾਂ ਦਾ ਡਿਊਟੀ ’ਤੇ ਹਾਜ਼ਰ ਰਹਿਣਾ ਲਾਜ਼ਮੀ ਹੋਵੇਗਾ।
50 ਫ਼ੀਸਦੀ ਫੈਕਲਟੀ ਦਾ ਹਾਜ਼ਰ ਰਹਿਣਾ ਲਾਜ਼ਮੀ
ਪੀ.ਜੀ.ਆਈ. ਦੇ ਸਥਾਪਨਾ ਸ਼ਾਖਾ-1 ਵੱਲੋਂ ਜਾਰੀ ਹਦਾਇਤਾਂ ਵਿੱਚ ਸਪੱਸ਼ਟ ਕੀਤਾ ਗਿਆ ਹੈ ਕਿ ਹਸਪਤਾਲ ਦੀਆਂ ਸੇਵਾਵਾਂ ਪ੍ਰਭਾਵਿਤ ਨਾ ਹੋਣ, ਇਸ ਲਈ ਹਰ ਸਮੇਂ ਘੱਟੋ-ਘੱਟ 50 ਫ਼ੀਸਦੀ ਫੈਕਲਟੀ ਦਾ ਡਿਊਟੀ ’ਤੇ ਰਹਿਣਾ ਜ਼ਰੂਰੀ ਹੈ। ਸਾਰੇ ਵਿਭਾਗ ਮੁਖੀਆਂ ਨੂੰ ਅਗਲੇ 15 ਦਿਨਾਂ ਦੇ ਅੰਦਰ-ਅੰਦਰ ਡਿਊਟੀ ਰੋਸਟਰ ਤਿਆਰ ਕਰਕੇ ਪ੍ਰਸ਼ਾਸਨ ਨੂੰ ਭੇਜਣ ਦੇ ਨਿਰਦੇਸ਼ ਦਿੱਤੇ ਗਏ ਹਨ।
ਸਖ਼ਤ ਨਿਯਮਾਂ ਦੀ ਪਾਲਣਾ:
ਪ੍ਰਸ਼ਾਸਨ ਨੇ ਨਿਯਮਾਂ ਨੂੰ ਸਖ਼ਤ ਰੱਖਦਿਆਂ ਕਿਹਾ ਹੈ ਕਿ ਕੋਈ ਵੀ ਫੈਕਲਟੀ ਮੈਂਬਰ ਦੋਵੇਂ ਪੜਾਵਾਂ ਦੀਆਂ ਛੁੱਟੀਆਂ ਇਕੱਠੀਆਂ ਨਹੀਂ ਲੈ ਸਕੇਗਾ।
ਛੁੱਟੀਆਂ ਨੂੰ ਛੋਟੇ ਹਿੱਸਿਆਂ ਵਿੱਚ ਵੰਡਣ ਦੀ ਇਜਾਜ਼ਤ ਨਹੀਂ ਹੋਵੇਗੀ।
ਇੱਕ ਪੜਾਅ ਵਿੱਚ ਛੁੱਟੀ ਲੈਣ ਤੋਂ ਬਾਅਦ ਦੂਜੇ ਪੜਾਅ ਦੌਰਾਨ ਕਿਸੇ ਵੀ ਤਰ੍ਹਾਂ ਦੀ ਕਾਨਫਰੰਸ, ਐੱਲ.ਟੀ.ਸੀ. (LTC) ਜਾਂ ਕਮਾਈ ਹੋਈ ਛੁੱਟੀ (Earned Leave) ਦੀ ਮਨਜ਼ੂਰੀ ਨਹੀਂ ਦਿੱਤੀ ਜਾਵੇਗੀ।
ਪ੍ਰਸ਼ਾਸਨ ਦਾ ਮੁੱਖ ਮਕਸਦ ਫੈਕਲਟੀ ਨੂੰ ਬਣਦੀਆਂ ਛੁੱਟੀਆਂ ਦੇਣ ਦੇ ਨਾਲ-ਨਾਲ ਮਰੀਜ਼ਾਂ ਦੀ ਸਹੂਲਤ ਅਤੇ ਇਲਾਜ ਨੂੰ ਸਭ ਤੋਂ ਉੱਪਰ ਰੱਖਣਾ ਹੈ।
