ਚੰਡੀਗੜ੍ਹ ਵਿੱਚ, 2025 ਵਿੱਚ ਹੁਣ ਤੱਕ ਟ੍ਰੈਫਿਕ ਉਲੰਘਣਾਵਾਂ ਲਈ 648 ਡਰਾਈਵਿੰਗ ਲਾਇਸੈਂਸ ਮੁਅੱਤਲ ਕੀਤੇ ਗਏ ਹਨ, ਜੋ ਕਿ ਪਿਛਲੇ ਸਾਲ ਨਾਲੋਂ ਦੁੱਗਣੇ ਤੋਂ ਵੀ ਵੱਧ ਹਨ। ਰਜਿਸਟ੍ਰੇਸ਼ਨ ਅਤੇ ਲਾਇਸੈਂਸਿੰਗ ਅਥਾਰਟੀ (RLA) ਦੇ ਅੰਕੜਿਆਂ ਅਨੁਸਾਰ ਹੈਲਮੇਟ ਤੋਂ ਬਿਨਾਂ ਗੱਡੀ ਚਲਾਉਣਾ ਲਾਇਸੈਂਸ ਮੁਅੱਤਲ ਕਰਨ ਦਾ ਮੁੱਖ ਕਾਰਨ ਸੀ। ਇਸ ਤੋਂ ਬਾਅਦ Triple Riding ਦੇ ਮਾਮਲੇ ਸਾਹਮਣੇ ਆਏ।
ਸ਼ਹਿਰ ਦੇ 47 ਪ੍ਰਮੁੱਖ ਚੌਰਾਹਿਆਂ 'ਤੇ 225 ਇੰਟੈਲੀਜੈਂਟ ਟ੍ਰੈਫਿਕ ਮੈਨੇਜਮੈਂਟ ਸਿਸਟਮ (ITMS) ਕੈਮਰੇ ਲਗਾਏ ਗਏ ਹਨ। ਮੋਟਰ ਵਾਹਨ ਐਕਟ 1988 ਦੀ ਧਾਰਾ 19 ਅਤੇ ਕੇਂਦਰੀ ਮੋਟਰ ਵਾਹਨ ਨਿਯਮ, 1989 ਦੇ ਨਿਯਮ 21 ਦੇ ਤਹਿਤ, ਸ਼ਰਾਬ ਪੀ ਕੇ ਗੱਡੀ ਚਲਾਉਣ, ਤੇਜ਼ ਰਫ਼ਤਾਰ ਨਾਲ ਗੱਡੀ ਚਲਾਉਣ ਲਾਲ ਬੱਤੀਆਂ ਟੱਪਣ ਅਤੇ ਮੋਬਾਈਲ ਫੋਨ ਦੀ ਵਰਤੋਂ ਕਰਨ ਵਰਗੇ ਅਪਰਾਧਾਂ ਲਈ ਲਾਇਸੈਂਸ 6 ਮਹੀਨਿਆਂ ਤੱਕ ਮੁਅੱਤਲ ਕੀਤੇ ਜਾ ਸਕਦੇ ਹਨ। ਹੈਲਮੇਟ ਨਾ ਪਹਿਨਣ 'ਤੇ 3 ਮਹੀਨੇ ਦੀ ਮੁਅੱਤਲੀ ਅਤੇ ਜੁਰਮਾਨਾ ਲਗਾਇਆ ਜਾ ਸਕਦਾ ਹੈ।
ਨੋਟਿਸਾਂ ਦੇ ਬਾਵਜੂਦ ਨਹੀਂ ਭਰੇ ਚਲਾਨ
ਜਨਵਰੀ 2025 ਵਿੱਚ, ਰਜਿਸਟ੍ਰੇਸ਼ਨ ਅਤੇ ਲਾਇਸੈਂਸਿੰਗ ਅਥਾਰਟੀ (RAL ਚੰਡੀਗੜ੍ਹ) ਨੇ 15,000 ਤੋਂ ਵੱਧ ਡਰਾਈਵਰਾਂ ਨੂੰ ਨੋਟਿਸ ਜਾਰੀ ਕੀਤੇ ਜਿਨ੍ਹਾਂ ਦੇ ਪੰਜ ਜਾਂ ਵੱਧ ਚਲਾਨ ਲੰਬਿਤ ਹਨ। ਨੋਟਿਸਾਂ ਵਿੱਚ ਚੇਤਾਵਨੀ ਦਿੱਤੀ ਗਈ ਸੀ ਕਿ ਨਿਰਧਾਰਤ ਸਮੇਂ ਦੇ ਅੰਦਰ ਭੁਗਤਾਨ ਨਾ ਕਰਨ 'ਤੇ ਉਨ੍ਹਾਂ ਦੇ ਡਰਾਈਵਿੰਗ ਲਾਇਸੈਂਸ ਅਤੇ ਵਾਹਨ ਰਜਿਸਟ੍ਰੇਸ਼ਨ ਮੁਅੱਤਲ ਕਰ ਦਿੱਤੇ ਜਾਣਗੇ। ਪਿਛਲੇ ਤਿੰਨ ਸਾਲਾਂ ਦੇ ਲਗਭਗ 750,000 ਚਲਾਨ ਲੰਬਿਤ ਹਨ।
RAL ਇੰਚਾਰਜ ਪ੍ਰਦੁਮਨ ਸਿੰਘ ਦੇ ਅਨੁਸਾਰ, ਵਾਰ-ਵਾਰ ਯਾਦ ਦਿਵਾਉਣ ਦੇ ਬਾਵਜੂਦ, ਵੱਡੀ ਗਿਣਤੀ ਵਿੱਚ ਲੋਕ ਅਜੇ ਵੀ ਓਵਰਸਪੀਡਿੰਗ, ਲਾਲ ਬੱਤੀ ਜੰਪਿੰਗ ਅਤੇ ਖਤਰਨਾਕ ਡਰਾਈਵਿੰਗ ਵਰਗੇ ਅਪਰਾਧਾਂ ਲਈ ਜੁਰਮਾਨੇ ਅਦਾ ਕਰਨ ਵਿੱਚ ਅਸਫਲ ਰਹੇ ਹਨ। ਹੁਣ ਅੰਤਿਮ ਨੋਟਿਸ ਜਾਰੀ ਕੀਤੇ ਜਾਣਗੇ, ਜਿਸ ਤੋਂ ਬਾਅਦ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।
