AI ਦਾ ਖ਼ਤਰਨਾਕ ਖੇਡ! ਕਾਨਪੁਰ ਦੇ 11ਵੀਂ ਫ਼ੇਲ੍ਹ ਨੌਜਵਾਨ ਨੇ ਬਣਾਏ ਫ਼ੇਕ ਬੈਂਕਿੰਗ ਐਪ, ਦੇਸ਼ ਭਰ ਦੇ ਸਾਈਬਰ ਗੈਂਗਾਂ ਨੂੰ ਕਰਦਾ ਸੀ ਸਪਲਾਈ
ਗੁਜਰਾਤ ਦੇ ਸੂਰਤ ਸਾਈਬਰ ਕ੍ਰਾਈਮ ਸੈੱਲ ਨੇ ਉੱਤਰ ਪ੍ਰਦੇਸ਼ ਦੇ ਕਾਨਪੁਰ ਦੇ 18 ਸਾਲਾ 11ਵੀਂ ਡਰਾਪਆਊਟ ਰੋਹਿਤ ਸ਼ਾਕਯ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਦੋਸ਼ ਹੈ ਕਿ ਉਸ ਨੇ AI ਅਤੇ ਟੈਲੀਗ੍ਰਾਮ ਦੀ ਮਦਦ ਨਾਲ ਫ਼ੇਕ ਬੈਂਕਿੰਗ ਐਪ ਅਤੇ ਮਾਲਵੇਅਰ APK ਤਿਆਰ ਕਰਕੇ ਸਾਈਬਰ ਅਪਰਾਧੀਆਂ ਨੂੰ ਵੇਚੇ। ਇਨ੍ਹਾਂ ਐਪਸ ਰਾਹੀਂ ਲੋਕਾਂ ਦੇ ਮੋਬਾਈਲ ਹੈਕ ਕਰਕੇ OTP ਅਤੇ ਬੈਂਕਿੰਗ ਜਾਣਕਾਰੀ ਚੋਰੀ ਕਰਕੇ ਠੱਗੀ ਕੀਤੀ ਜਾਂਦੀ ਸੀ। ਪੁਲਿਸ ਨੇ ਮੁਲਜ਼ਮ ਕੋਲੋਂ ਲੈਪਟਾਪ ਅਤੇ ਮੋਬਾਈਲ ਜ਼ਬਤ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਗੁਜਰਾਤ ਦੇ ਸੂਰਤ ਸਾਈਬਰ ਕ੍ਰਾਈਮ ਸੈੱਲ ਨੇ 18 ਸਾਲਾ ਇੱਕ ਅਜਿਹੇ ਨੌਜਵਾਨ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜਿਸ ਨੇ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਅਤੇ ਟੈਲੀਗ੍ਰਾਮ ਦੀ ਮਦਦ ਨਾਲ ਫ਼ੇਕ ਬੈਂਕਿੰਗ ਐਪ ਅਤੇ ਵਾਇਰਸ ਨਾਲ ਸੰਕਰਮਿਤ APK ਫ਼ਾਈਲਾਂ ਤਿਆਰ ਕਰਕੇ ਦੇਸ਼ ਭਰ ਦੇ ਸਾਈਬਰ ਅਪਰਾਧੀਆਂ ਨੂੰ ਸਪਲਾਈ ਕੀਤੀਆਂ। ਫੜਿਆ ਗਿਆ ਮੁਲਜ਼ਮ ਉੱਤਰ ਪ੍ਰਦੇਸ਼ ਦੇ ਕਾਨਪੁਰ ਦਾ ਰਹਿਣ ਵਾਲਾ ਹੈ ਅਤੇ ਉਸ ਨੇ ਸਿਰਫ਼ 11ਵੀਂ ਤੱਕ ਹੀ ਪੜ੍ਹਾਈ ਕੀਤੀ ਹੈ। ਪੁਲਿਸ ਅਨੁਸਾਰ ਉਹ ਮਹਿਜ਼ 16 ਸਾਲ ਦੀ ਉਮਰ ਤੋਂ ਹੀ ਸਾਈਬਰ ਅਪਰਾਧਾਂ ਵਿੱਚ ਵਰਤੇ ਜਾਣ ਵਾਲੇ ਟੂਲ ਤਿਆਰ ਕਰ ਰਿਹਾ ਸੀ।
ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮ ਦੀ ਪਛਾਣ ਰੋਹਿਤ ਵੀਰੇਂਦਰ ਸਿੰਘ ਸ਼ਾਕਯ ਵਜੋਂ ਹੋਈ ਹੈ। ਜਾਂਚ ਏਜੰਸੀਆਂ ਦਾ ਦਾਅਵਾ ਹੈ ਕਿ ਉਸ ਵੱਲੋਂ ਬਣਾਏ ਗਏ ਫ਼ੇਕ ਐਪਸ ਦੀ ਵਰਤੋਂ ਜਾਮਤਾੜਾ (ਝਾਰਖੰਡ), ਹਰਿਆਣਾ ਅਤੇ ਰਾਜਸਥਾਨ ਦੇ ਕਈ ਬਦਨਾਮ ਸਾਈਬਰ ਗੈਂਗ ਕਰ ਰਹੇ ਸਨ।
ਇੰਝ ਹੋਇਆ ਪੂਰੇ ਨੈੱਟਵਰਕ ਦਾ ਖ਼ੁਲਾਸਾ
ਇਸ ਮਾਮਲੇ ਦਾ ਖ਼ੁਲਾਸਾ ਸੂਰਤ ਵਿੱਚ ਦਰਜ ਸਾਈਬਰ ਠੱਗੀ ਦੇ ਇੱਕ ਕੇਸ ਦੀ ਜਾਂਚ ਦੌਰਾਨ ਹੋਇਆ। ਮਈ ਮਹੀਨੇ ਵਿੱਚ ਇੱਕ ਵਿਅਕਤੀ ਨੂੰ WhatsApp 'ਤੇ ਪੰਜਾਬ ਨੈਸ਼ਨਲ ਬੈਂਕ (PNB One) ਵਰਗਾ ਦਿਖਾਈ ਦੇਣ ਵਾਲਾ ਇੱਕ APK ਲਿੰਕ ਭੇਜਿਆ ਗਿਆ ਸੀ।
ਪੀੜਤ ਨੇ ਇਸ ਨੂੰ ਅਸਲੀ ਬੈਂਕਿੰਗ ਐਪ ਸਮਝ ਕੇ ਆਪਣੇ ਮੋਬਾਈਲ ਵਿੱਚ ਇੰਸਟਾਲ ਕਰ ਲਿਆ। ਐਪ ਇੰਸਟਾਲ ਹੁੰਦਿਆਂ ਹੀ ਮੋਬਾਈਲ ਹੈਕ ਹੋ ਗਿਆ ਅਤੇ ਕੁਝ ਹੀ ਮਿੰਟਾਂ ਵਿੱਚ ਉਸ ਦੇ ਪ੍ਰਾਈਮ ਕੋ-ਆਪ੍ਰੇਟਿਵ ਬੈਂਕ ਖਾਤੇ ਵਿੱਚੋਂ 5 ਲੱਖ ਰੁਪਏ ਕੱਢ ਕੇ ਯੂਨੀਅਨ ਬੈਂਕ ਦੇ ਇੱਕ ਖਾਤੇ ਵਿੱਚ ਟਰਾਂਸਫਰ ਕਰ ਦਿੱਤੇ ਗਏ।
ਸ਼ਿਕਾਇਤ ਮਿਲਣ ਤੋਂ ਬਾਅਦ ਸੂਰਤ ਸਾਈਬਰ ਕ੍ਰਾਈਮ ਸੈੱਲ ਨੇ ਜਾਂਚ ਸ਼ੁਰੂ ਕੀਤੀ ਅਤੇ ਤਕਨੀਕੀ ਵਿਸ਼ਲੇਸ਼ਣ ਦੇ ਆਧਾਰ 'ਤੇ ਮੁਲਜ਼ਮ ਤੱਕ ਪਹੁੰਚ ਗਈ।
ਕਾਨਪੁਰ ਦੇ ਹੋਟਲ ਤੋਂ ਹੋਈ ਗ੍ਰਿਫ਼ਤਾਰੀ
ਜਾਂਚ ਤੋਂ ਬਾਅਦ ਸਾਈਬਰ ਕ੍ਰਾਈਮ ਸੈੱਲ ਅਤੇ ਆਈ.ਟੀ. ਮਾਹਿਰਾਂ ਦੀ ਟੀਮ ਨੇ ਕਾਨਪੁਰ ਦੇ ਇੱਕ ਹੋਟਲ ਵਿੱਚ ਛਾਪਾ ਮਾਰ ਕੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਉਸ ਕੋਲੋਂ ਲੈਪਟਾਪ, ਮੋਬਾਈਲ ਫ਼ੋਨ ਅਤੇ ਹੋਰ ਡਿਜੀਟਲ ਉਪਕਰਨ ਜ਼ਬਤ ਕੀਤੇ ਗਏ ਹਨ। ਪੁਲਿਸ ਇਨ੍ਹਾਂ ਡਿਵਾਈਸਾਂ ਦੀ ਫ਼ੋਰੈਂਸਿਕ ਜਾਂਚ ਕਰ ਰਹੀ ਹੈ।
AI ਅਤੇ Telegram ਦੀ ਮਦਦ ਨਾਲ ਤਿਆਰ ਕਰਦਾ ਸੀ ਮਾਲਵੇਅਰ
ਪੁਲਿਸ ਅਨੁਸਾਰ ਮੁਲਜ਼ਮ ਨੇ AI ਟੂਲਜ਼ ਅਤੇ ਟੈਲੀਗ੍ਰਾਮ ਦੀ ਵਰਤੋਂ ਕਰਕੇ ਅਜਿਹੇ APK ਤਿਆਰ ਕੀਤੇ, ਜਿਨ੍ਹਾਂ ਨੂੰ ਮੋਬਾਈਲ ਵਿੱਚ ਇੰਸਟਾਲ ਕਰਦਿਆਂ ਹੀ ਡਿਵਾਈਸ ਹੈਕ ਹੋ ਜਾਂਦੀ ਸੀ। ਪੁੱਛਗਿੱਛ ਵਿੱਚ ਸਾਹਮਣੇ ਆਇਆ ਹੈ ਕਿ ਉਹ ਦੋ ਤਰ੍ਹਾਂ ਦੀਆਂ ਐਪਲੀਕੇਸ਼ਨਾਂ ਤਿਆਰ ਕਰਦਾ ਸੀ।
ਪਹਿਲਾ ਐਪ ਪੀੜਤ ਦੇ ਮੋਬਾਈਲ ਵਿੱਚ ਇੰਸਟਾਲ ਕਰਵਾਇਆ ਜਾਂਦਾ ਸੀ, ਜਦੋਂ ਕਿ ਦੂਜਾ ਐਡਮਿਨ ਐਪ ਹੁੰਦਾ ਸੀ। ਇਸ ਐਡਮਿਨ ਐਪ ਰਾਹੀਂ ਸਾਈਬਰ ਅਪਰਾਧੀ ਪੀੜਤ ਦੇ ਮੋਬਾਈਲ 'ਤੇ ਆਉਣ ਵਾਲੇ ਓ.ਟੀ.ਪੀ. (OTP), ਬੈਂਕਿੰਗ ਵੇਰਵਿਆਂ ਅਤੇ ਹੋਰ ਸੰਵੇਦਨਸ਼ੀਲ ਜਾਣਕਾਰੀ ਨੂੰ ਰੀਅਲ ਟਾਈਮ ਵਿੱਚ ਦੇਖ ਸਕਦੇ ਸਨ।
ਸਬਸਕ੍ਰਿਪਸ਼ਨ ਮਾਡਲ 'ਤੇ ਚੱਲ ਰਿਹਾ ਸੀ ਧੰਦਾ
ਪੁਲਿਸ ਜਾਂਚ ਵਿੱਚ ਇਹ ਵੀ ਸਾਹਮਣੇ ਆਇਆ ਹੈ ਕਿ ਮੁਲਜ਼ਮ ਸਾਈਬਰ ਅਪਰਾਧੀਆਂ ਤੋਂ ਸਬਸਕ੍ਰਿਪਸ਼ਨ ਮਾਡਲ 'ਤੇ ਪੈਸੇ ਵਸੂਲਦਾ ਸੀ। ਸ਼ੁਰੂਆਤੀ ਸਾਫਟਵੇਅਰ ਉਪਲਬਧ ਕਰਵਾਉਣ ਲਈ ਉਹ 15 ਹਜ਼ਾਰ ਰੁਪਏ ਲੈਂਦਾ ਸੀ ਅਤੇ ਇਸ ਤੋਂ ਬਾਅਦ ਹਰ ਮਹੀਨੇ 15 ਹਜ਼ਾਰ ਰੁਪਏ ਰੱਖ-ਰਖਾਅ ਅਤੇ ਤਕਨੀਕੀ ਸਹਾਇਤਾ ਦੇ ਨਾਮ 'ਤੇ ਵਸੂਲ ਕਰਦਾ ਸੀ।
