ਕੈਨੇਡਾ ‘ਚ ਸੜਕ ਹਾਦਸੇ ਦੌਰਾਨ ਜਗਰਾਓਂ ਦੇ ਪਿੰਡ ਗੂੜ੍ਹੇ ਦੀ ਧੀ ਰਮਨਦੀਪ ਕੌਰ ਦੀ ਮੌਤ, ਪੁਲਿਸ 'ਚ ਨਿਭਾ ਰਹੀ ਸੀ ਸੇਵਾ, ਪਿੰਡ ‘ਚ ਸੋਗ ਦੀ ਲਹਿਰ
ਕੈਨੇਡਾ ਦੇ ਅਲਬਰਟਾ ਵਿੱਚ ਹੋਏ ਭਿਆਨਕ ਸੜਕ ਹਾਦਸੇ ਵਿੱਚ ਜਗਰਾਓਂ ਦੇ ਪਿੰਡ ਗੂੜ੍ਹੇ ਦੀ 24 ਸਾਲਾ ਰਮਨਦੀਪ ਕੌਰ ਮਾਨ ਦੀ ਮੌਤ ਹੋ ਗਈ। ਰਮਨਦੀਪ ਹਾਲ ਹੀ ਵਿੱਚ ਕੈਨੇਡਾ ਦੀ ਜੇਲ੍ਹ ਅਤੇ ਸੁਧਾਰ ਸੇਵਾ ਵਿੱਚ ਕਮਰੇਕਸ਼ਨ ਅਫਸਰ ਵਜੋਂ ਨੌਕਰੀ 'ਤੇ ਲੱਗੀ ਸੀ। 7 ਅਗਸਤ ਨੂੰ ਕੈਦੀ ਨੂੰ ਲਿਜਾਂਦੇ ਸਮੇਂ ਉਸ ਦੀ ਮਿੰਨੀਵੈਨ ਦੀ ਟਰੱਕ ਨਾਲ ਟੱਕਰ ਹੋ ਗਈ, ਜਿਸ ਵਿੱਚ ਰਮਨਦੀਪ ਸਮੇਤ ਤਿੰਨ ਲੋਕਾਂ ਦੀ ਮੌਤ ਹੋ ਗਈ। ਪੁਲਿਸ ਵੱਲੋਂ ਹਾਦਸੇ ਦੀ ਜਾਂਚ ਕੀਤੀ ਜਾ ਰਹੀ ਹੈ
ਕੈਨੇਡਾ ਦੇ ਅਲਬਰਟਾ ਪ੍ਰਾਂਤ ਵਿੱਚ ਵਾਪਰੇ ਇੱਕ ਭਿਆਨਕ ਸੜਕ ਹਾਦਸੇ ਵਿੱਚ ਜਗਰਾਓਂ ਦੇ ਪਿੰਡ ਗੂੜ੍ਹੇ (ਲੁਧਿਆਣਾ) ਦੀ ਰਹਿਣ ਵਾਲੀ 24 ਸਾਲਾ ਰਮਨਦੀਪ ਕੌਰ ਮਾਨ ਦੀ ਮੌਤ ਹੋ ਗਈ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਰਮਨਦੀਪ ਚਾਰ ਸਾਲ ਪਹਿਲਾਂ ਕੈਨੇਡਾ ਗਈ ਸੀ ਅਤੇ ਹਾਲ ਹੀ ਵਿੱਚ ਉਸ ਨੂੰ ਕੈਨੇਡਾ ਦੀ ਜੇਲ੍ਹ ਅਤੇ ਸੁਧਾਰ ਸੇਵਾ ਵਿੱਚ ਸੁਧਾਰਕ ਅਧਿਕਾਰੀ (Corrections Officer) ਵਜੋਂ ਨੌਕਰੀ ਮਿਲ ਗਈ ਸੀ।
ਕਿਵੇਂ ਵਾਪਰਿਆ ਹਾਦਸਾ:
ਇਹ ਹਾਦਸਾ 7 ਅਗਸਤ ਨੂੰ ਅਲਬਰਟਾ ਦੇ ਸਿਜਾਰ ਖੇਤਰ ਵਿੱਚ ਹਾਈਵੇ-41 ਅਤੇ ਹਾਈਵੇ-13 ਦੇ ਚੌਰਾਹੇ 'ਤੇ ਉਸ ਸਮੇਂ ਵਾਪਰਿਆ ਜਦੋਂ ਰਮਨਦੀਪ ਮਿੰਨੀਵੈਨ ਰਾਹੀਂ ਇੱਕ ਮਹਿਲਾ ਕੈਦੀ ਨੂੰ ਦੂਜੀ ਥਾਂ ਤਬਦੀਲ ਕਰ ਰਹੀ ਸੀ। ਇਸ ਦੌਰਾਨ ਉਨ੍ਹਾਂ ਦੀ ਵੈਨ ਦੀ ਇੱਕ ਹਿਨੋ ਬਾਕਸ ਟਰਕ ਨਾਲ ਸਿੱਧੀ ਟੱਕਰ ਹੋ ਗਈ। ਇਸ ਭਿਆਨਕ ਹਾਦਸੇ ਵਿੱਚ ਰਮਨਦੀਪ ਕੌਰ, ਉਨ੍ਹਾਂ ਦੇ ਸਹਿਕਰਮੀ ਨਿਕਲਾਸ ਸਰਬਨ (57) ਅਤੇ ਮਹਿਲਾ ਕੈਦੀ ਕਿਆਰਾ ਮੁਸਵਾ (24) ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ।
ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਅਤੇ ਸੁਧਾਰ ਸੇਵਾ ਦੇ ਕਮਿਸ਼ਨਰ ਵੱਲੋਂ ਇਸ ਦੁਖਦਾਈ ਹਾਦਸੇ 'ਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਗਿਆ ਹੈ, ਜਦਕਿ ਰਾਇਲ ਕੈਨੇਡੀਅਨ ਮਾਊਂਟਡ ਪੁਲਿਸ ਵੱਲੋਂ ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।
