Bank of Baroda ਡੇਟਾ ਲੀਕ: 1TB ਗਾਹਕ ਜਾਣਕਾਰੀ ਡਾਰਕ ਵੈੱਬ 'ਤੇ, ਨਾਮ-ਮੋਬਾਈਲ-ਆਧਾਰ ਨੰਬਰ ਲੀਕ, ਸਾਈਬਰ ਧੋਖਾਧੜੀ ਦਾ ਖ਼ਤਰਾ…

By:  Lajwinder Kaur July 28th 2026 11:37 AM -- Updated: July 28th 2026 11:54 AM

ਦੇਸ਼ ਦੇ ਪ੍ਰਮੁੱਖ ਸਰਕਾਰੀ ਬੈਂਕਾਂ ਵਿੱਚੋਂ ਇੱਕ Bank of Baroda (BoB) ਦੇ ਗਾਹਕਾਂ ਲਈ ਇੱਕ ਵੱਡੀ ਅਤੇ ਚਿੰਤਾਜਨਕ ਖ਼ਬਰ ਸਾਹਮਣੇ ਆਈ ਹੈ। ਰਿਪੋਰਟਾਂ ਮੁਤਾਬਕ, ਬੈਂਕ ਦੇ ਲਗਭਗ 1TB ਗਾਹਕ ਡੇਟਾ ਦੇ ਲੀਕ ਹੋਣ ਦਾ ਵੱਡਾ ਦਾਅਵਾ ਕੀਤਾ ਗਿਆ ਹੈ। ਇੱਕ ਹੈਕਰ ਨੇ ਇਸ ਵਿਸ਼ਾਲ ਡੇਟਾ ਨੂੰ ਡਾਰਕ ਵੈੱਬ 'ਤੇ ਅਪਲੋਡ ਕਰ ਦਿੱਤਾ ਹੈ, ਜਿਸ ਨਾਲ ਬੈਂਕਿੰਗ ਸੈਕਟਰ ਵਿੱਚ ਹੜਕੰਪ ਮੱਚ ਗਿਆ ਹੈ। ਇਸ ਘਟਨਾ ਨੂੰ ਸਾਈਬਰ ਮਾਹਿਰਾਂ ਵੱਲੋਂ ਹੁਣ ਤੱਕ ਦੇ ਸਭ ਤੋਂ ਵੱਡੇ ਸਾਈਬਰ ਹਮਲਿਆਂ ਵਿੱਚੋਂ ਇੱਕ ਮੰਨਿਆ ਜਾ ਰਿਹਾ ਹੈ।

25 ਜੁਲਾਈ ਨੂੰ ਸਾਹਮਣੇ ਆਈ ਘਟਨਾ: ransomware.live ਦਾ ਵੱਡਾ ਖੁਲਾਸਾ

ਇਸ ਪੂਰੇ ਮਾਮਲੇ ਦੀ ਜਾਣਕਾਰੀ ਸਭ ਤੋਂ ਪਹਿਲਾਂ 25 ਜੁਲਾਈ 2026 ਨੂੰ ਡਾਰਕ ਵੈੱਬ ਟ੍ਰੈਕਿੰਗ ਸਾਈਟ ransomware.live ਵੱਲੋਂ ਦਿੱਤੀ ਗਈ ਸੀ। ਇਸ ਤੋਂ ਬਾਅਦ, 'Cashless Consumer' ਦੇ ਸੰਸਥਾਪਕ ਅਤੇ ਸਾਫਟਵੇਅਰ ਇੰਜੀਨੀਅਰ ਸ੍ਰੀਕਾਂਤ ਲਕਸ਼ਮਨਨ (Srikanth Lakshmanan) ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ X 'ਤੇ ਇਸ ਦੇ ਸਕਰੀਨਸ਼ਾਟ ਸ਼ੇਅਰ ਕਰਦਿਆਂ ਇਸ ਨੂੰ "Cyber Disaster" (ਸਾਈਬਰ ਆਫ਼ਤ) ਕਰਾਰ ਦਿੱਤਾ।

ਸ੍ਰੀਕਾਂਤ ਲਕਸ਼ਮਨ ਨੇ ਦਾਅਵਾ ਕੀਤਾ ਕਿ ਉਹ ਲੀਕ ਹੋਈਆਂ ਫਾਈਲਾਂ ਦੇ ਕੁਝ ਹਿੱਸਿਆਂ ਦੀ ਤਸਦੀਕ ਕਰਨ ਵਿੱਚ ਕਾਮਯਾਬ ਰਹੇ ਹਨ। ਇਨ੍ਹਾਂ ਵਿੱਚ ਬੈਂਕ ਆਫ਼ ਬੜੌਦਾ ਦੇ ਅੰਦਰੂਨੀ ਦਸਤਾਵੇਜ਼ ਜਿਵੇਂ ਕਿ ਬ੍ਰਾਂਚ ਆਡਿਟ ਰਿਪੋਰਟਾਂ, ਲੋਨ ਮੁਲਾਂਕਣ ਦਸਤਾਵੇਜ਼, ਅੰਦਰੂਨੀ ਸੰਚਾਰ, ਵਿਜੀਲੈਂਸ ਜਾਂਚ ਰਿਕਾਰਡ ਅਤੇ ਦੇਸ਼ ਭਰ ਦੀਆਂ ਵੱਖ-ਵੱਖ ਬ੍ਰਾਂਚਾਂ ਤੋਂ ਗਾਹਕਾਂ ਦੇ ਅਰਜ਼ੀ ਫਾਰਮ ਸ਼ਾਮਲ ਹਨ।

ਕੀ-ਕੀ ਜਾਣਕਾਰੀ ਹੋਈ ਹੈ ਲੀਕ?

ਜੇਕਰ ਇਹ ਦਾਅਵੇ ਸਹੀ ਸਾਬਤ ਹੁੰਦੇ ਹਨ, ਤਾਂ Bank of Baroda ਦੇ ਲੱਖਾਂ ਗਾਹਕਾਂ ਦੀ ਨਿੱਜੀ ਅਤੇ ਵਿੱਤੀ ਜਾਣਕਾਰੀ ਜਨਤਕ ਤੌਰ 'ਤੇ ਡਾਰਕ ਵੈੱਬ 'ਤੇ ਉਪਲਬਧ ਹੋ ਸਕਦੀ ਹੈ। 

ਗਾਹਕਾਂ ਦੇ ਪੂਰੇ ਨਾਮ ਅਤੇ ਮੋਬਾਈਲ ਨੰਬਰ

• ਆਧਾਰ ਨੰਬਰ (Aadhaar Numbers)
• ਬੱਚਤ ਅਤੇ ਚਾਲੂ ਖਾਤਾ (Savings & Current Account) ਰਿਕਾਰਡ
• ਲੋਨ ਦਸਤਾਵੇਜ਼ ਅਤੇ ਕਰਜ਼ੇ ਨਾਲ ਜੁੜੀ ਜਾਣਕਾਰੀ
• ਨੈੱਟਬੈਂਕਿੰਗ ਯੂਜ਼ਰ ਰਿਕਾਰਡ
• NRI ਅਤੇ ਕਾਰਪੋਰੇਟ ਬੈਂਕਿੰਗ ਰਿਕਾਰਡ
• ਬ੍ਰਾਂਚ ਆਡਿਟ ਰਿਪੋਰਟਾਂ ਅਤੇ ਗਾਹਕ ਸਹਾਇਤਾ ਸਮੱਗਰੀ

ਇਹ ਸਾਰਾ ਡੇਟਾ ਡਾਰਕ ਵੈੱਬ 'ਤੇ ਡਾਊਨਲੋਡ ਕਰਨ ਲਈ ਉਪਲਬਧ ਹੋਣ ਦਾ ਦਾਅਵਾ ਕੀਤਾ ਜਾ ਰਿਹਾ ਹੈ। ਹਾਲਾਂਕਿ, ਰਾਹਤ ਦੀ ਗੱਲ ਇਹ ਹੈ ਕਿ ਅਜੇ ਤੱਕ ਪਾਸਵਰਡ, ATM PIN, UPI PIN ਜਾਂ OTP ਲੀਕ ਹੋਣ ਦਾ ਕੋਈ ਵੀ ਸਬੂਤ ਸਾਹਮਣੇ ਨਹੀਂ ਆਇਆ ਹੈ।

ਕਿਸ 'ਤੇ ਹੈ ਸ਼ੱਕ ਅਤੇ ਬੈਂਕ ਦਾ ਕੀ ਪੱਖ ਹੈ?

ਮੀਡਿਆ ਰਿਪੋਰਟਾਂ ਅਤੇ ਸਾਈਬਰ ਸੁਰੱਖਿਆ ਵਿਸ਼ਲੇਸ਼ਕਾਂ ਮੁਤਾਬਕ, ਇਸ ਖਤਰਨਾਕ ਹਮਲੇ ਦੇ ਪਿੱਛੇ TripleXX ਨਾਮਕ ਇੱਕ ਨਵੇਂ ਸਾਈਬਰ ਅਪਰਾਧ ਗਰੁੱਪ ਦਾ ਹੱਥ ਹੋਣ ਦਾ ਸ਼ੱਕ ਜਤਾਇਆ ਜਾ ਰਿਹਾ ਹੈ। ਹਾਲਾਂਕਿ, ਖ਼ਬਰ ਲਿਖਣ ਤੱਕ Bank of Baroda ਵੱਲੋਂ ਇਸ ਡੇਟਾ ਉਲੰਘਣਾ (Data Breach) ਬਾਰੇ ਕੋਈ ਵੀ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਗਈ ਹੈ। ਬੈਂਕ ਅਤੇ ਸਬੰਧਤ ਸੁਰੱਖਿਆ ਏਜੰਸੀਆਂ ਮਾਮਲੇ ਦੀ ਜਾਂਚ ਵਿੱਚ ਜੁਟੀਆਂ ਹੋਈਆਂ ਹਨ।

ਗਾਹਕਾਂ ਲਈ ਕਿਹੜੇ ਵੱਡੇ ਖ਼ਤਰੇ ਪੈਦਾ ਹੋ ਸਕਦੇ ਹਨ?

ਜਦੋਂ ਕਿਸੇ ਵੱਡੇ ਬੈਂਕ ਦਾ 1TB ਡੇਟਾ ਜਨਤਕ ਹੋ ਜਾਂਦਾ ਹੈ, ਤਾਂ ਸਾਈਬਰ ਠੱਗਾਂ ਲਈ ਗਾਹਕਾਂ ਨੂੰ ਨਿਸ਼ਾਨਾ ਬਣਾਉਣਾ ਆਸਾਨ ਹੋ ਜਾਂਦਾ ਹੈ। ਇਸ ਡੇਟਾ ਲੀਕ ਕਾਰਨ ਗਾਹਕਾਂ ਨੂੰ ਹੇਠ ਲਿਖੇ ਖ਼ਤਰਿਆਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ:

ਫਿਸ਼ਿੰਗ ਹਮਲੇ (Phishing Attacks): ਠੱਗ ਤੁਹਾਡੇ ਨਾਮ, ਮੋਬਾਈਲ ਨੰਬਰ ਅਤੇ ਬੈਂਕਿੰਗ ਵੇਰਵਿਆਂ ਦੀ ਵਰਤੋਂ ਕਰਕੇ ਅਸਲੀ ਬੈਂਕ ਕਰਮਚਾਰੀ ਹੋਣ ਦਾ ਭੁਲੇਖਾ ਦੇ ਕੇ ਫੋਨ ਜਾਂ ਮੈਸੇਜ ਕਰ ਸਕਦੇ ਹਨ।

ਪਛਾਣ ਦੀ ਚੋਰੀ (Identity Theft): ਆਧਾਰ ਨੰਬਰ ਅਤੇ ਨਿੱਜੀ ਦਸਤਾਵੇਜ਼ਾਂ ਦੇ ਗਲਤ ਹੱਥਾਂ ਵਿੱਚ ਜਾਣ ਨਾਲ ਨਕਲੀ ਪਛਾਣ ਬਣਾਉਣ ਦਾ ਖ਼ਤਰਾ ਵਧ ਜਾਂਦਾ ਹੈ।

ਜਾਅਲੀ ਲੋਨ ਅਰਜ਼ੀਆਂ (Fake Loan Applications): ਲੀਕ ਹੋਈ ਨਿੱਜੀ ਜਾਣਕਾਰੀ ਦੀ ਵਰਤੋਂ ਕਰਕੇ ਠੱਗ ਤੁਹਾਡੇ ਨਾਮ 'ਤੇ ਜਾਅਲੀ ਲੋਨ ਲੈਣ ਦੀ ਕੋਸ਼ਿਸ਼ ਕਰ ਸਕਦੇ ਹਨ।

ਜਾਅਲੀ KYC ਧੋਖਾਧੜੀ: ਗਾਹਕਾਂ ਨੂੰ KYC ਅਪਡੇਟ ਕਰਨ ਦੇ ਨਾਂ 'ਤੇ ਲਿੰਕ ਭੇਜ ਕੇ ਠੱਗਿਆ ਜਾ ਸਕਦਾ ਹੈ।

ਸੁਰੱਖਿਅਤ ਰਹਿਣ ਲਈ ਗਾਹਕ ਕੀ ਕਰਨ?

Bank of Baroda ਦੇ ਸਾਰੇ ਗਾਹਕਾਂ ਨੂੰ ਅਪੀਲ ਕਰਦਾ ਹੈ ਕਿ ਉਹ ਇਸ ਸਮੇਂ ਪੂਰੀ ਤਰ੍ਹਾਂ ਚੌਕਸ ਰਹਿਣ। ਆਪਣੀ ਸੁਰੱਖਿਆ ਲਈ ਇਨ੍ਹਾਂ ਗੱਲਾਂ ਦਾ ਧਿਆਨ ਰੱਖੋ:

• ਕਿਸੇ ਵੀ ਅਣਜਾਣ ਵਿਅਕਤੀ ਨਾਲ ਆਪਣਾ OTP, ATM PIN ਜਾਂ ਪਾਸਵਰਡ ਕਦੇ ਵੀ ਸ਼ੋਅ ਨਾ ਕਰੋ।
• ਬੈਂਕ ਦੇ ਨਾਮ 'ਤੇ ਆਉਣ ਵਾਲੇ ਸ਼ੱਕੀ ਲਿੰਕਾਂ (Links) 'ਤੇ ਕਲਿੱਕ ਨਾ ਕਰੋ।
• ਆਪਣੇ ਬੈਂਕ ਖਾਤੇ ਵਿੱਚ ਹੋਣ ਵਾਲੇ ਹਰ ਇੱਕ ਲੈਣ-ਦੇਣ (Transactions) 'ਤੇ ਨਜ਼ਰ ਰੱਖੋ।
• ਜੇਕਰ ਤੁਹਾਨੂੰ ਕੋਈ ਵੀ ਸ਼ੱਕੀ ਗਤੀਵਿਧੀ ਦਿਖਾਈ ਦਿੰਦੀ ਹੈ, ਤਾਂ ਤੁਰੰਤ ਆਪਣੇ ਬੈਂਕ ਅਤੇ ਸਥਾਨਕ ਸਾਈਬਰ ਕ੍ਰਾਈਮ ਸੈੱਲ (Cyber Crime Helpline 1930) ਨੂੰ ਸੂਚਿਤ ਕਰੋ।

Bank of Baroda ਵਰਗੇ ਵਿਸ਼ਾਲ ਵਿੱਤੀ ਅਦਾਰੇ ਵਿੱਚ 1TB ਡੇਟਾ ਲੀਕ ਹੋਣ ਦਾ ਦਾਅਵਾ ਦੇਸ਼ ਦੇ ਡਿਜੀਟਲ ਬੈਂਕਿੰਗ ਢਾਂਚੇ ਅਤੇ ਸਾਈਬਰ ਸੁਰੱਖਿਆ ਪ੍ਰਣਾਲੀ 'ਤੇ ਵੱਡਾ ਸਵਾਲੀਆ ਨਿਸ਼ਾਨ ਖੜ੍ਹਾ ਕਰਦਾ ਹੈ। ਭਾਵੇਂ ਅਜੇ ਪਿੰਨ ਜਾਂ ਪਾਸਵਰਡ ਸੁਰੱਖਿਅਤ ਹੋਣ ਦੀ ਗੱਲ ਕਹੀ ਜਾ ਰਹੀ ਹੈ, ਪਰ ਨਿੱਜੀ ਵੇਰਵਿਆਂ ਦਾ ਬਾਹਰ ਆਉਣਾ ਕਿਸੇ ਵੀ ਸਮੇਂ ਵੱਡੀ ਮੁਸੀਬਤ ਬਣ ਸਕਦਾ ਹੈ।