ਵਿਰੋਧੀ ਧਿਰ ਦੇ ਹੰਗਾਮੇ ਵਿਚਾਲੇ Anti-paper leak Bill ਪਾਸ, ਹੁਣ ਰਾਜ ਸਭਾ ‘ਚ ਭੇਜਿਆ ਜਾਵੇਗਾ

By:  Lajwinder Kaur July 29th 2026 03:55 PM -- Updated: July 29th 2026 04:05 PM

ਲੋਕ ਸਭਾ ਵਿੱਚ ਮੰਗਲਵਾਰ ਨੂੰ ਹੰਗਾਮੇ ਦੇ ਦਰਮਿਆਨ ਐਂਟੀ ਪੇਪਰ ਲੀਕ ਸੋਧ ਬਿੱਲ ਧੁਨੀ ਮਤ ਨਾਲ ਪਾਸ ਕਰ ਦਿੱਤਾ ਗਿਆ। ਬਿੱਲ 'ਤੇ ਲੰਬੀ ਚਰਚਾ ਦੌਰਾਨ ਸੱਤਾ ਪੱਖ ਅਤੇ ਵਿਰੋਧੀ ਧਿਰ ਵਿਚਾਲੇ ਤਿੱਖੀ ਨੋਕ-ਝੋਂਕ ਦੇਖਣ ਨੂੰ ਮਿਲੀ, ਜਦਕਿ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਦੇ ਬਿਆਨ ਨੂੰ ਲੈ ਕੇ ਵੀ ਸਦਨ ਵਿੱਚ ਭਾਰੀ ਹੰਗਾਮਾ ਹੋਇਆ। ਬਿੱਲ ਪਾਸ ਹੋਣ ਤੋਂ ਬਾਅਦ ਲੋਕ ਸਭਾ ਸਪੀਕਰ ਓਮ ਬਿਰਲਾ ਨੇ ਸਦਨ ਦੀ ਕਾਰਵਾਈ 30 ਜੁਲਾਈ ਸਵੇਰੇ 11 ਵਜੇ ਤੱਕ ਲਈ ਮੁਲਤਵੀ ਕਰ ਦਿੱਤੀ। ਭਾਰੀ ਹੰਗਾਮੇ ਦੇ ਵਿਚਕਾਰ ਐਂਟੀ ਪੇਪਰ ਲੀਕ ਬਿੱਲ ਲੋਕ ਸਭਾ ਤੋਂ ਪਾਸ ਹੋ ਗਿਆ ਹੈ। ਇਸ ਤੋਂ ਬਾਅਦ ਇਸ ਬਿੱਲ ਨੂੰ ਚਰਚਾ ਲਈ ਰਾਜ ਸਭਾ ਵਿੱਚ ਰੱਖਿਆ ਜਾਵੇਗਾ।

ਵਿਰੋਧੀ ਪੱਖ ਬਿੱਲ ‘ਤੇ ਕਰ ਰਿਹਾ ਹੈ ਰਾਜਨੀਤੀ: ਜਤਿੰਦਰ ਸਿੰਘ

ਕੇਂਦਰੀ ਮੰਤਰੀ ਜਤਿੰਦਰ ਸਿੰਘ ਨੇ ਲੋਕ ਸਭਾ ਵਿੱਚ ਬਿੱਲ ਪੇਸ਼ ਕਰਦਿਆਂ ਕਿਹਾ ਕਿ ਇਸ ਅਹਿਮ ਬਿੱਲ ਉੱਤੇ ਚਰਚਾ ਕਰਨ ਅਤੇ ਸੁਝਾਅ ਦੇਣ ਦੀ ਬਜਾਏ ਵਿਰੋਧੀ ਪੱਖ ਸਿਆਸਤ ਕਰ ਰਿਹਾ ਹੈ। ਜਤਿੰਦਰ ਸਿੰਘ ਨੇ ਆਖਿਆ, 'ਵਿਰੋਧੀ ਪੱਖ ਦਾ ਵਤੀਰਾ ਬਹੁਤ ਹੀ ਨਿਰਾਸ਼ਾਜਨਕ ਹੈ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਵਚਨਬੱਧਤਾ ਨੂੰ ਦਰਸਾਉਣ ਵਾਲੇ ਇੰਨੇ ਗੰਭੀਰ ਅਤੇ ਅਹਿਮ ਬਿੱਲ ਉੱਤੇ ਰਚਨਾਤਮਕ ਸੁਝਾਅ ਦੇਣ ਦੀ ਬਜਾਏ ਵਿਰੋਧੀ ਪੱਖ ਸਿਆਸਤ ਵਿੱਚ ਲੱਗਿਆ ਹੋਇਆ ਹੈ। ਵਿਰੋਧੀ ਪੱਖ ਦੇ ਨੇਤਾ ਵੱਲੋਂ ਜਿਸ ਕਿਸਮ ਦੀ ਭਾਸ਼ਾ ਦੀ ਵਰਤੋਂ ਕੀਤੀ ਗਈ, ਉਹ ਨਾ ਸਿਰਫ਼ ਗ਼ੈਰ-ਸੰਸਦੀ ਸੀ, ਸਗੋਂ ਇੰਨੀ ਇਤਰਾਜ਼ਯੋਗ ਸੀ ਕਿ ਮੈਂ ਉਸਨੂੰ ਦੁਹਰਾਉਣਾ ਵੀ ਨਹੀਂ ਚਾਹਾਂਗਾ। ਜੇ ਕੋਈ ਆਪਣੇ ਆਪ ਨੂੰ ਪੜ੍ਹਿਆ-ਲਿਖਿਆ ਅਤੇ ਸੰਸਦੀ ਪਰੰਪਰਾਵਾਂ ਤੋਂ ਜਾਣੂ ਸਮਝਦਾ ਹੈ, ਤਾਂ ਉਸਨੂੰ ਪਤਾ ਹੋਣਾ ਚਾਹੀਦਾ ਹੈ ਕਿ ਸਦਨ ਦੇ ਅੰਦਰ ਅਜਿਹੀ ਭਾਸ਼ਾ ਦੀ ਵਰਤੋਂ ਨਹੀਂ ਕੀਤੀ ਜਾ ਸਕਦੀ।'